ઈંગ્લેન્ડ અને પાકિસ્તાન વચ્ચે ટેસ્ટ સિરીઝની ત્રીજી અને અંતિમ મેચ બર્મિંઘમના એજબેસ્ટન મેદાન પર રમાઈ રહી છે.આ મેચમાં પાકિસ્તાનના બેટર બાબર આઝમે બીજી ઇનિંગ્સમાં 76 રનની મહત્વની ઇનિંગ્સ રમી હતી.જોકે,તે ફરી એકવાર સદી પૂરી કરવામાં નિષ્ફળ રહ્યો.તેમ છતાં આ ઇનિંગ્સ દરમિયાન બાબરે આંતરરાષ્ટ્રીય ક્રિકેટમાં મોટી સિદ્ધિ મેળવી છે.બાબર આઝમે બીજી ઇનિંગ્સમાં 76 રન બનાવવાની સાથે પાકિસ્તાનના કેપ્ટન તરીકે આંતરરાષ્ટ્રીય ક્રિકેટમાં 7000 રન પૂરા કરી લીધા છે. આ સાથે તે પાકિસ્તાનના કેપ્ટન તરીકે આ સિદ્ધિ મેળવનારો બીજો બેટર બની ગયો છે.બાબર પહેલાં શાન મસૂદે 95 રનની ઇનિંગ્સ રમી હતી.
મિસ્બાહ ઉલ હક હજુ પણ સૌથી આગળ
પાકિસ્તાનના કેપ્ટન તરીકે આંતરરાષ્ટ્રીય ક્રિકેટમાં સૌથી વધુ રન બનાવવાનો રેકોર્ડ પૂર્વ કેપ્ટન મિસ્બાહ ઉલ હકના નામે છે.મિસ્બાહે પાકિસ્તાનની કેપ્ટનશિપ દરમિયાન 151 મેચમાં કુલ 7392 રન બનાવ્યા હતા.હવે બાબર આઝમ આ યાદીમાં બીજા સ્થાને છે. તેણે કેપ્ટન તરીકે 152 મેચમાં 7029 રન બનાવ્યા છે. મિસ્બાહનો રેકોર્ડ તોડવા માટે બાબરને હજુ 364 રનની જરૂર છે. જો બાબર આગામી મેચોમાં આ અંતર પૂરું કરવામાં સફળ રહેશે તો તે પાકિસ્તાનના કેપ્ટન તરીકે સૌથી વધુ આંતરરાષ્ટ્રીય રન બનાવનાર ખેલાડી બની શકે છે.
ટેસ્ટ સીરિઝમાં બાબરનું પ્રદર્શન કેવું રહ્યું?
ઈંગ્લેન્ડ સામે ચાલી રહેલી ટેસ્ટ સીરિઝમાં બાબર આઝમનું પ્રદર્શન ખાસ રહ્યું નથી.ઈજાના કારણે તે સીરિઝની પ્રથમ ટેસ્ટ મેચમાં રમી શક્યો નહોતો.ત્યારબાદ લોર્ડ્સમાં રમાયેલી બીજી ટેસ્ટમાં પણ બાબર બેટિંગમાં નિષ્ફળ રહ્યો હતો.તેણે પ્રથમ ઇનિંગ્સમાં માત્ર 8 રન અને બીજી ઇનિંગ્સમાં 6 રન બનાવ્યા હતા.ત્રીજી ટેસ્ટની પ્રથમ ઇનિંગ્સમાં પણ તે માત્ર 7 રન બનાવીને પેવેલિયન પરત ફર્યો હતો.જોકે, બીજી ઇનિંગ્સમાં બાબરે 76 રન બનાવીને ટીમને સંભાળવાનો પ્રયાસ કર્યો હતો.તેમ છતાં તે સદીથી દૂર રહી ગયો.ટેસ્ટ ક્રિકેટમાં બાબર લાંબા સમયથી મોટી ઇનિંગ્સની રાહ જોઈ રહ્યો છે.તેની છેલ્લી ટેસ્ટ સદી પણ લાંબા સમય પહેલાં આવી હતી.
ઈંગ્લેન્ડને મળી 320 રનની સરસાઈ
એજબેસ્ટન ટેસ્ટમાં પાકિસ્તાનની પ્રથમ ઇનિંગ્સ માત્ર 133 રનમાં સમેટાઈ ગઈ હતી.તેના જવાબમાં ઈંગ્લેન્ડે શાનદાર બેટિંગ કરતા 453 રન બનાવ્યા હતા.આ રીતે ઈંગ્લેન્ડે પ્રથમ ઇનિંગ્સના આધારે પાકિસ્તાન સામે 320 રનની મોટી સરસાઈ મેળવી હતી.ત્યારબાદ પાકિસ્તાને બીજી ઇનિંગ્સમાં વાપસી કરવાનો પ્રયાસ કર્યો હતો.3 મેચની આ ટેસ્ટ શ્રેણીમાં ઈંગ્લેન્ડ પહેલેથી જ 2-0ની અજેય સરસાઈ મેળવી ચૂક્યું છે.હવે પાકિસ્તાન સામે સીરિઝ ગુમાવવાથી બચવા માટે અંતિમ ટેસ્ટમાં મોટો પડકાર છે.બીજી તરફ બાબર આઝમની 76 રનની ઇનિંગ્સે વ્યક્તિગત રીતે તેને એક મોટી સિદ્ધિ અપાવી છે,પરંતુ તેની નજર હવે ટેસ્ટ ક્રિકેટમાં મોટી સદી ફટકારીને ફોર્મમાં વાપસી કરવા પર રહેશે.
આ પણ વાંચો - IND vs AFG : સિરીઝ પહેલા ટીમ ઈન્ડિયાને મોટો ઝટકો,આ સ્ટાર ખેલાડી થયો ઈજાગ્રસ્ત
