ભારત અને ન્યૂઝીલેન્ડ વચ્ચે 5 મેચની વનડે શ્રેણીની શરૂઆત 4 નવેમ્બરના રોજ ઓકલેન્ડમાં થઈ છે. જોકે, શ્રેણીની પ્રથમ મેચમાં જ ટીમ ઈન્ડિયાની જૂની સમસ્યા ફરી જોવા મળી છે. ટી-20 શ્રેણી દરમિયાન બંને ટીમોના ખેલાડીઓએ અનેક આસાન કેચ છોડ્યા હતા. હવે વનડે શ્રેણીની પ્રથમ મેચમાં પણ ભારતીય ફિલ્ડર નમન ધીરે આસાન કેચ છોડીને ન્યૂઝીલેન્ડના બેટરને જીવનદાન આપ્યું છે. આ ભૂલને કારણે બોલર આકિબ નબીની વિકેટ લેવાની મહેનત પર પાણી ફરી વળ્યું હતું.
નમન ધીરે છોડ્યો આસાન કેચ
ઓકલેન્ડના ઈડન પાર્ક સ્ટેડિયમમાં રમાયેલી પ્રથમ વનડેમાં ભારતીય ટીમે ટોસ જીતીને પહેલાં બોલિંગ કરવાનો નિર્ણય લીધો હતો. જસપ્રીત બુમરાહ, મોહમ્મદ સિરાજ અને પ્રસિદ્ધ કૃષ્ણાની ગેરહાજરીમાં ભારતે આકિબ નબી, ગુરનૂર બરાડ અને અંશુલ કંબોજ જેવા બોલરોને તક આપી હતી.આવી સ્થિતિમાં ભારતીય બોલરો માટે દરેક વિકેટ ખૂબ મહત્ત્વની હતી. ટીમ ઈન્ડિયાને શરૂઆતમાં જ વિકેટ લેવાની તક મળી હતી, પરંતુ નમન ધીરની એક ભૂલને કારણે આ તક ગુમાવવી પડી હતી.
https://x.com/CRICBALLY/status/2117812878787108975?a=Ez0lFSbquNz4RZXPM2w&s=20
આકિબ નબીને મળી હતી પહેલી વિકેટ લેવાની તક
આ ઘટના ન્યૂઝીલેન્ડની ઇનિંગ્સની ચોથી ઓવરમાં બની હતી. આકિબ નબી બોલિંગ કરી રહ્યા હતા. ઓવરના ચોથા બોલ પર ન્યૂઝીલેન્ડના ઓપનર ટિમ સેફર્ટે પુલ શોટ રમવાનો પ્રયાસ કર્યો હતો. જોકે, બોલ સાથે યોગ્ય ટાઇમિંગ ન થતાં મિડવિકેટ પર ઊભેલા નમન ધીર તરફ સરળ કેચ ગયો હતો.નમન ધીર પાસે આ કેચ પકડવાની સારી તક હતી, પરંતુ બોલ તેમના હાથમાંથી છટકી ગયો હતો. આ સમયે ટિમ સેફર્ટ માત્ર 7 રન બનાવીને રમી રહ્યા હતા. આ રીતે ભારતીય ટીમને શરૂઆતમાં જ વિકેટ લેવાની તક મળી હતી, જે નમન ધીરની ભૂલને કારણે હાથમાંથી નીકળી ગઈ.
કેચ છોડ્યા બાદ સેફર્ટે ફટકારી સિક્સર
નમન ધીરે કેચ છોડતાં કેપ્ટન શુભમન ગિલ અને ખાસ કરીને બોલર આકિબ નબી નિરાશ થયા હતા. આકિબ નબી માટે આ વિકેટ ખૂબ મહત્ત્વની હતી, કારણ કે અગાઉની મેચમાં પણ તેમને વિકેટ મળી નહોતી અને તેમણે 84 રન આપ્યા હતા.જોકે, ટિમ સેફર્ટે મળેલા જીવનદાનનો પૂરો ફાયદો ઉઠાવ્યો હતો. આ જ ઓવરના છેલ્લા બોલ પર તેણે આકિબ નબીની બોલિંગમાં શાનદાર સિક્સર ફટકારી હતી. ત્યારબાદ નબીની આગામી ઓવરમાં પણ સેફર્ટે 2 ચોગ્ગા ફટકાર્યા હતા.આ રીતે માત્ર એક કેચ છોડવાની ભૂલ ભારતીય ટીમને ભારે પડી હતી. ટી-20 શ્રેણી બાદ વનડેમાં પણ ફિલ્ડિંગની આ નબળાઈ સામે આવતાં ટીમ મેનેજમેન્ટની ચિંતા વધી શકે છે. હવે ભારતીય ખેલાડીઓ આગામી મેચોમાં આવી ભૂલો ટાળીને ફિલ્ડિંગમાં સુધારો કરે તે જરૂરી રહેશે.
આ પણ વાંચો - CSKમાં ધોનીની નવી ભૂમિકા! યુવા બેટર્સને આપશે ખાસ તાલીમ?
