વેલિંગ્ટનના બેસિન રિઝર્વ મેદાન પર ભારત અને ન્યૂઝીલેન્ડ વચ્ચે રમાઈ રહેલી પ્રથમ ટેસ્ટ મેચના બીજા દિવસે મેદાન પર જોરદાર ડ્રામા જોવા મળ્યો હતો. ન્યૂઝીલેન્ડના હેનરી નિકોલ્સ અને ગ્લેન ફિલિપ્સે ભારતીય બોલરોને પરેશાન કર્યા હતા, તો બીજી તરફ ભારતીય ટીમના કેપ્ટન શુભમન ગિલ અને ઝડપી બોલર આકાશ દીપ વચ્ચે DRSને લઈને રસપ્રદ ઘટના બની હતી. આકાશ દીપની જીદને કારણે ભારતે પોતાના મહત્વના રિવ્યૂ ગુમાવ્યા હતા. ખોટા રિવ્યૂ માટે દબાણ થતાં શુભમન ગિલ પણ મેદાન પર ગુસ્સે ભરાયો હતો.
આકાશ દીપની જીદ સામે ગિલે લીધો રિવ્યૂ
આ સમગ્ર ઘટના ન્યૂઝીલેન્ડની પ્રથમ ઇનિંગની 95.2મી ઓવરમાં બની હતી. ગ્લેન ફિલિપ્સને આઉટ કર્યા બાદ આકાશ દીપનો આત્મવિશ્વાસ ઘણો વધી ગયો હતો. ત્યારબાદ તેણે નવા બેટ્સમેન નાથન સ્મિથને ગુડ લેન્થ બોલ ફેંક્યો હતો. આ બોલ અંદરની તરફ આવ્યો હતો અને આગળ વધીને રમવાનો પ્રયાસ કરી રહેલા નાથન સ્મિથના પેડ પર વાગ્યો હતો.ભારતીય ખેલાડીઓએ જોરદાર અપીલ કરી હતી, પરંતુ અમ્પાયરે બેટ્સમેનને નોટઆઉટ આપ્યો હતો. આકાશ દીપને વિશ્વાસ હતો કે બેટ્સમેન આઉટ છે. તેથી તેણે કેપ્ટન શુભમન ગિલને DRS લેવાનો આગ્રહ કર્યો હતો.શરૂઆતમાં ગિલ આકાશ દીપની વાત સાથે સહમત નહોતો. વિકેટ પાછળ ઋષભ પંત અને નજીકમાં કેએલ રાહુલ પણ હાજર હતા. જોકે, આકાશ દીપના વારંવાર આગ્રહ બાદ ગિલે હસતાં હસતાં રિવ્યૂ લેવાનો નિર્ણય કર્યો હતો.પરંતુ રિપ્લેમાં સ્પષ્ટ થયું કે બોલ ઓફ સ્ટમ્પની બહાર પડ્યો હતો અને લેગ સ્ટમ્પની ઉપરથી પસાર થઈ રહ્યો હતો. આથી નાથન સ્મિથને નોટઆઉટ જાહેર કરવામાં આવ્યો હતો. ખોટો રિવ્યૂ ગુમાવ્યા બાદ શુભમન ગિલ આકાશ દીપ પર નારાજ થયો હતો અને તેને મેદાન પર જ ફટકાર લગાવી હતી.
