ઈન્ડિયન પ્રીમિયર લીગમાં 27 મે ના રોજ સનરાઈઝર્સ હૈદરાબાદ અને રાજસ્થાન રોયલ્સ વચ્ચે એલિમિનેટર મેચ જોવા મળી. મુલ્લાનપુરમાં રમાયેલી આ મહત્વપૂર્ણ મેચમાં રાજસ્થાન રોયલ્સે સનરાઈઝર્સ હૈદરાબાદને 47 રનથી હરાવ્યું.
આ સાથે IPL 2026ના ક્વોલિફાયર 2 માટે બંને ટીમો નક્કી થઈ ગઈ. રાજસ્થાન હવે ફાઈનલમાં ટિકિટ મેળવવાના ઈરાદા સાથે ક્વોલિફાયર 2 માં પ્રવેશ કરશે. આ પહેલા ડિફેન્ડિંગ ચેમ્પિયન રોયલ ચેલેન્જર્સ બેંગલુરુએ ક્વોલિફાયર 1 માં ગુજરાત ટાઈટન્સને હરાવીને સતત બીજી વખત ફાઈનલમાં પ્રવેશ કર્યો હતો. રાજસ્થાન રોયલ્સ હવે ક્વોલિફાયર 2 માં ગુજરાત ટાઈટન્સનો સામનો કરશે. આ મેચના વિજેતાનો સામનો ફાઈનલમાં RCB સાથે થશે.
વૈભવ સૂર્યવંશી વિસ્ફોટક ઈનિંગ રમી
એલિમિનેટર મેચમાં રાજસ્થાનની જીતનો હીરો ઓપનર વૈભવ સૂર્યવંશી હતો, જેને ધમાકેદાર ઈનિંગ રમી હતી. પહેલા બેટિંગ કરવાની તક મળ્યા બાદ વૈભવે ફક્ત 29 બોલમાં 97 રન બનાવ્યા, જેમાં 12 છગ્ગાનો સમાવેશ થાય છે. વૈભવ IPLની સૌથી ઝડપી સદી ફટકારવાથી ફક્ત 3 રન દૂર રહ્યો.
વૈભવ સૂર્યવંશીની તોફાની ઈનિંગને કારણે રાજસ્થાન રોયલ્સ 20 ઓવરમાં 8 વિકેટ ગુમાવીને સ્કોરબોર્ડ પર 243 રન બનાવવામાં સફળ રહ્યો. વૈભવ સૂર્યવંશી સિવાય ધ્રુવ જુરેલે 21 બોલમાં ઝડપી 50 રન બનાવ્યા. સનરાઈઝર્સ હૈદરાબાદ તરફથી પ્રફુલ હિંગેએ સૌથી વધુ 3 વિકેટ લીધી.
SRHના બેટ્સમેનોએ નિરાશ કર્યા
રાજસ્થાન રોયલ્સના વિશાળ સ્કોરના જવાબમાં સનરાઈઝર્સ હૈદરાબાદની ઈનિંગની શરૂઆત ખૂબ જ ખરાબ રહી. ઓપનર અભિષેક શર્મા પ્રથમ ઓવરના બીજા બોલ પર આઉટ થયો. ઈશાન કિશન પણ ત્રીજી ઓવરમાં 33 રન બનાવીને આઉટ થયો. બીજી ઓવરમાં સ્મરણ રવિચંદ્રન અને પાંચમી ઓવરમાં ટ્રેવિસ હેડ આઉટ થયા. ત્યારબાદ હેનરિક ક્લાસેન ઈનિંગને સ્થિર કરવાનો પ્રયાસ કર્યો, પરંતુ સાતમી ઓવરમાં યશ રાજ પુંજાએ તેને આઉટ કર્યો.
SRHની અડધી ટીમ 81 રન પર આઉટ થઈ ગઈ. આ દરમિયાન ઈમ્પેક્ટ પ્લેયર તરીકે મેદાનમાં આવેલા સલિલ અરોરાએ નીતિશ કુમાર રેડ્ડી સાથે ઈનિંગને સ્થિર કરી અને ટીમને 137 રન સુધી પહોંચાડી. આ દરમિયાન રાજસ્થાનના બોલરોએ ફરી એકવાર શાનદાર પ્રદર્શન કર્યું, 11મી ઓવરમાં નીતિશને આઉટ કર્યો અને પછી બીજી ઓવરના પહેલા બોલ પર કેપ્ટન પેટ કમિન્સને આઉટ કર્યો. કેપ્ટન ફક્ત 1 રન બનાવી શક્યો. 139 સુધીમાં ટીમે 7 વિકેટ ગુમાવી દીધી હતી. છેલ્લા 3 બેટ્સમેન પણ કંઈ ખાસ કરી શક્યા નહીં અને આખી ટીમ 19.2 ઓવરમાં 196 રનમાં ઓલઆઉટ થઈ ગઈ.
ક્વોલિફાયર 2 ક્યારે અને ક્યાં રમાશે?
IPL 2026 ક્વોલિફાયર 2 મેચ શુક્રવાર, 29 મેના રોજ મુલ્લાનપુરના મહારાજા યાદવિન્દ્ર સિંહ ઈન્ટરનેશનલ ક્રિકેટ સ્ટેડિયમ ખાતે રમાશે. આ મેચમાં એલિમિનેટરમાં વિજેતા રાજસ્થાન રોયલ્સનો સામનો ગુજરાત ટાઈટન્સ સામે થશે, જે ક્વોલિફાયર 1 માં RCB સામે હારી ગઈ હતી.
મેચ ભારતીય સમય મુજબ સાંજે 7:30 વાગ્યે શરૂ થશે. ફાઈનલ પહેલા ટોસ 30 મિનિટ પહેલા થશે. ક્વોલિફાયર 2 ના વિજેતાનો મુકાબલો 31 મેના રોજ અમદાવાદના નરેન્દ્ર મોદી સ્ટેડિયમમાં ટાઈટલ મેચમાં RCB સામે થશે.
આ પણ વાંચો: BCCIએ શુભમન ગિલને નવા T20 કેપ્ટન તરીકે કર્યો નિયુક્ત, સૂર્યકુમાર યાદવ પાસેથી છીનવાઈ કેપ્ટનશીપ?
