ભારતીય સમાજમાં જ્યોતિષનું સ્થાન હંમેશા આગવું રહ્યું છે. અનેક લોકો તેમાં અતૂટ શ્રદ્ધા ધરાવે છે, જ્યારે કેટલાક તેને અંધશ્રદ્ધા માને છે. જોકે, દિલ્હીના એક એન્જિનિયર, પુનીત ગુપ્તા, જે પોતે જ્યોતિષમાં માનતા ન હતા, તેમની સફર આજે કરોડો રૂપિયાના બિઝનેસ, એસ્ટ્રોટોક (AstroTalk), સુધી પહોંચી છે.
નિષ્ફળતાથી સફળતા સુધીનો માર્ગ
પુનીત ગુપ્તા, એક બી.ટેક એન્જિનિયર, જેમણે IT ડેવલપર તરીકે પોતાની કારકિર્દી શરૂ કરી. 2013 માં તેમણે નોકરી છોડી પોતાનું સ્ટાર્ટઅપ શરૂ કર્યું, પરંતુ તે નિષ્ફળ રહ્યું. 2014 નું વર્ષ તેમના માટે ખૂબ જ પડકારજનક રહ્યું, જ્યાં તેમને મિત્રોના ઘરે જમીન પર સૂવા જેવી સ્થિતિનો પણ સામનો કરવો પડ્યો. મુંબઈમાં IT ડેવલપર તરીકે કામ કર્યા પછી, તેમણે 2014-2016 દરમિયાન બે સ્ટાર્ટઅપ્સ અજમાવ્યા, જેમાંથી એક IT-સેવાઓ કંપની ભાગીદારના ગયા પછી બંધ થઈ ગઈ. આ નિષ્ફળતાઓએ તેમને નવું વિચારવા મજબૂર કર્યા.
ટેકનોલોજી અને જ્યોતિષનો અનોખો સંગમ
પુનીત ગુપ્તાએ તેમની નિષ્ફળતામાંથી શીખ મેળવી કે ટેકનોલોજી સાથે નવા સ્કોપને જોડવો એ સફળતાનો માર્ગ છે. 2017 માં, એક જ્યોતિષે તેમને જ્યોતિષ સેક્ટરમાં જોડાવાની સલાહ આપી, જે પુનીતે માની લીધી. તેમને અનુભવ થયો કે, ટેક્નોલોજી સાથે જ્યોતિષનું મિશ્રણ એક મોટી તક બની શકે છે. તેમણે પોતે જ્યોતિષ શીખવાનો પ્રયાસ કર્યો, પરંતુ અનુભવની ઉણપને કારણે, તેમણે ટેકનોલોજી અને જ્યોતિષના સંયોજનથી એક એપ્લિકેશન બનાવવાનું વિચાર્યું. 2017 માં તેમણે પ્રોડક્ટ આઇડિયાશન શરૂ કર્યું અને 2018 સુધીમાં 10-12 મહિનાની મહેનતથી એક MVP (Minimum Viable Product) બનાવી. આનાથી યુઝર્સનો વિશ્વાસ વધ્યો અને વૃદ્ધિ શરૂ થઈ. 2019-20 સુધીમાં ઓર્ગેનિક ગ્રોથ સાથે માર્કેટિંગ પણ શરૂ કરવામાં આવ્યું.
પડકારો અને ઉકેલો
શરૂઆતમાં, ઘણા યુઝર્સ વકીલો/જ્યોતિષોના ખરાબ અનુભવોથી પરેશાન હતા, તેમને વિશ્વાસ અપાવવો મુશ્કેલ હતો. આ પડકારનો સામનો કરવા માટે, પુનીતે ટેસ્ટિંગ, રેટિંગ અને ઇન્ટરવ્યુ સિસ્ટમ શરૂ કરી. ત્રણ-ચાર અલગ-અલગ પૂછપરછ પછી જ જ્યોતિષને પ્લેટફોર્મ પર ઓનબોર્ડ કરવામાં આવતા. પુનીત ગુપ્તાએ કુંડળી જનરેટિંગ અને ચેટ સિસ્ટમ માટે મજબૂત કોડ બનાવ્યો, જેથી જ્યોતિષ અને યુઝર્સ સરળતાથી જોડાઈ શકે. સોફ્ટવેર ઇન્ટરફેસમાં ચોકસાઈ (Accuracy) પર ખાસ ધ્યાન આપવામાં આવ્યું.
એસ્ટ્રોટોકની ભવ્ય સફળતા
એક ઇન્ટરવ્યુમાં પુનીત ગુપ્તાએ જણાવ્યું કે, 2018 માં શરૂઆતના પહેલા મહિનામાં તેમની દૈનિક આવક (ડે-બેઝ રેવન્યુ) રૂપિયા 10,000 હતી. આજે, એસ્ટ્રોટોકની દૈનિક આવક રૂપિયા 3.5 કરોડ સુધી પહોંચી ગઈ છે. જ્યોતિષમાં વિશ્વાસ ન હોવા છતાં, પુનીત ગુપ્તાએ પોતાની નિષ્ફળતામાંથી શીખીને અને ટેકનોલોજીને જ્યોતિષ સાથે જોડીને એક સફળ બિઝનેસ મોડેલ ઊભું કર્યું છે, જે ખરેખર પ્રેરણાદાયક છે.
