ગુરુવાર, 19 નવેમ્બરના રોજ વેલિંગ્ટનના બેસિન રિઝર્વ ખાતે રમાઈ રહેલી પ્રથમ ક્રિકેટ ટેસ્ટના પહેલા દિવસે ન્યૂઝીલેન્ડે હેનરી નિકોલ્સની અણનમ સદીની મદદથી 82 ઓવરમાં 5 વિકેટે 243 રન બનાવ્યા હતા. દિવસના અંતે હેનરી નિકોલ્સ 221 બોલમાં 14 ચોગ્ગા સાથે 113 રન અને ગ્લેન ફિલિપ્સ 182 બોલમાં 13 ચોગ્ગા સાથે 94 રન બનાવીને અણનમ રહ્યા હતા. બંનેએ છઠ્ઠી વિકેટ માટે અણનમ 173 રનની ભાગીદારી કરીને મેચની સ્થિતિ પલટી નાખી હતી. ભારત તરફથી જસપ્રીત બુમરાહે 3 વિકેટ લીધી, જ્યારે અંશુલ કંબોજ અને આકાશ દીપે 1-1 વિકેટ ઝડપી હતી.
બુમરાહના ઝાટકા બાદ નિકોલ્સ અને ફિલિપ્સની લડાયક ભાગીદારી
પહેલા દિવસે જસપ્રીત બુમરાહે ત્રીજા બોલ પર ટોમ લાથમને શૂન્ય રને બોલ્ડ કરીને ભારતને શાનદાર શરૂઆત અપાવી હતી. ત્યારબાદ ડેવોન કોનવે (4) ને અંશુલ કંબોજે ઋષભ પંતના હાથે કેચ આઉટ કરાવ્યો, રચિન રવિન્દ્ર (15) ને આકાશ દીપે આઉટ કર્યો, જ્યારે ડેરિલ મિશેલ (1) અને ટોમ બ્લંડેલ (5) ને બુમરાહે પેવેલિયન ભેગા કર્યા હતા. 28.2 ઓવરમાં 70 રનમાં 5 વિકેટ ગુમાવ્યા બાદ ન્યૂઝીલેન્ડ મુશ્કેલીમાં મુકાયું હતું, પરંતુ ત્યારબાદ નિકોલ્સ અને ફિલિપ્સે સાવચેતીપૂર્વક રમીને ભારતીય બોલરો પર દબાણ બનાવ્યું હતું. બીજા સત્રમાં ન્યૂઝીલેન્ડે 80 રન અને ત્રીજા સત્રમાં 103 રન ઉમેર્યા હતા.
હેનરી નિકોલ્સની સદી અને 1,000 ટેસ્ટ રન પૂર્ણ
મુશ્કેલ પરિસ્થિતિમાં એક છેડો સાચવી રાખતા હેનરી નિકોલ્સે પોતાની 12મી ટેસ્ટ સદી પૂરી કરી હતી. બેસિન રિઝર્વ ખાતે આ તેની પાંચમી અને ભારત સામેની પ્રથમ ટેસ્ટ સદી હતી. પોતાની આ ઇનિંગ દરમિયાન નિકોલ્સે 1,000 ટેસ્ટ રન પણ પૂર્ણ કર્યા હતા. ગ્લેન ફિલિપ્સે પણ ઝડપી અને સમજદારીભરી બેટિંગ કરીને તેમને મજબૂત સાથ આપ્યો હતો.
ભારતીય બોલરોનું પ્રદર્શન
ભારતીય બોલરોએ શરૂઆતમાં સારો મારો ચલાવ્યો હતો, પરંતુ 70 ઓવર બાદ રન ગતિ રોકવામાં મુશ્કેલી પડી હતી. બુમરાહે 17 ઓવરમાં 52 રન આપીને 3 વિકેટ, કંબોજે 18 ઓવરમાં 57 રન આપીને 1 વિકેટ અને આકાશ દીપે 15 ઓવરમાં 33 રન આપ્યા હતા, જ્યારે પ્રસિદ્ધ કૃષ્ણા (16 ઓવરમાં 58 રન) અને વોશિંગ્ટન સુંદર (16 ઓવરમાં 38 રન) વિકેટવિહીન રહ્યા હતા.
ભારત માટે આ ટર્નિંગ પોઈન્ટ થયો ઘાતક
દિવસનો સૌથી નિર્ણાયક અને નિરાશાજનક વળાંક 73.3 ઓવરમાં આવ્યો, જ્યારે 103 રન પર રમી રહેલા નિકોલ્સે પ્રસિદ્ધ કૃષ્ણાના શોર્ટ બોલ પર પુલ શોટ માર્યો હતો અને બોલ બેટની ટોચ પર લાગીને હવામાં ઉછળ્યો હતો. ડીપ સ્ક્વેર લેગ પર દેવદત્ત પડિકલ કેચ માટે તૈયાર હતા, પરંતુ ઋષભ પંત પણ તે જ દિશામાં દોડ્યા હતા. બંને વચ્ચેના સંકલનના અભાવે કેચ છૂટી ગયો અને નિકોલ્સને જીવનદાન મળ્યું. આ કેચ ડ્રોપ થવાથી પ્રસિદ્ધ કૃષ્ણા, દેવદત્ત પડિકલ અને કેપ્ટન શુભમન ગિલ નિરાશ જોવા મળ્યા હતા. શરૂઆતના સત્રમાં દબદબો બનાવ્યા બાદ દિવસના અંતે ન્યૂઝીલેન્ડ મજબૂત સ્થિતિમાં પહોંચ્યું છે અને હવે બીજા દિવસે ભારતીય ટીમ આ ભાગીદારી તોડવાના લક્ષ્ય સાથે મેદાનમાં ઉતરશે.
આ પણ વાંચો : IND vs NZ: એમ્પાયર પર કેમ ભડકયો શુભમન ગિલ, જાણો સમગ્ર મામલો