ભારત અને ઓસ્ટ્રેલિયા વચ્ચેની ક્રિકેટ ટક્કર હંમેશાં રોમાંચક રહી છે. બંને ટીમો જ્યારે પણ મેદાન પર આમનેસામને આવે છે ત્યારે ચાહકોને જોરદાર ક્રિકેટ જોવા મળે છે. ટેસ્ટ હોય, વનડે હોય કે ટી-20, બંને દેશો વચ્ચેની સ્પર્ધા ક્રિકેટ જગતમાં ખાસ સ્થાન ધરાવે છે. જોકે, વર્ષ 2026માં કંઈક એવું બન્યું છે જેની ભાગ્યે જ કોઈએ કલ્પના કરી હશે. આ આખા વર્ષ દરમિયાન ભારતીય પુરુષ ક્રિકેટ ટીમ અને ઓસ્ટ્રેલિયા વચ્ચે એક પણ આંતરરાષ્ટ્રીય મેચ રમાઈ નથી.આવો સંયોગ છેલ્લે વર્ષ 2005માં જોવા મળ્યો હતો. એટલે કે 21 વર્ષ બાદ ફરી એકવાર એવું બન્યું છે કે ભારત અને ઓસ્ટ્રેલિયાની ટીમો આખું વર્ષ એકબીજા સામે મેદાનમાં ઉતરી નથી. આ આંકડાએ ક્રિકેટ ચાહકોનું ધ્યાન ખેંચ્યું છે.
2026માં ભારત અને ઓસ્ટ્રેલિયા વચ્ચે મેચ કેમ ન થઈ?
ભારત અને ઓસ્ટ્રેલિયા વચ્ચે 2026માં એક પણ મુકાબલો ન થવાનું સૌથી મોટું કારણ બંને દેશોનું આંતરરાષ્ટ્રીય ક્રિકેટ શેડ્યૂલ છે. સામાન્ય રીતે આંતરરાષ્ટ્રીય ક્રિકેટમાં ટીમો વચ્ચેની શ્રેણીઓનું આયોજન અગાઉથી નક્કી કરવામાં આવે છે.આ માટે ICC દ્વારા ફ્યુચર ટૂર પ્રોગ્રામ એટલે કે FTP તૈયાર કરવામાં આવે છે. આ કાર્યક્રમ હેઠળ ક્રિકેટ બોર્ડ આગામી 3થી 4 વર્ષ માટે આંતરરાષ્ટ્રીય શ્રેણીઓ અને પ્રવાસનું આયોજન કરે છે.આ જ FTPના આધારે કઈ ટીમ કયા દેશનો પ્રવાસ કરશે અને ક્યારે શ્રેણી રમાશે તે નક્કી થાય છે. વર્ષ 2026ના કાર્યક્રમમાં ભારત અને ઓસ્ટ્રેલિયા વચ્ચે કોઈ દ્વિપક્ષીય શ્રેણી રાખવામાં આવી નહોતી. પરિણામે બંને ટીમો એકબીજા સામે રમી શકી નથી.
ટી-20 વર્લ્ડ કપમાં પણ ટળી ગઈ ટક્કર
FTPના કારણે દ્વિપક્ષીય શ્રેણી ન હોવા છતાં ભારત અને ઓસ્ટ્રેલિયા વચ્ચે એક મુકાબલો થવાની શક્યતા હતી. આ તક ટી-20 વર્લ્ડ કપ 2026માં હતી.વર્લ્ડ કપ જેવી મોટી સ્પર્ધામાં બંને ટીમો વચ્ચે ટક્કર થાય તો ક્રિકેટ ચાહકો માટે તે મોટી ભેટ સમાન હોત. જોકે, ઓસ્ટ્રેલિયાની ટીમને ગ્રૂપ સ્ટેજમાં જ ઝિમ્બાબ્વે સામે હારનો સામનો કરવો પડ્યો હતો.આ હારને કારણે ઓસ્ટ્રેલિયા આગળના તબક્કામાં પહોંચી શક્યું નહોતું. પરિણામે ભારત અને ઓસ્ટ્રેલિયા વચ્ચે વર્લ્ડ કપમાં પણ મુકાબલો જોવા મળ્યો નહોતો.આ રીતે દ્વિપક્ષીય શ્રેણી અને ICC ટૂર્નામેન્ટ બંનેમાં ભારત-ઓસ્ટ્રેલિયાની ટક્કર થવાની શક્યતા ખતમ થઈ ગઈ હતી.
2027માં ભારત-ઓસ્ટ્રેલિયા વચ્ચે થશે જોરદાર મુકાબલા
2026માં બંને ટીમો વચ્ચે એક પણ મેચ ન રમાઈ હોય, પરંતુ 2027માં ક્રિકેટ ચાહકોને ઘણી મોટી ટક્કર જોવા મળવાની છે.આગામી વર્ષે ઓસ્ટ્રેલિયાની ટીમ ભારતના પ્રવાસે આવવાની છે. આ પ્રવાસમાં બંને દેશો વચ્ચે 5 ટેસ્ટ મેચની શ્રેણી રમાવાની છે. ટેસ્ટ ક્રિકેટમાં ભારત અને ઓસ્ટ્રેલિયા વચ્ચેની સ્પર્ધા હંમેશાં રોમાંચક રહી છે. તેથી આ શ્રેણી પર સૌની નજર રહેશે.આ ઉપરાંત 2027માં યોજાનારા વનડે વર્લ્ડ કપમાં પણ ભારત અને ઓસ્ટ્રેલિયા ગ્રૂપ સ્ટેજમાં આમનેસામને આવશે.એટલે કે 2026માં બંને ટીમો વચ્ચે એક પણ મુકાબલો ન થયો હોવા છતાં 2027માં ચાહકોને ટેસ્ટ અને વનડે ક્રિકેટમાં જોરદાર એક્શન જોવા મળશે. હવે જોવાનું એ રહેશે કે આગામી વર્ષે કઈ ટીમ મેદાન પર પોતાનું વર્ચસ્વ સાબિત કરે છે.
આ પણ વાંચો - IPL હવે ત્રણ મહિના ચાલશે? નેસ વાડિયાનો મોટો પ્રસ્તાવ, 94 મેચ અને જાન્યુઆરીમાં ટુર્નામેન્ટની તૈયારી!
