અફઘાનિસ્તાન સામેની T20I શ્રેણીની ત્રીજી મેચમાં ભારતીય ટીમના યુવા ઓપનર અભિષેક શર્માએ તોફાની બેટિંગ કરીને સૌનું ધ્યાન ખેંચ્યું હતું. તેમણે માત્ર 30 બોલમાં સદી ફટકારીને T20I ક્રિકેટમાં ભારત માટે સૌથી ઝડપી સદીનો નવો રેકોર્ડ બનાવ્યો હતો. સદી પૂરી કર્યા બાદ અભિષેકે જે રીતે ઉજવણી કરી હતી તેણે પણ ચાહકોમાં ભારે ચર્ચા જગાવી હતી.અભિષેકે સદી પૂરી કર્યા બાદ મેદાનમાં બેસીને ધ્યાનની મુદ્રા કરી હતી. આ દૃશ્ય જોઈને સ્ટેડિયમમાં હાજર દર્શકો અને ટીવી પર મેચ જોઈ રહેલા ચાહકો પણ થોડા સમય માટે આશ્ચર્યચકિત થઈ ગયા હતા. જોકે મેચ બાદ પ્લેયર ઓફ ધ મેચનો પુરસ્કાર મળ્યા પછી અભિષેકે આ ખાસ ઉજવણી પાછળનું કારણ જણાવ્યું હતું.
ધ્યાનથી મને ખરેખર મદદ મળી
અભિષેક શર્માએ જણાવ્યું હતું કે તેઓ છેલ્લા 6 મહિનાથી 1 વર્ષથી ધ્યાન કરી રહ્યા છે. આખું વર્ષ ક્રિકેટ રમતી વખતે ખેલાડી તરીકે અનેક પ્રકારના ઉતાર-ચઢાવનો સામનો કરવો પડે છે. આવી સ્થિતિમાં મનને સ્થિર રાખવું મહત્વનું બને છે અને ધ્યાનથી તેમને તેમાં ઘણી મદદ મળી છે.તેમણે કહ્યું કે તેમની આ ઉજવણીનો હેતુ માત્ર પોતાની ખુશી વ્યક્ત કરવાનો નહોતો. જો કોઈ અન્ય ખેલાડી કે ક્રિકેટર આ ઉજવણી જોશે અને તેને લાગશે કે ધ્યાન કરવાથી તેને પણ મદદ મળી શકે છે, તો તેમના માટે આ ખાસ ઉજવણી સફળ માનશે.અભિષેકે પોતાની માનસિક સ્થિરતા અંગે વાત કરતાં કહ્યું કે છેલ્લા કેટલાક મહિનામાં ધ્યાન તેમના માટે ખૂબ ઉપયોગી રહ્યું છે. મેદાન પર આ રીતે બેસીને તેમણે પોતાના જીવનમાં મનને સ્થિર રાખવામાં મદદ કરનારી બાબત તરફ લોકોનું ધ્યાન દોરવાનો પ્રયાસ કર્યો હતો.
