IPL 2027 પહેલાં પાંચ વખતની ચેમ્પિયન મુંબઈ ઈન્ડિયન્સે પોતાની કોચિંગ ટીમમાં મોટો ફેરફાર કર્યો છે. ટીમે શ્રીલંકાના દિગ્ગજ ફાસ્ટ બોલર લસિથ મલિંગા, ભારતના પૂર્વ બોલર અને કોચ પારસ મ્હામ્બ્રે તથા ફિલ્ડિંગ કોચ કાર્લ હોપકિન્સન સાથેનો સંબંધ પૂરો કર્યો છે. આ ત્રણેય હવે મુંબઈ ઈન્ડિયન્સની પુરુષ ટીમના કોચિંગ સ્ટાફનો ભાગ નહીં રહે. ફ્રેન્ચાઇઝીએ ગુરુવારે આ વિદાયની જાહેરાત કરતાં ત્રણેયના યોગદાન બદલ આભાર માન્યો હતો અને તેમની આગામી સફર માટે શુભેચ્છા પાઠવી હતી. જોકે, ત્રણેયના સ્થાને કોણ આવશે તેની જાહેરાત હજુ કરવામાં આવી નથી.
https://x.com/mipaltan/status/2115738406596813144?a=jYS9YZE9cw09gYT3_cU&s=20
પોલાર્ડના હાથમાં ટીમની કમાન
મુંબઈ ઈન્ડિયન્સમાં આ ફેરફારની શરૂઆત મુખ્ય કોચ માહેલા જયવર્દનેની વિદાયથી થઈ હતી. IPL 2027 માટે ટીમે વેસ્ટ ઈન્ડિઝના પૂર્વ ઓલરાઉન્ડર કિરોન પોલાર્ડને નવો હેડ કોચ બનાવ્યો છે. પોલાર્ડ અગાઉ ટીમના બેટિંગ કોચ તરીકે કામ કરતા હતા. હવે તેમના નેતૃત્વમાં ટીમના કોચિંગ સ્ટાફને નવેસરથી ગોઠવવામાં આવી રહ્યો છે. મલિંગા, મ્હામ્બ્રે અને હોપકિન્સનની વિદાયથી સ્પષ્ટ થાય છે કે મુંબઈ ઈન્ડિયન્સમાં ફેરફાર માત્ર હેડ કોચ સુધી સીમિત નથી. ટીમ આગામી સિઝન પહેલાં પોતાની સપોર્ટ સ્ટાફની રચનાને નવેસરથી તૈયાર કરવા માગે છે.
મલિંગાની મુંબઈ સાથેની લાંબી સફર પૂરી
લસિથ મલિંગા મુંબઈ ઈન્ડિયન્સના ઇતિહાસના સૌથી યાદગાર ખેલાડીઓમાંના એક રહ્યા છે. તેમના શાનદાર યોર્કર અને ડેથ ઓવર્સમાં બોલિંગ કરવાની ક્ષમતાએ ટીમને અનેક મહત્વપૂર્ણ જીત અપાવવામાં મદદ કરી હતી. મુંબઈએ જીતેલા ચાર IPL ખિતાબ દરમિયાન મલિંગાએ બોલિંગ આક્રમણમાં મહત્ત્વની ભૂમિકા ભજવી હતી. 2011માં ચેમ્પિયન્સ લીગ T20 જીતનાર ટીમનો પણ તેઓ ભાગ હતા. ખેલાડી તરીકે નિવૃત્તિ બાદ મલિંગા માર્ગદર્શક અને કોચ તરીકે મુંબઈ સાથે ફરી જોડાયા હતા. IPL 2024 પહેલાં તેઓ ફાસ્ટ બોલિંગ કોચ તરીકે ટીમમાં પાછા ફર્યા હતા. હવે તેમની આ લાંબી સફરનો અંત આવ્યો છે.
https://x.com/mipaltan/status/2115741968336904352?a=1RUoLRw8qqfwwh2iU6o&s=20
મ્હામ્બ્રે અને હોપકિન્સનની પણ વિદાય
પારસ મ્હામ્બ્રેનો મુંબઈ ઈન્ડિયન્સ સાથેનો સંબંધ પણ લાંબો રહ્યો છે. તેઓ 2010થી 2017 દરમિયાન ટીમ સાથે જોડાયેલા હતા અને ત્યારબાદ ફરી કોચિંગ સેટઅપમાં આવ્યા હતા. ભારતીય ટીમના બોલિંગ કોચ તરીકે પણ તેમણે નવેમ્બર 2021થી જુલાઈ 2024 સુધી જવાબદારી સંભાળી હતી. આ સમયગાળામાં ભારતે 2024નો T20 વર્લ્ડ કપ જીત્યો હતો. બીજી તરફ, કાર્લ હોપકિન્સન IPL 2025 પહેલાં મુંબઈ ઈન્ડિયન્સ સાથે જોડાયા હતા. ઇંગ્લેન્ડની પુરુષ ટીમ સાથે કામ કરવાનો અનુભવ ધરાવતા હોપકિન્સન મુંબઈમાં ફિલ્ડિંગ કોચની જવાબદારી સંભાળતા હતા.
https://x.com/mipaltan/status/2115749584366633334?a=IPz_iWdK7VIWfrWxBfE&s=20
મુંબઈ ઈન્ડિયન્સે 2026ની IPL સિઝન દસ ટીમોમાં નવમા સ્થાને પૂરી કરી હતી. હવે પોલાર્ડની આગેવાની હેઠળ ટીમ નવા કોચિંગ સેટઅપ સાથે આગામી સિઝનમાં વાપસી કરવાનો પ્રયાસ કરશે. જોકે, નવા કોચિંગ સ્ટાફની રચના અને ત્રણેયના સ્થાને કોને જવાબદારી સોંપાશે તે અંગેની જાહેરાતની રાહ જોવાઈ રહી છે.
આ પણ વાંચો: WPL 2027 Auction: 15 વર્ષની ઉંમરે જ ચમકી ગયું આ ખેલાડીનું નસીબ, હરાજીમાં સૌથી નાની ખેલાડી બની
