ભારત અને વેસ્ટ ઇન્ડિઝ વચ્ચે રમાઈ રહેલી 5 મેચની રોમાંચક T20 આંતરરાષ્ટ્રીય શ્રેણીનો ચોથો હાઈ-વોલ્ટેજ મુકાબલો આજે હૈદરાબાદના ઐતિહાસિક રાજીવ ગાંધી ઇન્ટરનેશનલ ક્રિકેટ સ્ટેડિયમ ખાતે રમાશે.હાલમાં ભારતીય ટીમ શ્રેણીમાં 2-1થી આગળ હોવાથી રોહિત શર્મા એન્ડ કંપનીની નજર આ મેચ જીતીને સિરીઝ પોતાના નામે કરવા પર રહેશે.બીજી તરફ,કેરેબિયન આઇલેન્ડની ટીમ પલટવાર કરીને શ્રેણી 2-2થી બરાબર કરવા મેદાને ઉતરશે.
હૈદરાબાદમાં હાઈ-વોલ્ટેજ મેચ જોવા મળશે
હૈદરાબાદનું મેદાન હંમેશાથી ચોગ્ગા-છગ્ગાના વરસાદ અને હાઈ-સ્કોરિંગ મેચો માટે જાણીતું છે. પરંતુ મેચ શરૂ થાય તે પહેલાં કરોડો ક્રિકેટ ચાહકોના મનમાં એક જ સવાલ ઘૂમરાઈ રહ્યો છે કે શું આજના મેચમાં વરસાદ વિલન બનશે? ચાલો વિગતવાર જાણીએ હવામાનની આગાહી, પિચનો મિજાજ અને લાઇવ બ્રોડકાસ્ટિંગની તમામ વિગતો.
શું વરસાદ મેચ બગાડશે?
AccuWeather ના લેટેસ્ટ રિપોર્ટ અનુસાર, હૈદરાબાદના ફેન્સ માટે ખૂબ જ સારા સમાચાર છે. મેચ દરમિયાન આકાશ મોટે ભાગે સ્વચ્છ રહેશે અને વરસાદ પડવાની શક્યતા નહિવત એટલે કે માત્ર 1 ટકા છે.આકાશમાં વાદળોનું પ્રમાણ પણ આશરે 10 ટકા જેટલું જ રહેશે.મેચ દરમિયાન હૈદરાબાદનું તાપમાન 24 ડિગ્રી સેલ્સિયસની આસપાસ રહેવાની સંભાવના છે, જે ખેલાડીઓ માટે એકદમ સાનુકૂળ રહેશે. જો હવામાન વિભાગની આ આગાહી સાચી સાબિત થાય, તો ફેન્સને કોઈપણ વિક્ષેપ વિના પૂરેપૂરી 20-20 ઓવરનો રોમાંચ જોવા મળશે.
પિચ રિપોર્ટ: બેટ્સમેનોની થશે ચાંદી કે બોલરો બતાવશે દમ?
રાજીવ ગાંધી સ્ટેડિયમની પિચ સપાટ હોવાની સાથે સારો બાઉન્સ આપવા માટે જાણીતી છે.આ પિચ પર બોલ સીધો બેટ પર આવતો હોવાથી બેટ્સમેનો મુક્તપણે મોટા શોટ્સ રમી શકે છે.શરૂઆતની ઓવરોમાં નવા બોલથી ફાસ્ટ બોલરોને થોડી મદદ મળી શકે છે,પરંતુ જેમ જેમ રમત આગળ વધશે તેમ પિચ ધીમી પડતા સ્પિનરો ગેમમાં આવી શકે છે. સૌથી મહત્વનો ફેક્ટર અહીં ભેજ રહેશે,જે અંદાજે 64 ટકા સુધી જઈ શકે છે.આના કારણે મેચની બીજી ઇનિંગમાં ઝાકળની મોટી અસર જોવા મળશે.ઝાકળ પડવાના કારણે બીજી ઇનિંગમાં બોલરો માટે બોલ પર ગ્રીપ બનાવવી ખૂબ મુશ્કેલ બને છે.આ પરિસ્થિતિને જોતા ટોસ જીતનાર કેપ્ટન કોઈ પણ ખચકાટ વિના પહેલા બોલિંગ કરવાનો નિર્ણય લેશે.
હેડ-ટુ-હેડ રેકોર્ડ: ટીમ ઇન્ડિયાનો હાથ ઉપર
T20 આંતરરાષ્ટ્રીય ક્રિકેટના ઇતિહાસ પર નજર કરીએ તો ભારત અને વેસ્ટ ઇન્ડિઝ વચ્ચે અત્યાર સુધી કુલ 34 મેચો રમાઈ છે. જેમાંથી ભારતે 22 મેચોમાં શાનદાર જીત મેળવી છે, જ્યારે વેસ્ટ ઇન્ડિઝના ફાળે 11 જીત આવી છે અને 1 મેચ પરિણામ વિનાની રહી હતી. આ આંકડા દર્શાવે છે કે કાગળ પર ભારતીય ટીમ ઘણી મજબૂત છે. જો કે, શોર્ટ ફોર્મેટમાં વિન્ડિઝના પાવર-હિટર્સને હળવાશથી લેવાની ભૂલ ભારતને ભારે પડી શકે છે. હૈદરાબાદના રન-ચેઝ ગ્રાઉન્ડ પર આજે એક સુપર સન્ડે જેવો રોમાંચ જોવા મળશે.
આ પણ વાંચો - WTC Points Table: સાઉથ આફ્રિકા ટોપ-2માંથી બહાર, ફાઇનલની રેસમાં ભારતની સ્થિતિ શું?
