ભારત અને ઓસ્ટ્રેલિયા વચ્ચે ક્રિકેટના સંબંધોને વધુ મજબૂત બનાવવા માટે અમ્પાયર એક્સચેન્જ કાર્યક્રમ હાથ ધરવામાં આવ્યો છે.આ કાર્યક્રમ હેઠળ ઓસ્ટ્રેલિયાના અમ્પાયર બેન ટ્રેલોર ભારતની રણજી ટ્રોફીની 2 મેચમાં અમ્પાયરિંગ કરશે. બીજી તરફ, ભારતીય અમ્પાયર પ્રશાંત જોશી ઓસ્ટ્રેલિયાની સ્થાનિક ક્રિકેટ સ્પર્ધાઓમાં અમ્પાયરિંગની જવાબદારી સંભાળશે.આ પહેલથી બંને દેશના અમ્પાયરોને અલગ-અલગ પરિસ્થિતિમાં કામ કરવાનો અનુભવ મળશે. સાથે જ આંતરરાષ્ટ્રીય સ્તરે મેચ અધિકારીઓની કુશળતા અને અનુભવ વધારવામાં પણ મદદ મળશે.
કોણ છે બેન ટ્રેલોર?
ઓસ્ટ્રેલિયાના અમ્પાયર બેન ટ્રેલોરને વિવિધ સ્તરની ક્રિકેટ મેચોમાં અમ્પાયરિંગનો સારો અનુભવ છે. તેમણે ફર્સ્ટ ક્લાસ ક્રિકેટની 30 મેચ, લિસ્ટ A ક્રિકેટની 20 મેચ અને બિગ બેશ લીગની 39 મેચમાં અમ્પાયરિંગ કર્યું છે.આ ઉપરાંત, તેમણે મહિલા વનડે આંતરરાષ્ટ્રીય ક્રિકેટની 2 અને મહિલા T20 આંતરરાષ્ટ્રીય ક્રિકેટની 4 મેચમાં પણ અમ્પાયર તરીકે કામગીરી કરી છે.અમ્પાયરિંગની સાથે ટ્રેલોર ક્રિકેટ ન્યૂ સાઉથ વેલ્સમાં અમ્પાયર એજ્યુકેશન ઓફિસર તરીકે પણ કામ કરે છે. તેમની જવાબદારી નવા મેચ અધિકારીઓને તાલીમ આપવાની અને તેમની કુશળતા વિકસાવવાની છે. અમ્પાયર શિક્ષણ ક્ષેત્રે તેમના યોગદાન બદલ તેમને ન્યૂ સાઉથ વેલ્સ ક્રિકેટ અમ્પાયર્સ એન્ડ સ્કોરર્સ એસોસિએશન તરફથી 4 જ્યોર્જ બોરવિક મેમોરિયલ એવોર્ડ મળ્યા છે.
રણજી ટ્રોફીની કઈ મેચોમાં કરશે અમ્પાયરિંગ?
બેન ટ્રેલોરનો ભારતમાં પ્રથમ કાર્યભાર દિલ્હી અને ગુજરાત વચ્ચેની રણજી ટ્રોફી મેચ હશે. આ મેચ 18થી 21 ઓક્ટોબર દરમિયાન દિલ્હીમાં રમાવાની છે.ત્યાર બાદ તેઓ મુંબઈમાં મુંબઈ અને હરિયાણા વચ્ચે 26થી 29 ઓક્ટોબર દરમિયાન રમાનારી મેચમાં અમ્પાયરિંગ કરશે. આ રીતે ટ્રેલોરને ભારતની સ્થાનિક ફર્સ્ટ ક્લાસ ક્રિકેટની પરિસ્થિતિઓમાં કામ કરવાનો અનુભવ મળશે.
કોણ છે ભારતીય અમ્પાયર પ્રશાંત જોશી?
ભારતીય અમ્પાયર પ્રશાંત જોશીને પણ સ્થાનિક ક્રિકેટમાં લાંબો અનુભવ છે. તેમણે રણજી ટ્રોફી અને દુલીપ ટ્રોફી સહિતની સ્પર્ધાઓમાં ફર્સ્ટ ક્લાસ ક્રિકેટની 19 મેચમાં અમ્પાયરિંગ કર્યું છે.આ ઉપરાંત, વિજય હજારે ટ્રોફી અને દેવધર ટ્રોફીમાં લિસ્ટ A ક્રિકેટની 32 મેચ તથા 40 T20 મેચમાં અમ્પાયર તરીકે કામગીરી કરી છે.તેમના T20 અનુભવમાં ઇન્ડિયન પ્રીમિયર લીગ અને સૈયદ મુશ્તાક અલી ટ્રોફીની મેચોનો પણ સમાવેશ થાય છે.
ઓસ્ટ્રેલિયામાં પ્રશાંત જોશીનો કાર્યક્રમ
પ્રશાંત જોશીનો ઓસ્ટ્રેલિયા પ્રવાસ 11થી 14 નવેમ્બર દરમિયાન બ્રિસ્બેનના ગાબા મેદાન પર ક્વીન્સલેન્ડ અને તાસ્માનિયા વચ્ચે રમાનારી શેફિલ્ડ શીલ્ડ મેચથી શરૂ થશે.ત્યાર બાદ 16 નવેમ્બરે તેઓ આ જ મેદાન પર બંને ટીમો વચ્ચેની વનડે કપ મેચમાં અમ્પાયરિંગ કરશે. તેમનો પ્રવાસ 22થી 25 નવેમ્બર દરમિયાન સિડની ક્રિકેટ ગ્રાઉન્ડ પર ન્યૂ સાઉથ વેલ્સ અને ક્વીન્સલેન્ડ વચ્ચે રમાનારી શેફિલ્ડ શીલ્ડ મેચ સાથે પૂર્ણ થશે.ભારત અને ઓસ્ટ્રેલિયા વચ્ચેનો આ અમ્પાયર એક્સચેન્જ કાર્યક્રમ બંને દેશના મેચ અધિકારીઓને નવી પરિસ્થિતિઓમાં અનુભવ મેળવવાની તક આપશે. સ્થાનિક ક્રિકેટમાં આવી પહેલથી અમ્પાયરિંગના ધોરણો સુધારવામાં અને બંને દેશ વચ્ચે ક્રિકેટ સંબંધોને વધુ મજબૂત બનાવવામાં મદદ મળી શકે છે.
આ પણ વાંચો - Shafali Vermaની એક ભૂલ પડી ભારે ! ICCએ ફટકારી આકરી સજા
