ટોરેન્ટ ગ્રુપની ફ્લેગશિપ કંપની ટોરેન્ટ ફાર્માએ નાણાકીય વર્ષ 2026-27ના પ્રથમ ત્રિમાસિક (Q1 FY27) માટે મજબૂત પરિણામ જાહેર કર્યા છે. કંપનીની કુલ આવક વર્ષ દરમિયાન 55 ટકા વધીને ₹4,921 કરોડ પહોંચી છે. ઓપરેટિંગ EBITDA 61 ટકા વધીને ₹1,664 કરોડ થયું છે, જ્યારે EBITDA માર્જિન 33.8 ટકા અને ગ્રોસ માર્જિન 76.4 ટકા નોંધાયો છે. કંપનીનો ટેક્સ બાદનો નફો ₹566 કરોડ રહ્યો છે.

ભારતના બિઝનેસે રેકોર્ડ ઓર્ગેનિક વૃદ્ધિ નોંધાવી

કંપનીના બેઝ બિઝનેસની આવક ₹3,720 કરોડ રહી, જે ગયા વર્ષની સરખામણીએ 17 ટકા વધુ છે. આ સમયગાળા દરમિયાન ભારતના બિઝનેસે રેકોર્ડ ઓર્ગેનિક વૃદ્ધિ નોંધાવી છે. ભારતમાં કંપનીની આવક ₹2,157 કરોડ રહી, જેમાં 19 ટકાનો વધારો થયો છે. AIOCD PharmaTracના આંકડા મુજબ ભારતીય ફાર્મા માર્કેટની વૃદ્ધિ 12 ટકા રહી હતી, જ્યારે ટોરેન્ટે તેનાથી વધુ વૃદ્ધિ હાંસલ કરી છે. કંપની હવે ભારતીય કાર્ડિયાક માર્કેટમાં પ્રથમ ક્રમે પહોંચી છે. ઉપરાંત, Gx Semaglutideએ બજારમાં 36 ટકાનો હિસ્સો મેળવ્યો છે.

ટોરેન્ટ ફાર્મા ભારતની અગ્રણી ફાર્માસ્યુટિકલ કંપનીઓમાંની એક

બ્રાઝિલમાં કંપનીની આવક 27 ટકા વધીને ₹277 કરોડ થઈ, જ્યારે અમેરિકામાં આવક 36 ટકા વધીને ₹418 કરોડ પહોંચી. જર્મનીમાં આવક 3 ટકા વધીને ₹318 કરોડ થઈ, જોકે ત્રીજા પક્ષના સપ્લાયમાં વિક્ષેપ અને ટેન્ડરની ઓછી માંગને કારણે વૃદ્ધિ મર્યાદિત રહી. ટોરેન્ટ ફાર્મા ભારતની અગ્રણી ફાર્માસ્યુટિકલ કંપનીઓમાંની એક છે. કંપની 50થી વધુ દેશોમાં કાર્યરત છે અને તેની પાસે 16 મેન્યુફેક્ચરિંગ યુનિટ્સ છે, જેમાંથી 8 USFDA મંજૂર છે. સંશોધન અને વિકાસ (R&D) પર ભાર મૂકતી કંપનીમાં 900થી વધુ વૈજ્ઞાનિકો કાર્યરત છે, જે દેશ અને વિદેશના બજારોમાં નવી દવાઓના વિકાસમાં મહત્વપૂર્ણ યોગદાન આપી રહ્યા છે.

આ પણ વાંચો : Indo-MIM IPO : શેરબજારમાં આ કંપનીનું શાનદાર લિસ્ટિંગ, પ્રથમ દિવસે જ રોકાણકારોના પૈસામાં 50 ટકાનો વધારો

ડિસ્કલેમર: શેરબજારમાં કે મ્યુચ્યુઅલ ફંડમાં રોકાણ કરતા પહેલા તમારા ફાઈનાન્શિયલ એડવાઈઝરની સલાહ અવશ્ય લો.