પાકિસ્તાન ક્રિકેટ ટીમમાં ખેલાડીઓની પસંદગીને લઈને ફરી એકવાર વિવાદ ઊભો થયો છે.શ્રીલંકા સામેની ટેસ્ટ સીરિઝ શરૂ થાય તે પહેલાં જ ટીમમાં કરવામાં આવેલા ફેરફારોને લઈને સવાલો ઊઠી રહ્યા છે. આ દરમિયાન પાકિસ્તાનના કેપ્ટન બાબર આઝમે મોટું નિવેદન આપ્યું છે. તેણે સ્પષ્ટ શબ્દોમાં કહ્યું છે કે ટીમમાં કોને પસંદ કરવા અને કોને બહાર રાખવા તે તેના હાથમાં નથી. પસંદગીકારો અને કોચિંગ સ્ટાફ જે ખેલાડીઓની ટીમ સોંપે છે, તેમની પાસેથી શ્રેષ્ઠ પ્રદર્શન કરાવવાની જવાબદારી તેની છે.
પ્રથમ ટેસ્ટ મેચ પહેલા બાબરનું મોટું નિવેદન
રાવલપિંડીમાં પ્રથમ ટેસ્ટ મેચના એક દિવસ પહેલાં મીડિયા સાથે વાતચીત દરમિયાન બાબર આઝમે ટીમની પસંદગી અંગે પોતાની ભૂમિકા સ્પષ્ટ કરી હતી. તેણે જણાવ્યું હતું કે તે ખેલાડીઓની પસંદગીને લઈને પોતાનો અભિપ્રાય જરૂર આપે છે, પરંતુ અંતિમ નિર્ણય પસંદગીકારો અને કોચિંગ સ્ટાફ લે છે.બાબરે કહ્યું કે તેને જે 15 ખેલાડીઓની ટીમ સોંપવામાં આવી છે, તેમની પાસેથી શ્રેષ્ઠ પ્રદર્શન કરાવવાનું તેનું કામ છે. ખેલાડીઓને પસંદ કરવા કે ટીમમાંથી બહાર કરવાનો નિર્ણય તેના હાથમાં નથી. પસંદગીકારો અને કોચે ટીમ તૈયાર કરી છે અને હવે તેની જવાબદારી ખેલાડીઓને મેચ માટે તૈયાર કરવાની તથા જીત અપાવે તેવું પ્રદર્શન કરાવવાની છે.તેણે વધુમાં જણાવ્યું કે તે પોતાની ભૂમિકા અંગે ખુલ્લેઆમ વાત કરે છે અને પોતાનો અભિપ્રાય પણ આપે છે. ત્યારબાદ પસંદગીકારો અને કોચ પોતાનું કામ કરે છે. જોકે, ટીમની પસંદગીમાં તેની ભૂમિકા કેટલી છે અને કયા નિર્ણયો પર તેનો અધિકાર નથી, તે અંગે તે જાહેરમાં વધારે વિગતો આપી શકે તેમ નથી.
શ્રીલંકા સામેની સીરિઝ પહેલાં પાકિસ્તાન ટીમમાં ફરી ફેરફાર
શ્રીલંકા સામેની ટેસ્ટ સીરિઝ પહેલાં પાકિસ્તાનની ટીમમાં કરવામાં આવેલા ફેરફારો પણ ચર્ચાનો વિષય બન્યા છે. ખાસ વાત એ છે કે સતત બીજી ટેસ્ટ સીરિઝમાં ટીમ જાહેર થયા બાદ તેમાં ફેરફાર કરવામાં આવ્યા છે.પ્રથમ ટેસ્ટ શરૂ થવાના 48 કલાકથી પણ ઓછા સમય પહેલાં અબ્દુલ્લા ફઝલ અને અલી ઉસ્માનને ટીમમાંથી બહાર કરવામાં આવ્યા હતા. જ્યારે તેમની જગ્યાએ 4 નવા ખેલાડીઓને ટીમમાં સ્થાન આપવામાં આવ્યું હતું. આ ચાર ખેલાડીઓમાંથી ત્રણ ખેલાડીઓએ હજુ સુધી ટેસ્ટ ક્રિકેટમાં પદાર્પણ પણ કર્યું નથી.આટલા ઓછા સમયમાં ટીમમાં થયેલા ફેરફારને કારણે પાકિસ્તાન ક્રિકેટ બોર્ડની પસંદગી પ્રક્રિયા સામે સવાલો ઊભા થયા છે.
પાકિસ્તાનની ટીમમાં યુવા ખેલાડીઓને વધુ તક
આ પહેલાં ઇંગ્લેન્ડ સામેની ત્રીજી ટેસ્ટ મેચ પહેલાં પણ પાકિસ્તાને અચાનક 7 ખેલાડીઓને ટીમમાંથી બહાર કર્યા હતા અને તેમની જગ્યાએ 7 નવા ખેલાડીઓને સ્થાન આપ્યું હતું. તે સમયે મુખ્ય કોચ અને બોલિંગ કોચને પણ તેમના પદ પરથી હટાવવામાં આવ્યા હતા.જોકે, બાબર આઝમે ટીમમાં યુવા ખેલાડીઓને તક આપવાના નિર્ણયનો બચાવ કર્યો છે. તેના મતે પાકિસ્તાનની ટીમ હાલમાં અનુભવી અને યુવા ખેલાડીઓ વચ્ચે યોગ્ય સંતુલન બનાવવાનો પ્રયાસ કરી રહી છે.બાબરે કહ્યું કે પાકિસ્તાનની ટીમ અત્યારે ઘણી યુવા છે. સિનિયર અને જુનિયર ખેલાડીઓનું યોગ્ય સંયોજન તૈયાર કરવાનો પ્રયાસ કરવામાં આવ્યો છે.આમ, પાકિસ્તાન ક્રિકેટમાં ટીમની પસંદગી અને વારંવાર થતા ફેરફારો વચ્ચે બાબર આઝમે પોતાની જવાબદારી સ્પષ્ટ કરી દીધી છે. હવે જોવાનું રહેશે કે શ્રીલંકા સામેની ટેસ્ટ સીરિઝમાં યુવા અને અનુભવી ખેલાડીઓનું આ સંયોજન કેવું પ્રદર્શન કરે છે.
આ પણ વાંચો - NZ-A vs IND-A, unofficial Test : તિલક-વોશિંગ્ટન વચ્ચે અણનમ સદીની ભાગીદારી, ન્યૂઝીલેન્ડ-A સામે ભારત મજબૂત સ્થિતિમાં
