નાણામંત્રી નિર્મલા સીતારમણે સંસદમાં રજૂ કરેલા આર્થિક સર્વેક્ષણ મુજબ, નાણાકીય વર્ષ 2026-27 દરમિયાન ભારતનો GDP વૃદ્ધિ દર 6.8 થી 7.2 ટકા વચ્ચે રહેવાની શક્યતા છે. આ દર હાલના નાણાકીય વર્ષના અંદાજિત 7.4 ટકા કરતા થોડો ઓછો છે, પરંતુ વૈશ્વિક અનિશ્ચિતતાઓ વચ્ચે આ વૃદ્ધિ દરને સકારાત્મક માનવામાં આવી રહ્યો છે. આ સર્વે બજેટ માટે માર્ગદર્શક દસ્તાવેજ તરીકે કામ કરે છે.
રેટિંગ એજન્સી ICRA અનુસાર
રેટિંગ એજન્સી ICRA અનુસાર, સરકાર આગામી વર્ષમાં રાજકોષીય ખાધને 4.3 ટકા સુધી નિયંત્રિત રાખવાનો પ્રયાસ કરી શકે છે. આ સાથે મધ્યમ વર્ગને કર રાહત, GSTને વધુ સરળ બનાવવાના પગલાં અને રોકાણને પ્રોત્સાહન આપતી નીતિઓ બજેટ 2026માં જોવા મળી શકે છે.
ઇલેક્ટ્રોનિક્સ અને મેન્યુફેક્ચરિંગ
ઇલેક્ટ્રોનિક્સ ક્ષેત્રમાં GST સંબંધિત મુશ્કેલીઓ દૂર કરવાની અને જરૂરી કાચા માલ તથા ઘટકો પર આયાત શુલ્કમાં રાહત આપવાની માંગ છે. આ પગલાંથી ‘મેક ઇન ઇન્ડિયા’ને વેગ મળશે અને નિકાસમાં વધારો થઈ શકે છે.
નવીનીકરણીય ઊર્જા
ગ્રીન એનર્જી સેક્ટર માટે સ્પષ્ટ નીતિ, સ્થાનિક ઉત્પાદનને પ્રોત્સાહન અને સૌર ઊર્જા તથા નવી ટેકનોલોજીમાં વધુ રોકાણની અપેક્ષા છે. ભારતના નેટ ઝીરો લક્ષ્યને ધ્યાનમાં રાખીને આ ક્ષેત્ર મહત્વનું બની શકે છે.
NBFC અને MSME
MSME માટે વધુ ક્રેડિટ સપોર્ટ, લોન ગેરંટી અને NBFC મારફતે સરળ ફાઇનાન્સિંગની શક્યતા છે. આ પગલાં નાના ઉદ્યોગોને મજબૂત બનાવશે અને રોજગાર સર્જનમાં મદદરૂપ થશે. રોકાણકારો STT ઘટાડવા અથવા નાબૂદ કરવાની અને નાના રોકાણકારો માટે મૂડી લાભ કરમાં રાહતની અપેક્ષા રાખે છે, જેથી બજારમાં ભાગીદારી વધે.
નિકાસ, સોનું અને EV
નિકાસકારોને સસ્તી લોન, ગોલ્ડ ETF અને સોવરેન ગોલ્ડ બોન્ડ (SGB) ફરી શરૂ કરવાની શક્યતા છે. EV ક્ષેત્ર માટે વધુ સબસિડી અને 5% GSTની માંગ છે.
આરોગ્ય, શિક્ષણ અને કૃષિ
આરોગ્ય ક્ષેત્રમાં મહિલાઓના સ્વાસ્થ્ય પર ભાર, શિક્ષણમાં ડિજિટલ ક્લાસરૂમ્સ અને કૃષિમાં FPOને મજબૂત સહાય બજેટની પ્રાથમિકતા બની શકે છે. એકંદરે, બજેટ 2026 વિકાસ અને નાણાકીય સંતુલન વચ્ચે સંતુલન સાધવાનો પ્રયાસ કરશે. હવે જોવાનું એ રહેશે કે સરકાર 1 ફેબ્રુઆરીએ આ અપેક્ષાઓને કેટલું હકીકતમાં ફેરવે છે.
આ પણ વાંચો : Union Budget 2026 : ગિગ વર્કર્સને મોટી રાહત? કલાકદીઠ લઘુત્તમ કમાણી પર વિચાર
