વર્લ્ડ ટેસ્ટ ચેમ્પિયનશિપ (WTC) 2025-27ની પોઈન્ટ્સ ટેબલમાં મોટો ફેરફાર થયો છે. વેસ્ટ ઇન્ડિઝે બાંગ્લાદેશને તેની જ ધરતી પર રમાયેલી પ્રથમ ટેસ્ટમાં 8 વિકેટે હરાવ્યું છે. આ હારનો સીધો ફાયદો ભારતીય ટીમને થયો છે. ભારત એક સ્થાન ઉપર ચઢીને પાંચમા સ્થાનેથી ચોથા સ્થાને પહોંચી ગયું છે, જ્યારે બાંગ્લાદેશ ચોથા સ્થાનેથી પાંચમા સ્થાને સરકી ગયું છે.
બાંગ્લાદેશની હારથી ભારતને ફાયદો
ઢાકાના શેર-એ-બાંગ્લા સ્ટેડિયમમાં રમાયેલી પ્રથમ ટેસ્ટમાં બાંગ્લાદેશે વેસ્ટ ઇન્ડિઝ સામે જીત માટે 170 રનનો લક્ષ્યાંક રાખ્યો હતો. કેરેબિયન ટીમે માત્ર 2 વિકેટ ગુમાવીને આ લક્ષ્યાંક હાંસલ કરી લીધો હતો. આ પરિણામ બાદ બાંગ્લાદેશનું જીતનું ટકાવારી (PCT) ઘટીને 47.62 થઈ ગયું છે. બીજી તરફ ભારતનું PCT 51.52 છે. આ કારણે ભારતીય ટીમ પોઈન્ટ્સ ટેબલમાં ચોથા સ્થાને પહોંચી ગઈ છે.
WTC પોઈન્ટ્સ ટેબલમાં ટોપ-5 ટીમો
ઓસ્ટ્રેલિયા 75.00 PCT સાથે પ્રથમ સ્થાન પર યથાવત છે. ન્યૂઝીલેન્ડ 72.22 PCT સાથે બીજા અને દક્ષિણ આફ્રિકા 66.67 PCT સાથે ત્રીજા સ્થાને છે. ભારત 51.52 PCT સાથે ચોથા અને બાંગ્લાદેશ 47.62 PCT સાથે પાંચમા સ્થાને છે. વેસ્ટ ઇન્ડિઝે જીત મેળવી હોવા છતાં આઠમું સ્થાન જાળવી રાખ્યું છે. જોકે, તેનું PCT વધીને 26.92 થઈ ગયું છે.
બ્રેન્ડન કિંગની શાનદાર બેટિંગ
વેસ્ટ ઇન્ડિઝની જીતમાં બ્રેન્ડન કિંગે મહત્ત્વની ભૂમિકા ભજવી હતી. તેણે 115 બોલમાં અણનમ 81 રન બનાવ્યા હતા. જ્હોન કેમ્પબેલે 49 રનનું યોગદાન આપ્યું હતું, જ્યારે કેવમ હોજ 31 રન બનાવી અણનમ રહ્યો હતો. આ પહેલાં બાંગ્લાદેશની ટીમ બીજી ઇનિંગમાં માત્ર 142 રનમાં ઓલઆઉટ થઈ ગઈ હતી. નઈમ હસને સૌથી વધુ 52 રન બનાવ્યા હતા. વેસ્ટ ઇન્ડિઝના બોલર રોસ્ટન ચેઝે 5 વિકેટ લઈને બાંગ્લાદેશની બેટિંગને મોટો ઝટકો આપ્યો હતો.
ભારત માટે ન્યૂઝીલેન્ડ સામેની શ્રેણી મહત્ત્વપૂર્ણ
ભારતને બાંગ્લાદેશની હારથી ફાયદો થયો છે, પરંતુ WTC ફાઇનલમાં પહોંચવાનો રસ્તો હજુ પડકારજનક છે. પોઈન્ટ્સ ટેબલમાં પોતાની સ્થિતિ વધુ મજબૂત કરવા માટે ભારતીય ટીમે આગામી મેચોમાં સારું પ્રદર્શન કરવું પડશે. ખાસ કરીને ન્યૂઝીલેન્ડ સામેની ટેસ્ટ શ્રેણી ભારત માટે નિર્ણાયક સાબિત થઈ શકે છે.
આ પણ વાંચો: Explainer : ક્રિકેટ નહીં, પૈસાનો પાવર! IPLની 10 ટીમોની કિંમત ₹1 લાખ કરોડને પાર, અમેરિકાની મોટી લીગ પણ પાછળ
