ચેન્નાઈ સુપર કિંગ્સે પોતાની કોચિંગ ટીમમાં મોટો ફેરફાર કર્યો છે. પૂર્વ ભારતીય બોલર મોહિત શર્માને ટીમના નવા બોલિંગ કોચ બનાવવામાં આવ્યા છે. CSKના CEO કાસી વિશ્વનાથને આ સમાચારની પુષ્ટિ કરી છે. તેમણે જણાવ્યું કે મોહિતનું નામ મુખ્ય કોચ ઝહીર ખાને સૂચવ્યું હતું અને ટીમને આશા છે કે તેઓ કોચ તરીકે પણ સારું કામ કરશે. મોહિત શર્મા માટે આ CSKમાં નવી ભૂમિકા છે, પરંતુ ટીમ સાથે તેમનો સંબંધ જૂનો છે. તેઓ અગાઉ CSK માટે 4 સિઝન રમી ચૂક્યા છે.
ઝહીર ખાને કરી ભલામણ
CSKની નવી કોચિંગ ટીમની રચનામાં ઝહીર ખાનની મહત્વની ભૂમિકા જોવા મળી રહી છે. કાસી વિશ્વનાથને કહ્યું છે કે આગામી દિવસોમાં કોચિંગ સ્ટાફના બીજા સભ્યોની પણ ઝહીરની ભલામણના આધારે નિમણૂક કરવામાં આવશે. મોહિત હવે ટીમના બોલિંગ વિભાગને સંભાળશે અને બોલરો સાથે કામ કરશે. તેમની ખાસિયત ધીમી બોલ અને અલગ-અલગ વેરિએશન રહી છે, ખાસ કરીને ડેથ ઓવર્સમાં તેઓ પોતાની બોલિંગ માટે જાણીતા રહ્યા છે.
CSK માટે 4 સિઝન રમી ચૂક્યા છે
મોહિત શર્માએ 2013માં CSK સાથે IPL કારકિર્દીની શરૂઆત કરી હતી. શરૂઆતના વર્ષોમાં તેમણે નવી બોલથી પણ અસર છોડી હતી. સમય જતાં તેઓ ડેથ ઓવર્સના સ્પેશિયાલિસ્ટ બોલર તરીકે વધુ જાણીતા બન્યા. IPLમાં મોહિતે કુલ 120 મેચ રમી છે અને 134 વિકેટ ઝડપી છે. 2014ની સિઝનમાં CSK તરફથી રમતા તેમણે 23 વિકેટ લીધી હતી અને પર્પલ કેપ જીતી હતી.
ગુજરાત ટાઇટન્સમાં પણ કર્યો હતો ધમાકો
મોહિતની IPL કારકિર્દીનો એક ખાસ તબક્કો ગુજરાત ટાઇટન્સ સાથે આવ્યો હતો. 2023માં 35 વર્ષની ઉંમરે તેમણે 27 વિકેટ લઈને શાનદાર વાપસી કરી હતી. તેઓ તે સિઝનમાં પર્પલ કેપની રેસમાં પણ રહ્યા હતા. 2024માં પણ તેમણે ગુજરાત માટે 13 વિકેટ ઝડપી હતી. આ સમયગાળામાં તેમની સ્લોઅર બોલિંગ બેટરો માટે મુશ્કેલી બની હતી. ડેથ ઓવર્સમાં અલગ-અલગ પ્રકારની બોલિંગ કરવી તેમની ખાસિયત બની ગઈ હતી.
હવે ખેલાડી નહીં, કોચ તરીકે નવી ઇનિંગ
મોહિત શર્માએ ડિસેમ્બર 2025માં તમામ ફોર્મેટમાંથી નિવૃત્તિ જાહેર કરી હતી. તેમની આંતરરાષ્ટ્રીય કારકિર્દીમાં ભારત માટે 26 ODI અને 8 T20I મેચ સામેલ છે. બંને ફોર્મેટમાં મળીને તેમણે 37 વિકેટ લીધી હતી. તેઓ 2015ના ODI વર્લ્ડ કપમાં ભારતીય ટીમનો પણ ભાગ રહ્યા હતા. IPL 2025માં તેઓ દિલ્હી કેપિટલ્સ તરફથી રમ્યા હતા. ત્યારબાદ નિવૃત્તિ બાદ હવે તેઓ કોચિંગ તરફ આગળ વધી રહ્યા છે.
એરિક સિમન્સની જગ્યાએ જવાબદારી
CSKમાં મોહિત શર્મા હવે એરિક સિમન્સની જગ્યાએ બોલિંગ કોચની જવાબદારી સંભાળશે. એટલે જે ટીમ માટે તેમણે ખેલાડી તરીકે મહત્વનું યોગદાન આપ્યું હતું, એ જ ટીમમાં હવે તેઓ યુવા અને અનુભવી બોલરો સાથે કોચ તરીકે કામ કરતા જોવા મળશે. મોહિતનો CSK સાથેનો જૂનો અનુભવ અને ડેથ ઓવર્સની બોલિંગની સમજ હવે ટીમના બોલિંગ યુનિટ માટે ઉપયોગી બની શકે છે.
આ પણ વાંચો: OMG! ICC રેન્કિંગમાં શ્રી ચરણીનો કમાલ, તોડ્યો ઓલ-ટાઇમ રેકોર્ડ
