IPL 2026ની ફાઈનલ 31 મેના રોજ અમદાવાદના નરેન્દ્ર મોદી સ્ટેડિયમ ખાતે રોયલ ચેલેન્જર્સ બેંગલુરુ અને ગુજરાત ટાઈટન્સ વચ્ચે રમાશે. રજત પાટીદારની કેપ્ટનશીપમાં RCB સતત બીજી વખત ફાઈનલમાં પહોંચ્યું છે. આ દરમિયાન શુભમન ગિલની કેપ્ટનશીપમાં, ગુજરાત પહેલી વાર ફાઈનલ રમશે.
અમદાવાદમાં યોજાનારી IPL ફાઈનલને લઈને શહેર પોલીસ સંપૂર્ણ એલર્ટ પર છે. નરેન્દ્ર મોદી સ્ટેડિયમ અને તેની આસપાસના વિસ્તારોમાં સુરક્ષા વ્યવસ્થા ખૂબ જ કડક બનાવી દેવામાં આવી છે. VVIP હાજરીને ધ્યાનમાં રાખીને સુરક્ષા એજન્સીઓ પણ એક્ટિવ થઈ ગઈ છે.
આ સુરક્ષા બંદોબસ્તમાં કુલ 3043 પોલીસ કર્મીઓને તૈનાત કરવામાં આવ્યા છે. તેમાં 3 IGP, 11 DCP અને 21 ACP સહિત ઉચ્ચ અધિકારીઓ પણ ફરજ પર રહેશે. આ સિવાય 47 પોલીસ ઈન્સ્પેક્ટર, 140 PSI અને 2823 પોલીસ કર્મીઓ સ્ટેડિયમ અને આસપાસના વિસ્તારોમાં સુરક્ષા સંભાળશે.
મેચ દરમિયાન કોઈ અનિચ્છનીય ઘટના ન બને તે માટે ક્રાઈમ બ્રાન્ચ અને SOGની વિશેષ ટીમો પણ તૈનાત કરવામાં આવી છે. સાથે જ એન્ટી ડ્રોન સિસ્ટમ અને બોમ્બ ડિસ્પોઝલ સ્ક્વોડ (BDDS) ટીમો પણ સક્રિય રહેશે.
સ્ટેડિયમમાં ભીડ નિયંત્રણ માટે વિશેષ બેરિકેડિંગ કરવામાં આવ્યું છે જેથી ભાગદોડ જેવી સ્થિતિ ટાળી શકાય. તમામ પ્રવેશદ્વારો પર સઘન ચેકિંગ શરૂ કરવામાં આવ્યું છે અને દરેક દર્શકની કડક તપાસ બાદ જ પ્રવેશ આપવામાં આવશે.
પોલીસે સ્ટેડિયમ અને આસપાસના વિસ્તારો પર સતત નજર રાખવા માટે સ્પેશિયલ મોનિટરિંગ સિસ્ટમ પણ અમલમાં મૂકી છે. સુરક્ષા એજન્સીઓએ સ્પષ્ટ કર્યું છે કે VVIP હાજરી અને મોટી ભીડને ધ્યાનમાં રાખીને કોઈપણ પ્રકારની સુરક્ષા ચૂક બરદાસ્ત કરવામાં આવશે નહીં. IPL ફાઈનલને ધ્યાનમાં રાખીને અમદાવાદને હાઈ-સિક્યુરિટી ઝોનમાં ફેરવી દેવામાં આવ્યું છે અને સમગ્ર શહેર પોલીસના કડક નિયંત્રણ હેઠળ રહેશે.
આ પણ વાંચો: BCCIએ શુભમન ગિલને નવા T20 કેપ્ટન તરીકે કર્યો નિયુક્ત, સૂર્યકુમાર યાદવ પાસેથી છીનવાઈ કેપ્ટનશીપ?