ભારત અને ન્યૂઝીલેન્ડ વચ્ચે હવે ટેસ્ટ ક્રિકેટનો રોમાંચ શરૂ થવા જઈ રહ્યો છે. બંને ટીમો વચ્ચે 2 ટેસ્ટ મેચની સિરીઝનો પ્રથમ મુકાબલો 19 નવેમ્બરથી વેલિંગ્ટનમાં રમાવાનો છે. આ મહત્વપૂર્ણ સિરીઝ પહેલાં ભારતીય કેપ્ટન શુભમન ગિલે ટીમની રણનીતિ અંગે મોટો ખુલાસો કર્યો છે. ગિલના જણાવ્યા પ્રમાણે, ભારતીય ટીમ ન્યૂઝીલેન્ડ સામેની પ્રથમ ટેસ્ટમાં 4 ઝડપી બોલરો સાથે મેદાનમાં ઉતરી શકે છે. આ ઉપરાંત તેણે વિકેટકીપર બેટ્સમેન ઋષભ પંતની ફિટનેસ અંગે પણ મહત્ત્વની માહિતી આપી છે.

4 ઝડપી બોલરો સાથે રમશે ટીમ ઈન્ડિયા

ન્યૂઝીલેન્ડની પરિસ્થિતિમાં ભારતીય ટીમનું પ્લેઇંગ કોમ્બિનેશન કેવું હશે તેના પર તમામની નજર હતી. હવે શુભમન ગિલે પ્રેસ કોન્ફરન્સમાં સ્પષ્ટ કર્યું છે કે ટીમ મેનેજમેન્ટ 4 ઝડપી બોલરો સાથે રમવાની યોજના બનાવી રહ્યું છે.ગિલે કહ્યું કે ટીમના તમામ ઝડપી બોલરોએ અત્યાર સુધી સારું પ્રદર્શન કર્યું છે. આવી સ્થિતિમાં કોને પ્લેઇંગ-11માં સામેલ કરવા તે પસંદગીકારો અને ટીમ મેનેજમેન્ટ માટે પડકાર બની શકે છે.ગિલે વધુમાં જણાવ્યું કે પિચ પર શરૂઆતમાં ઝડપી બોલરોને મદદ મળી શકે છે, પરંતુ ત્રીજા દિવસ બાદ પિચ સપાટ થઈ જાય છે. તેથી ભારતીય ટીમને એવા બોલરોની જરૂર છે, જેઓ પિચમાંથી ઉછાળો મેળવી શકે.તેણે કહ્યું, અમે 4 ઝડપી બોલરો સાથે મેદાનમાં ઉતરીશું. જોકે, હજુ એ નક્કી થયું નથી કે કયા ચાર બોલરો રમશે. અમારા તમામ ઝડપી બોલરોએ સારું પ્રદર્શન કર્યું છે અને પસંદગીની આવી મુશ્કેલી હંમેશાં સારી હોય છે.

કુલદીપ યાદવની જગ્યાએ ગુરનૂર બ્રારને તક

ન્યૂઝીલેન્ડની પરિસ્થિતિ અને ઝડપી બોલરોને મળતી મદદને ધ્યાનમાં રાખીને ભારતીય ટીમમાં ફેરફાર પણ કરવામાં આવ્યો છે. અગાઉ ટેસ્ટ ટીમમાં સામેલ કુલદીપ યાદવને બહાર કરીને તેની જગ્યાએ ગુરનૂર બ્રારને સામેલ કરવામાં આવ્યો છે.ગુરનૂર બ્રારે વનડે સિરીઝમાં પોતાની બોલિંગથી પ્રભાવિત કર્યા હતા. તેના પ્રદર્શનને ધ્યાનમાં રાખીને તેને ટેસ્ટ ટીમમાં સ્થાન આપવામાં આવ્યું છે.બીજી તરફ કુલદીપ યાદવને સૈયદ મુશ્તાક અલી ટ્રોફીમાં રમવા માટે ટીમમાંથી રિલીઝ કરવામાં આવ્યો છે. હવે જોવાનું એ રહેશે કે ભારતીય ટીમ ચાર ઝડપી બોલરો સાથે કયા બોલિંગ કોમ્બિનેશનને પસંદ કરે છે.

https://x.com/CricketCentrl/status/2122533773187440756?s=20


ઋષભ પંતની ફિટનેસ અંગે ગિલે આપ્યું મોટું અપડેટ

પ્રથમ ટેસ્ટ પહેલાં ઋષભ પંતની ફિટનેસ પણ ચર્ચાનો વિષય બની હતી. ઈજાના કારણે તે ભારત Aની મેચોમાં રમી શક્યો નહોતો. જોકે, ટેસ્ટ સિરીઝ પહેલાં તેને ફિટ જાહેર કરવામાં આવ્યો છે.હવે સવાલ એ હતો કે પંતને સીધો પ્લેઇંગ-11માં સ્થાન મળશે કે પછી તેને એક મેચ માટે આરામ આપવામાં આવશે. આ અંગે શુભમન ગિલે સ્પષ્ટતા કરી છે કે પંતની ફિટનેસને લઈને ટીમમાં કોઈ ચિંતા નથી.ગિલે પંતની પ્રશંસા કરતાં કહ્યું કે તેણે ભારત માટે 50 ટેસ્ટ મેચ રમી છે અને દુનિયાભરમાં રન બનાવ્યા છે. તે એવો વિકેટકીપર છે, જેણે ઓસ્ટ્રેલિયાની ધરતી પર પણ ટેસ્ટ સદી ફટકારી છે.

વર્લ્ડ ટેસ્ટ ચેમ્પિયનશિપ માટે સિરીઝ મહત્ત્વપૂર્ણ

ભારત માટે ન્યૂઝીલેન્ડ સામેની આ ટેસ્ટ સિરીઝ વર્લ્ડ ટેસ્ટ ચેમ્પિયનશિપના દૃષ્ટિકોણથી પણ ખૂબ જ મહત્ત્વપૂર્ણ છે. ટીમ ઈન્ડિયા આ સિરીઝ જીતીને પોતાની સ્થિતિ મજબૂત કરવા ઇચ્છશે.હવે ભારતીય ચાહકોની નજર 19 નવેમ્બરે શરૂ થનારી પ્રથમ ટેસ્ટની પ્લેઇંગ-11 પર રહેશે. ગિલના 4 ઝડપી બોલરો સાથે રમવાના નિવેદન બાદ ટીમમાં કોને તક મળશે તે જોવું રસપ્રદ રહેશે.

આ પણ વાંચો- IPL Schedule Update : ક્રિકેટ ફેન્સ માટે મોટા સમાચાર, IPLના શેડ્યૂલને લઈને તમામ અટકળોનો અંત