ભારતીય ક્રિકેટ ટીમના ચીફ સિલેક્ટર બનવાની રેસમાં પાર્થિવ પટેલનું નામ ચર્ચામાં હતું, પરંતુ તેમણે આ પદ માટે અરજી કરી નહોતી. હવે સામે આવેલા અહેવાલ મુજબ, તેની પાછળનું મુખ્ય કારણ આર્થિક ગણતરી હતી. ચીફ સિલેક્ટર તરીકે વાર્ષિક આશરે ₹3 કરોડનું મહેનતાણું મળતું હોવાની ચર્ચા છે, પરંતુ આ જવાબદારી સ્વીકારવા માટે પાર્થિવે IPLમાં ગુજરાત ટાઇટન્સ સાથેની પોતાની ભૂમિકા અને ટીવી કોમેન્ટ્રીનાં કામ પર અસર થવાની શક્યતા ધ્યાનમાં લીધી હતી. પૂર્વ ભારતીય વિકેટકીપર-બેટર પાર્થિવ પટેલ હાલમાં IPLમાં ગુજરાત ટાઇટન્સના આસિસ્ટન્ટ કોચ અને બેટિંગ કોચ તરીકે કામ કરે છે. આ ઉપરાંત તેઓ ટીવી કોમેન્ટ્રી પણ કરે છે. અહેવાલ મુજબ, ચીફ સિલેક્ટર બનવા માટે આ કામ છોડવાં પડે તો તેમની આવકમાં નોંધપાત્ર ઘટાડો થઈ શકે તેમ હતો.
₹3 કરોડનું વાર્ષિક મહેનતાણું, છતાં કેમ ન કરી અરજી?
BCCIના ચીફ સિલેક્ટરનું વાર્ષિક મહેનતાણું આશરે ₹3 કરોડ હોવાનું અહેવાલમાં જણાવાયું છે. જોકે, પાર્થિવ માટે આ પદ સ્વીકારવાનો અર્થ માત્ર નવી જવાબદારી લેવાનો નહોતો. તેમને ગુજરાત ટાઇટન્સ સાથેની કોચિંગની ભૂમિકા અને કોમેન્ટ્રીમાંથી મળતી આવકનો પણ વિચાર કરવો પડ્યો હતો. આ બંને કામ છોડવા પડે તો થનારા આર્થિક નુકસાનને ધ્યાનમાં રાખીને પાર્થિવે પસંદગી પ્રક્રિયામાં ભાગ ન લેવાનો નિર્ણય કર્યો હતો.
₹3 કરોડની સેલરી સામે ₹7થી ₹9 કરોડની આવક!
અહેવાલો મુજબ, પાર્થિવ પટેલ ગુજરાત ટાઇટન્સમાં આસિસ્ટન્ટ કોચ અને બેટિંગ કોચ તરીકે કામ કરવા ઉપરાંત ટીવી કોમેન્ટ્રી પણ કરે છે. આ બંને કામમાંથી તેમની વાર્ષિક આવક આશરે ₹7થી ₹9 કરોડ હોવાનો અંદાજ છે. બીજી તરફ, BCCIના ચીફ સિલેક્ટર પદ માટે વાર્ષિક આશરે ₹3 કરોડનું મહેનતાણું મળતું હોવાનું કહેવાય છે. ચીફ સિલેક્ટર બનવા માટે પાર્થિવે ગુજરાત ટાઇટન્સ સાથેની કોચિંગની જવાબદારી અને કોમેન્ટ્રીનાં કામ છોડવાં પડે તેવી શક્યતા હતી. એટલે આ પદ સ્વીકારવાથી તેમને હાલની આવકની સરખામણીમાં મોટું આર્થિક નુકસાન થઈ શકે તેમ હતું. આ જ કારણસર તેમણે ચીફ સિલેક્ટર પદ માટે અરજી ન કરી હોવાનું કહેવાય છે.
અજિત અગરકરની જગ્યા માટે પાર્થિવનું નામ ચર્ચામાં હતું
અજિત અગરકરનો ચીફ સિલેક્ટર તરીકેનો કાર્યકાળ 4 ઓક્ટોબરે પૂરો થયો હતો. ત્યારબાદ BCCIએ પસંદગી સમિતિમાં ખાલી પડેલી જગ્યા ભરવા માટે અરજીઓ મંગાવી હતી. પાર્થિવ પટેલને પશ્ચિમ ઝોનના પ્રતિનિધિ તરીકે અગરકરનું સ્થાન લેવા માટેના સંભવિત ઉમેદવાર માનવામાં આવતા હતા. પરંતુ 14 ઓક્ટોબરે અરજી કરવાની અંતિમ સમયમર્યાદા પૂરી થઈ ત્યાં સુધી પાર્થિવે અરજી કરી નહોતી. તેના કારણે પસંદગી સમિતિમાં નવા સભ્યની નિમણૂક માટે બીજા નામો પર વિચારણા શરૂ થઈ હતી.
પ્રજ્ઞાન ઓઝા ચીફ સિલેક્ટર બન્યા, રમેશ પવારને પણ સ્થાન
BCCIએ હવે પૂર્વ ભારતીય સ્પિનર પ્રજ્ઞાન ઓઝાને ભારતીય પુરુષ ક્રિકેટ ટીમની પસંદગી સમિતિના ચેરમેન તરીકે નિયુક્ત કર્યા છે. ઓઝા અજિત અગરકરનો કાર્યકાળ પૂરો થયા બાદ વચગાળાના ચેરમેન તરીકે જવાબદારી સંભાળી રહ્યા હતા. આ સાથે પૂર્વ ભારતીય સ્પિનર રમેશ પવારને પશ્ચિમ ઝોનના પ્રતિનિધિ તરીકે પસંદગી સમિતિમાં સ્થાન મળ્યું છે. આમ, પાર્થિવ પટેલે અરજી ન કરવાનો નિર્ણય લીધા બાદ પસંદગી સમિતિમાં નવી નિમણૂકોનો રસ્તો ખુલ્યો.
આ પણ વાંચો: Chief Selector: ટીમ ઈન્ડિયાને મળ્યા નવા ચીફ સિલેક્ટર, રમેશ પવારની પણ પસંદગી સમિતિમાં એન્ટ્રી
