ઈંગ્લેન્ડ સામેની 3 મેચની ટેસ્ટ સીરિઝ માં પાકિસ્તાનનો 0-3થી સફાયો થયો છે.સીરિઝની ત્રીજી અને અંતિમ ટેસ્ટમાં ઈંગ્લેન્ડે પાકિસ્તાનને 8 વિકેટે હરાવીને શ્રેણી પોતાના નામે કરી હતી. સમગ્ર પ્રવાસ દરમિયાન પાકિસ્તાની ટીમનું પ્રદર્શન અપેક્ષા મુજબ રહ્યું નહોતું. હવે આ ખરાબ પ્રદર્શનની અસર ICC ટેસ્ટ રેન્કિંગમાં પણ જોવા મળી છે.ઈંગ્લેન્ડ સામેની ટેસ્ટ સીરિઝ પૂરી થયા બાદ ICC ટેસ્ટ રેન્કિંગમાં થયેલા નવા અપડેટમાં પાકિસ્તાનને એક સ્થાનનું નુકસાન થયું છે. ટીમ હવે 8મા સ્થાનેથી સરકીને 9મા સ્થાને પહોંચી ગઈ છે. બીજી તરફ ઈંગ્લેન્ડે પોતાની 5મા સ્થાનની સ્થિતિ જાળવી રાખી છે અને તેના રેટિંગ પોઈન્ટમાં વધારો થયો છે.
પાકિસ્તાનના રેટિંગ પોઈન્ટમાં ઘટાડો
ઈંગ્લેન્ડ સામેની શ્રેણી શરૂ થાય તે પહેલાં પાકિસ્તાનની ટીમ ટેસ્ટ રેન્કિંગમાં 8મા સ્થાને હતી. તેના ખાતામાં 75 રેટિંગ પોઈન્ટ હતા. પરંતુ શ્રેણીમાં એક પણ મેચ જીતી ન શકતાં ટીમને નુકસાન થયું છે.હવે પાકિસ્તાન 71 રેટિંગ પોઈન્ટ સાથે 9મા સ્થાને છે. બીજી તરફ ઈંગ્લેન્ડના રેટિંગ પોઈન્ટમાં વધારો થયો છે. શ્રેણી પહેલાં ઈંગ્લેન્ડ પાસે 99 રેટિંગ પોઈન્ટ હતા, જે હવે વધીને 102 થઈ ગયા છે.પાકિસ્તાન માટે આ સ્થિતિ ચિંતાજનક છે, કારણ કે ઈંગ્લેન્ડ પ્રવાસ દરમિયાન ટીમમાં અનેક ફેરફાર કરવામાં આવ્યા છતાં પરિણામમાં ખાસ સુધારો જોવા મળ્યો નહોતો. પ્રવાસની વચ્ચે જ પાકિસ્તાનના સ્ક્વોડમાંથી 7 ખેલાડીઓને બહાર કરવામાં આવ્યા હતા અને નવા ખેલાડીઓને તક આપવામાં આવી હતી.