ગત સત્રના ભારે ઘટાડા બાદ, સપ્તાહના પ્રથમ દિવસે સોમવારે ભારતીય શેરબજાર મજબૂત ગ્રીન સિગ્નલ (લીલા નિશાન) સાથે ખૂલ્યું હતું. સેન્સેક્સ અને નિફ્ટી બંને ઇન્ડેક્સમાં 0.5 ટકાથી વધુનો ઉછાળો જોવા મળ્યો હતો. બજાર ખૂલતાની સાથે જ રોકાણકારો પર નસીબ ચાર હાથ થયા હતા અને ગણતરીની મિનિટોના ટ્રેડિંગમાં જ તેમની સંપત્તિમાં ₹3.15 લાખ કરોડનો તોતિંગ વધારો થયો હતો.
સોમવારે તેજી સાથે ખૂલ્યુ શેરબજાર
- સેન્સેક્સ (Sensex): 592 પોઈન્ટની જોરદાર બઢત સાથે 75,367.93 ની સપાટી પર પહોંચ્યો.
- નિફ્ટી 50 (Nifty 50): 186 પોઈન્ટ આંક વધીને 23,733.70 ના સ્તરને સ્પર્શ્યો.
- ઇન્ડિયા VIX (India VIX): બજારની અસ્થિરતા દર્શાવતો આ ઇન્ડેક્સ 3% થી વધુ ઘટીને 15.64 પર આવી ગયો, જે બજાર સ્થિર થઈ રહ્યું હોવાના સંકેત આપે છે.
આઈટી અને ઈન્ડિગોના શેરમાં તેજીની રમઝટ
- ચોથા ક્વાર્ટર (Q4) ના શાનદાર પરિણામો બાદ ઈન્ડિગો (Indigo) ના શેરમાં 4.5 ટકાથી વધુનો ઉછાળો જોવા મળ્યો હતો અને તે સેન્સેક્સ પર ટોપ ગેનર રહ્યો હતો.
- વધનારા મુખ્ય શેર: ઇન્ફોસિસ, એશિયન પેઇન્ટ્સ, TCS, ટેક મહિન્દ્રા, HCL ટેક અને રિલાયન્સ ઇન્ડસ્ટ્રીઝ (RIL) ના શેરોમાં 1 થી 3 ટકાની તેજી નોંધાઈ હતી.
- ઘટાડો નોંધાવતા શેર: માર્કેટના આ પોઝિટિવ ટ્રેન્ડથી ઉલટું, NTPC, કોટક મહિન્દ્રા બેંક અને એક્સિસ બેંકના શેરમાં આશરે 1 ટકાનો ઘટાડો જોવા મળ્યો હતો.
બ્રોડર માર્કેટ અને સેક્ટરની સ્થિતિ
બ્રોડર માર્કેટમાં પણ સાર્વત્રિક ખરીદી જોવા મળી હતી. નિફ્ટી મિડકેપ 100 ઇન્ડેક્સ 0.5% થી વધુ અને નિફ્ટી સ્મોલકેપ 100 ઇન્ડેક્સ 0.8% ઉપર ટ્રેડ થઈ રહ્યો હતો.
- સૌથી વધુ કમાણી કરાવતું સેક્ટર: નિફ્ટી આઈટી (Nifty IT) 2 ટકાથી વધુ ઉછળીને સૌથી મોખરે રહ્યું હતું.
- નુકસાન કરનાર સેક્ટર: નિફ્ટી FMCG અને નિફ્ટી પ્રાઇવેટ બેંક લાલ નિશાનમાં (ઘટાડા સાથે) સરકી ગયા હતા.
- શેરોની સ્થિતિ: NSE પર આશરે 1,823 શેરોમાં વધારો, 841 શેરોમાં ઘટાડો અને 125 શેરો સ્થિર જોવા મળ્યા હતા.
માર્કેટ નિષ્ણાંતોનું શું કહેવું છે?
જિયોજીત ઇન્વેસ્ટમેન્ટ્સના ચીફ ઇન્વેસ્ટમેન્ટ સ્ટ્રેટેજિસ્ટ વી.કે. વિજયકુમારે જણાવ્યું કે, "અમેરિકા અને ઈરાન વચ્ચેના કરારને લઈને અનિશ્ચિતતા અને બ્રેન્ટ ક્રૂડ આશરે 93 ડોલર પ્રતિ બેરલ પર ટ્રેડ થવાના કારણે હાલ બજાર માટે કોઈ મોટો પોઝિટિવ ટ્રિગર નથી. પશ્ચિમ એશિયા (મિડલ ઈસ્ટ) માં 28 ફેબ્રુઆરીથી શરૂ થયેલા સંઘર્ષ બાદ માર્કેટમાં મોટો બદલાવ આવ્યો છે."
તેમના મતે, મુખ્ય સૂચકાંકો (લાર્જ-કેપ) ની સરખામણીએ બ્રોડર માર્કેટ (મિડ-કેપ અને સ્મોલ-કેપ) નું પ્રદર્શન વધુ સારું રહ્યું છે, કારણ કે Q4 ના પરિણામો અપેક્ષા કરતાં ઘણા સારા આવ્યા છે. બીજી તરફ, વિદેશી સંસ્થાકીય રોકાણકારો (FPIs) દ્વારા લાર્જ-કેપ શેરોમાં સતત વેચવાલી કરવામાં આવી રહી છે.
અમેરિકી ડોલર સામે રૂપિયો સ્થિર
ચલણ બજારમાં ભારતીય રૂપિયો અમેરિકી ડોલર સામે 94.97 પર ખૂલ્યો હતો, જે અગાઉના બંધ સ્તર (95) ની આસપાસ જ છે. અગાઉ રૂપિયો સતત ગગડીને 97 ના સ્તરની નજીક પહોંચી ગયો હતો, પરંતુ ત્યાંથી તેણે શાનદાર વાપસી કરી છે.
LKP સિક્યોરિટીઝના કમોડિટી એન્ડ કરન્સી રિસર્ચ એનાલિસ્ટ જતિન ત્રિવેદીએ જણાવ્યું કે, કાચા તેલના નીચા ભાવોએ ભારતના ઈમ્પોર્ટ બિલ (આયાત ખર્ચ) ની ચિંતા ઓછી કરી છે, જેનાથી રૂપિયાને સપોર્ટ મળ્યો છે. ટેકનિકલ નજરે જોઈએ તો રૂપિયાને 94.60 ની આસપાસ તાત્કાલિક રેઝિસ્ટન્સ (અવરોધ) છે, જ્યારે 95.30 નજીકના ભવિષ્ય માટે મહત્વપૂર્ણ સપોર્ટ ઝોન છે.
FIIs ની રેકોર્ડબ્રેક વેચવાલી
NSE ના સત્તાવાર આંકડા અનુસાર, વિદેશી સંસ્થાકીય રોકાણકારો (FII) ભારતીય શેરબજારને લઈને ભારે મંદીના મૂડમાં છે. શુક્રવારે તેમણે બજારમાંથી એક જ દિવસમાં ₹21,105.86 કરોડના શેર વેચી માર્યા હતા. મે મહિના દરમિયાન FII દ્વારા સિંગલ ડે (એક જ દિવસમાં) કરવામાં આવેલી આ અત્યાર સુધીની સૌથી મોટી વેચવાલી છે.