ગત સપ્તાહ દરમિયાન ભારતીય શેરબજારમાં ભારે વેચવાલી જોવા મળી હતી, જેના કારણે સેન્સેક્સની ટોપ-10 સૌથી મૂલ્યવાન કંપનીઓમાંથી 9 કંપનીઓના કુલ માર્કેટ કેપમાં ₹2.74 લાખ કરોડનો ઘટાડો નોંધાયો છે. આ સમયગાળામાં સૌથી વધુ નુકસાન HDFC બેન્કને થયું, જ્યારે હિન્દુસ્તાન યુનિલિવર એકમાત્ર એવી કંપની રહી જેના માર્કેટ કેપમાં વધારો થયો.
સેન્સેક્સ 2,091.68 પોઈન્ટ તૂટ્યો
ગત સપ્તાહે સેન્સેક્સ 2,091.68 પોઈન્ટ એટલે કે 2.67 ટકા તૂટ્યો હતો, જ્યારે નિફ્ટી 566.85 પોઈન્ટ અથવા 2.32 ટકાના ઘટાડા સાથે બંધ રહ્યો હતો. બજારમાં આવેલા ઘટાડાની સીધી અસર દેશની અગ્રણી કંપનીઓના માર્કેટકેપ પર જોવા મળી હતી. HDFC બેન્કના માર્કેટ કેપમાં ₹1,18,383.91 કરોડનો ઘટાડો થતાં તે ₹11.43 લાખ કરોડ પર આવી ગયું. રિલાયન્સ ઈન્ડસ્ટ્રીઝનું માર્કેટ કેપ ₹65,429.82 કરોડ ઘટીને ₹17.29 લાખ કરોડ રહ્યું. ઉપરાંત સ્ટેટ બેન્ક ઓફ ઈન્ડિયા (SBI), ICICI બેન્ક, ભારતી એરટેલ, ટાટા કન્સલ્ટન્સી સર્વિસિસ (TCS), બજાજ ફાઈનાન્સ, ભારતીય જીવન વીમા નિગમ (LIC) અને લાર્સન એન્ડ ટુબ્રો (L&T)ના માર્કેટ કેપમાં પણ ઘટાડો નોંધાયો હતો.