આર્ટિફિશિયલ ઈન્ટેલિજન્સ (AI) પર નવા નિયમો અને નિયંત્રણો આવવાની આશંકા વચ્ચે અમેરિકી શેરબજારમાં ભારે વિનાશ જોવા મળ્યો છે. ગઈકાલે મોડી રાત્રે યુએસ માર્કેટમાં તીવ્ર ઘટાડો નોંધાયો હતો, જે છેલ્લા 19 મહિનામાં અમેરિકી બજાર માટે સૌથી ખરાબ દિવસ સાબિત થયો છે. આ ઘટાડાને કારણે રોકાણકારોના અંદાજે $2.9 ટ્રિલિયન (આશરે ₹270 લાખ કરોડ) એક જ ઝટકામાં ધોવાઈ ગયા છે.
બજારના આંકડાઓ પર નજર કરીએ તો, S&P 500 ઇન્ડેક્સ 3.77% (290 પોઈન્ટ) ઘટીને બંધ રહ્યો હતો, જ્યારે ડાઉ જોન્સ ઇન્ડસ્ટ્રિયલ એવરેજ 3% થી વધુ એટલે કે 1600 પોઈન્ટ્સથી વધુ તૂટ્યો હતો. ટેકનોલોજી આધારિત Nasdaq ઇન્ડેક્સ 5.52% ના ઘાતકી કડાકા સાથે 24,315.00 ના સ્તરે પહોંચી ગયો હતો. નવોડાક કમ્પોઝિટ તેના અગાઉના રેકોર્ડ-હાઈ સ્તરથી 10% થી વધુ નીચે આવી જતાં બજારમાં વિધિવત રીતે "ટેકનિકલ કરેક્શન" ની પુષ્ટિ થઈ ગઈ છે.
ઘટાડા પાછળનું મુખ્ય કારણ:
યુએસ મધ્યવર્તી ચૂંટણીઓમાં ડેમોક્રેટિક પાર્ટીની જીત બાદ રોકાણકારોમાં એવી શંકા જાગી છે કે નવી સરકાર AI ડેટા સેન્ટર્સ અને ઈન્ફ્રાસ્ટ્રક્ચરના વિસ્તરણ પર કડક નિયમો લાગુ કરી શકે છે. આ ડરના કારણે AI ટેકનોલોજી સાથે જોડાયેલી કંપનીઓના ભવિષ્યના ગ્રોથ પર સવાલો ઊભા થયા છે અને સેમિકન્ડક્ટર તથા ચિપમેકર કંપનીઓમાં ભારે વેચવાલી જોવા મળી હતી. Nvidia ના શેર 9% અને Micron Tech ના શેર 17% તૂટ્યા હતા, જ્યારે સેમિકન્ડક્ટર ETF માં 70% થી વધુનો ઘટાડો થયો હતો. આ સિવાય મેટા, એમેઝોન અને આલ્ફાબેટ (ગુગલ) જેવી દિગ્ગજ ટેક કંપનીઓના શેરોમાં પણ 2% થી 4% સુધીનો ઘટાડો નોંધાયો હતો.
ભારતીય બજાર પર શું અસર પડશે?
અમેરિકી બજારમાં કડાકાના પગલે ભારતીય બજારના સૂચક ગિફ્ટ નિફ્ટી (GIFT Nifty) માં પણ 127 પોઈન્ટનો ઘટાડો જોવા મળ્યો હતો, જે સંકેત આપે છે કે ભારતીય શેરબજારની શરૂઆત પણ લાલ નિશાનમાં (મંદી સાથે) થઈ શકે છે.
જોકે, બજારના નિષ્ણાતોનું માનવું છે કે ભારતીય માર્કેટમાં AI સંબંધિત ટેક કંપનીઓનો સીધો સંપર્ક (Exposure) યુએસની સરખામણીએ ઘણો ઓછો છે. તેથી, ભારતમાં કડાકો જોવા મળી શકે છે પરંતુ તેની ગંભીરતા અમેરિકા જેટલી તીવ્ર નહીં હોય. નોંધનીય છે કે ભારતીય બજારમાં છેલ્લા છ દિવસથી સતત તેજીની રેલી જોવા મળી હતી, જેનાથી દેશનું કુલ માર્કેટ કેપ 5 ટ્રિલિયન ડોલરને પાર કરી ગયું હતું. હવે ગ્લોબલ સંકેતોને કારણે ભારતીય રોકાણકારોએ થોડી સાવચેતી રાખવી પડશે.
આ પણ વાંચોઃ Bengaluru માં કેબ ડ્રાઇવરે ક્રૂરતાની હદ કરી પાર,પરિવારના 7 સભ્યોની કરી હત્યા
