એવિએશન ક્ષેત્રની જાણીતી કંપની SpiceJetની ફ્લાઇટ્સ હવે મુસાફરો માટે મુશ્કેલીનું કારણ બની રહી છે. ફ્લાઇટ મોડી પડવા અને રદ થવાની ઘટનાઓ સતત વધી રહી છે. પરિસ્થિતિ એવી છે કે સ્પાઇસજેટની ટિકિટ બુક કરાવનારા મુસાફરો કલાકો સુધી એરપોર્ટ પર રાહ જોયા બાદ આખરે ઘરે પરત ફરવા મજબૂર બની રહ્યા છે.
કંપનીની ઓપરેશનલ મુશ્કેલીઓના કારણે સ્થિતિ દિવસેને દિવસે વધુ ખરાબ થઈ રહી છે. ત્યારે સવાલો ઊભા થઈ રહ્યા છે કે શું કંપની પાસે કામગીરી ચાલુ રાખવા માટે પૂરતા પૈસા નથી? શું સ્પાઇસજેટ બંધ થવાના આરે પહોંચી ગઈ છે?
ફ્લાઇટ્સ મોડી પડવા અને રદ થવાની ઘટનાઓ વચ્ચે હવે સ્પાઇસજેટના બોર્ડે સ્થિતિ સુધારવા માટે પગલાં ભરવાનું શરૂ કર્યું છે. કંપનીએ પોતાની નાણાકીય સ્થિતિ મજબૂત કરવા માટે મોટો નિર્ણય લીધો છે. આ અંતર્ગત સ્પાઇસજેટને 5,500 કરોડ રૂપિયા એકત્ર કરવાની મંજૂરી આપવામાં આવી છે.
સ્પાઇસજેટના બોર્ડે લીધો મોટો નિર્ણય
સ્પાઇસજેટના બોર્ડે કંપનીની અધિકૃત શેર મૂડી 2,000 કરોડ રૂપિયાથી વધારીને 7,500 કરોડ રૂપિયા કરવાની પણ મંજૂરી આપી છે. આ સાથે જ એરલાઇનના મેનેજમેન્ટને સંભવિત રોકાણકારો સાથેની રોકાણ પ્રક્રિયા ઝડપી બનાવવાનો નિર્દેશ આપવામાં આવ્યો છે.
સ્પાઇસજેટના બોર્ડ ઓફ ડિરેક્ટર્સે બુધવારે એક અથવા વધુ માધ્યમો દ્વારા 5,500 કરોડ રૂપિયા સુધીની રકમ એકત્ર કરવાના પ્રસ્તાવને મંજૂરી આપી છે. એરલાઇનની નબળી નાણાકીય સ્થિતિ સુધારવા, તેની કામગીરીની ક્ષમતા ફરી વધારવા અને કંપનીને ફરી બેઠી કરવા માટે આ એક મોટું પગલું માનવામાં આવી રહ્યું છે. આ ભંડોળ શેર અને અન્ય માધ્યમો દ્વારા એકત્ર કરવામાં આવી શકે છે.
સ્પાઇસજેટ પર સંકટ કેમ આવ્યું?
સ્પાઇસજેટની ફ્લાઇટ્સ મોડી પડવા અને રદ થવા પાછળ અનેક કારણો છે. અહેવાલો અનુસાર, કંપની આર્થિક દબાણનો સામનો કરી રહી છે, જેની સીધી અસર તેની રોજિંદી કામગીરી પર પડી રહી છે. એરલાઇનને 'કેશ એન્ડ કેરી' વ્યવસ્થા હેઠળ કામ કરવાની ફરજ પડી રહી છે. એટલે કે એરપોર્ટની સેવાઓ મેળવતાં પહેલાં જ તેને તમામ ચૂકવણી કરવી પડે છે.
કંપનીની નાણાકીય સ્થિતિનો અંદાજ એ વાત પરથી પણ લગાવી શકાય છે કે કર્મચારીઓને પગાર મોડો મળી રહ્યો છે, ક્રૂની અછત વધી રહી છે અને મોટી સંખ્યામાં વિમાનો ગ્રાઉન્ડેડ છે. અનેક એરપોર્ટ ઓથોરિટીઝનું પણ કંપની પર બાકી લેણું છે. આ કારણે કેટલીક જગ્યાએ સ્પાઇસજેટની કામગીરી પર પ્રતિબંધો લગાવવામાં આવ્યા છે.
સ્પાઇસજેટની નાણાકીય સ્થિતિ પર નજર કરીએ તો સપ્ટેમ્બર 2025માં પૂરા થયેલા ત્રિમાસિક ગાળામાં કંપનીને 621 કરોડ રૂપિયાનું ચોખ્ખું નુકસાન થયું હતું. તેના એક વર્ષ અગાઉના સમાન સમયગાળામાં આ નુકસાન 458 કરોડ રૂપિયા હતું.
કંપનીની આવકની વાત કરીએ તો તેમાં વાર્ષિક ધોરણે 13.4 ટકાનો ઘટાડો થયો હતો અને આવક ઘટીને 792 કરોડ રૂપિયા રહી હતી, જે અગાઉ 915 કરોડ રૂપિયા હતી. સ્પાઇસજેટના ગ્રાઉન્ડેડ વિમાનો પર 120 કરોડ રૂપિયા અને તેમને ફરીથી કામગીરીમાં લાવવા માટે 30 કરોડ રૂપિયાનો ખર્ચ નોંધાયો હતો.
આ પણ વાંચો:Cyclone Akvan: બંગાળની ખાડીમાં ચક્રવાત ‘અકવાન’ વધુ શક્તિશાળી બન્યુ, 20 નવેમ્બરે આંધ્રપ્રદેશના દરિયાકાંઠે ટકરાવાની શક્યતા