ભારતીય વિમાન સેવા કંપની સ્પાઈસજેટ (SpiceJet) ફરી એકવાર ગંભીર આર્થિક સંકટમાં ફસાતી દેખાઈ રહી છે. કંપનીએ લાંબા સમયથી GST રિટર્ન દાખલ ન કરવાને કારણે તેના પર 124.65 કરોડ રૂપિયાથી વધુનું ટેક્સ લેણું ઊભું થયું છે. પરિસ્થિતિ એટલી ગંભીર બની ગઈ છે કે GST વિભાગે કંપનીનું GST રજિસ્ટ્રેશન રદ કરવાની ચેતવણી પણ આપી છે. આ સમાચારની અસર સોમવારે શેરબજારમાં સ્પાઈસજેટના શેર પર જોવા મળી શકે છે.
GST વિભાગે કંપનીને કારણદર્શક નોટિસ ફટકારી
મળતી માહિતી અનુસાર, GST વિભાગે કંપનીને કારણદર્શક નોટિસ ફટકારી છે. 25 મે 2026ના રોજ જાહેર કરાયેલી આ નોટિસમાં પૂછવામાં આવ્યું છે કે GST રિટર્ન સમયસર ન ભરવાના કારણે કંપનીનું GST રજિસ્ટ્રેશન કેમ રદ ન કરવામાં આવે. અધિકારીઓના જણાવ્યા મુજબ, સ્પાઈસજેટે ઘણા મહિનાઓથી નિયમિત રીતે રિટર્ન દાખલ કર્યા નથી. ટેક્સ બાકીદારીના આંકડાઓ પર નજર કરીએ તો નવેમ્બર 2025માં કંપની પર 44.44 કરોડ રૂપિયા, ડિસેમ્બર 2025માં 43.79 કરોડ રૂપિયા, જાન્યુઆરી 2026માં 12.19 કરોડ રૂપિયા, ફેબ્રુઆરીમાં 12.10 કરોડ રૂપિયા અને માર્ચ 2026 માટે 12.12 કરોડ રૂપિયાની GST માંગણી કરવામાં આવી છે.
29 મેએ BSE પર સ્પાઈસજેટનો શેર 12.75 રૂપિયે બંધ થયો
નોટિસ મળ્યા બાદ પણ કંપનીએ બાકી રહેલા રિટર્ન દાખલ કર્યા નથી. નિષ્ણાતોના મતે આ ઘટનાની સીધી અસર કંપનીના શેર પર પડી શકે છે. 29 મેના રોજ BSE પર સ્પાઈસજેટનો શેર 12.75 રૂપિયે બંધ થયો હતો. વર્ષ 2026ની શરૂઆતથી અત્યાર સુધીમાં શેરમાં લગભગ 60 ટકાનો ઘટાડો નોંધાયો છે, જ્યારે છેલ્લા એક વર્ષમાં તેમાં 70 ટકાથી વધુનો ઘટાડો થયો છે. કંપનીની નાણાકીય સ્થિતિ પણ ચિંતાજનક છે. ઓક્ટોબર-ડિસેમ્બર 2025 ત્રિમાસિક ગાળામાં કંપનીને 261.38 કરોડ રૂપિયાનું સંયુક્ત નેટ નુકસાન થયું હતું, જ્યારે એક વર્ષ અગાઉ તે જ સમયગાળામાં કંપની 20.43 કરોડ રૂપિયાના નફામાં હતી. જોકે, કંપનીની ઓપરેશનલ આવકમાં 14 ટકાનો વધારો નોંધાયો હતો અને તે 1,237 કરોડ રૂપિયાથી વધીને 1,408 કરોડ રૂપિયા થઈ હતી. સ્પાઈસજેટ પર વધતા કરબોજ અને સતત નાણાકીય નુકસાનને કારણે કંપનીના ભવિષ્ય અંગે રોકાણકારોમાં ચિંતા વધી રહી છે.
આ પણ વાંચો : 1 June Rule : ગ્રાહકો સાવધાન, 1 જૂનથી બદલાઈ રહ્યા છે નિયમો, આ ભૂલ કરી તો ગેસ કનેકશન થશે રદ
ડિસ્કલેમર: શેરબજારમાં કે મ્યુચ્યુઅલ ફંડમાં રોકાણ કરતા પહેલા તમારા ફાઈનાન્શિયલ એડવાઈઝરની સલાહ અવશ્ય લો.
