IPL 2027ની મિની હરાજી પહેલાં રોયલ ચેલેન્જર્સ બેંગલુરુ (RCB)એ પોતાની રિટેન્શન યાદી જાહેર કરી છે. ટીમે મોટાભાગની જૂની ટીમ જાળવી રાખવાનો નિર્ણય કર્યો છે, પરંતુ ઇંગ્લેન્ડના યુવા ઓલરાઉન્ડર જેકબ બેથલને બહારનો રસ્તો બતાવ્યો છે. બીજી તરફ, ગયા IPLમાં એક પણ મેચ ન રમનાર ભારતીય ફાસ્ટ બોલર યશ દયાલને ટીમે જાળવી રાખ્યો છે. આ નિર્ણય ખાસ ચર્ચામાં છે.
બેથલને છોડવા પાછળનું કારણ શું?
જેકબ બેથલ RCBના સૌથી ચર્ચિત રિલીઝ ખેલાડીઓમાંનો એક છે. ગયા IPLમાં કેટલીક મેચોમાં સારું પ્રદર્શન કરનાર આ ઇંગ્લિશ ખેલાડીને ટીમે આ વખતે જાળવી રાખ્યો નથી. RCBના ક્રિકેટ ડિરેક્ટર મો બોબાટે બેથલને રિલીઝ કરવા પાછળનું કારણ તેની ઘૂંટણની ઈજા અને આગામી સિઝન માટેની અનિશ્ચિત ઉપલબ્ધતા ગણાવી છે. બોબાટના જણાવ્યા અનુસાર, બેથલને ફરી ઘૂંટણની ઈજા થઈ છે અને તે ક્યારે સંપૂર્ણ ફિટ થશે તે અંગે સ્પષ્ટતા નથી. આવી સ્થિતિમાં IPL 2027 સુધી તેની ઉપલબ્ધતા અંગે જોખમ હોવાથી ટીમે તેને છોડવાનો નિર્ણય કર્યો છે.
https://x.com/RCBTweets/status/2122691372927033566?a=Q89Pka1ximsvk7Wuvsk&s=20
યશ દયાલ પર ફરી ભરોસો
RCBના નિર્ણયમાં સૌથી વધુ ધ્યાન ખેંચનાર નામ યશ દયાલનું છે. IPL 2026માં તે એક પણ મેચ રમ્યો નહોતો, છતાં ટીમે તેને રિટેન કર્યો છે. ફ્રેન્ચાઇઝીએ તેના પર વિશ્વાસ જાળવી રાખ્યો છે. યશ દયાલ ઉપરાંત વિરાટ કોહલી, કેપ્ટન રજત પાટીદાર, ફિલ સોલ્ટ, જોશ હેઝલવુડ, ભુવનેશ્વર કુમાર, ક્રુણાલ પંડ્યા અને ટિમ ડેવિડ જેવા મુખ્ય ખેલાડીઓને પણ ટીમમાં જાળવી રાખવામાં આવ્યા છે.
RCBએ કોને રિલીઝ કર્યા?
RCBએ કુલ છ ખેલાડીઓને રિલીઝ કર્યા છે. તેમાં જેકબ બેથલ, મંગેશ યાદવ, રિચર્ડ ગ્લીસન, સ્વપ્નિલ સિંહ, સાત્વિક દેસવાલ અને વિહાન મલ્હોત્રાનો સમાવેશ થાય છે. મંગેશ યાદવને ટીમે અગાઉની હરાજીમાં ₹5.20 કરોડમાં ખરીદ્યો હતો, પરંતુ તેને પણ બહાર કરવામાં આવ્યો છે. રિચર્ડ ગ્લીસન ગયા સીઝનમાં નુવાન તુષારાના સ્થાને ટીમમાં જોડાયો હતો.
હરાજી માટે RCB પાસે ₹14.15 કરોડ
રિટેન્શન બાદ RCB પાસે IPL 2027ની મિની હરાજી માટે ₹14.15 કરોડ બચ્યા છે. ટીમ પાસે કુલ પાંચ ખેલાડીઓની જગ્યા ખાલી છે, જેમાં એક વિદેશી ખેલાડી માટેની જગ્યા સામેલ છે.
IPL 2027ની મિની હરાજી 16 ડિસેમ્બરે ગોવામાં યોજાવાની છે. RCBએ પોતાની મુખ્ય ટીમ જાળવી રાખી છે. હવે હરાજીમાં બાકી રહેલી જગ્યાઓ ભરવા અને સતત ત્રીજી વખત IPL ટ્રોફી જીતવાની તૈયારી મજબૂત કરવા ટીમની નજર રહેશે.
આ પણ વાંચો: Gurnoor Brar: વિકેટ લીધી, પણ ઉજવણી બની મુસીબત! ગુરનૂર બ્રારને ICCની ફટકાર