ક્રિકેટના મેદાન પર ક્યારેક એવા અજીબોગરીબ નજારા જોવા મળે છે જે જોઈને સૌ કોઈ દંગ રહી જાય છે. ભારત અને ન્યૂઝીલેન્ડ વચ્ચે વેલિંગટનમાં રમાયેલી ત્રીજી ટી-20 મેચમાં કંઈક આવું જ થયું. ભારતીય ઓપનર અભિષેક શર્માની બેટિંગ એટલી બધી વિસ્ફોટક અને આંધી જેવી હતી કે મેદાન પર ઊભેલા અમ્પાયરો પણ ઓવરના બોલ ગણવાનું ભૂલી ગયા! આ અનોખી ઘટના સોશિયલ મીડિયા પર આગની જેમ વાયરલ થઈ રહી છે.
બન્યું એવું કે મેચની આઠમી ઓવરમાં ન્યૂઝીલેન્ડના બોલર મેથ્યુ ફિશર બોલિંગ કરી રહ્યા હતા. સામે ક્રીઝ પર અભિષેક શર્મા પોતાની ઘાતક બેટિંગથી ચોગ્ગા-છગ્ગાનો વરસાદ કરી રહ્યો હતો. અભિષેકના આ તોફાની પ્રહાર અને રનની અતિશય ઝડપ જોઈને અમ્પાયરો એટલા દબાઈ ગયા કે ઓવરમાં કેટલા લીગલ બોલ ફેંકાયા તે તેઓ ભૂલી ગયા! માત્ર 5 બોલ પૂરા થયા બાદ અમ્પાયરો મૂંઝવણમાં મુકાઈ ગયા અને છઠ્ઠો બોલ નાખતા પહેલાં તેમણે થર્ડ અમ્પાયરની મદદ લેવી પડી હતી, જે ક્રિકેટ જગતમાં ચર્ચાનો મોટો વિષય બન્યો છે.