દક્ષિણ આફ્રિકાના ક્રિકેટમાં 18 વર્ષના યુવા ઝડપી બોલર જેજે બાસને પોતાની પ્રથમ ફર્સ્ટ ક્લાસ મેચમાં જ ધમાકેદાર શરૂઆત કરી છે.લાયન્સ તરફથી રમતા બાસને બોલેન્ડ સામેની મેચમાં એવી બોલિંગ કરી કે તેનું નામ દક્ષિણ આફ્રિકાના ફર્સ્ટ ક્લાસ ક્રિકેટના ઇતિહાસમાં નોંધાઈ ગયું.બાસને સમગ્ર મેચમાં 99 રન આપીને કુલ 11 વિકેટ ઝડપી હતી.દક્ષિણ આફ્રિકાના ફર્સ્ટ ક્લાસ ક્રિકેટમાં ડેબ્યૂ મેચમાં કોઈ ઝડપી બોલર દ્વારા નોંધાવવામાં આવેલા આ સૌથી શ્રેષ્ઠ આંકડા હોવાનું જણાવવામાં આવી રહ્યું છે.જોકે, બાસનની આ સિદ્ધિ કરતાં પણ વધુ રસપ્રદ વાત એ છે કે મેચ દરમિયાન આ યુવા ખેલાડી ડ્રેસિંગ રૂમમાં બેસીને પોતાના સ્કૂલના અભ્યાસમાં વ્યસ્ત હતો.
પહેલી જ મેચમાં બાસનનો કહેર
લાયન્સની ટીમ આ મુકાબલામાં પોતાના કેટલાક અનુભવી ઝડપી બોલરો વિના મેદાનમાં ઉતરી હતી.લુથો સિપામલા નામિબિયામાં ઈજાગ્રસ્ત હતા,જ્યારે ક્વેના મફાકા સિનિયર રાષ્ટ્રીય ટીમ સાથે હતા.ગેરાલ્ડ કોએત્ઝી અને કોડી યુસુફ 'A' ટીમની જવાબદારીમાં હતા.વિઆન મુલ્ડર પણ અંગત કારણોસર ઉપલબ્ધ નહોતા.આ સ્થિતિમાં બાસન સહિતના યુવા બોલરો પર મોટી જવાબદારી આવી હતી.બાસને પહેલી જ ઇનિંગ્સમાં પોતાની અસર બતાવી દીધી.તેણે ત્રીજા ઓવરમાં ઓપનર બ્લેડ કેપલને બોલ્ડ કર્યો.ત્યારબાદ ગયા સીઝનમાં 900થી વધુ રન બનાવનાર ગેવિન કપલાનને પ્રથમ જ બોલે શૂન્ય પર પેવેલિયન મોકલી દીધો.બાસને 2 વખતના ટેસ્ટ કેપ્ટન નીલ બ્રાન્ડને પણ બોલ્ડ કર્યો હતો. એક સમયે બોલેન્ડનો સ્કોર 6 વિકેટે 90 રન હતો અને આ તમામ 6 વિકેટ બાસનના નામે હતી. ત્યારબાદ 170 રનની ઇનિંગ રમનાર લેહાન બોથાને આઉટ કરીને તેણે પ્રથમ ઇનિંગ્સમાં 7 વિકેટ પૂરી કરી.બીજી ઇનિંગ્સમાં પણ બાસનની બોલિંગનો કહેર યથાવત રહ્યો. લાયન્સે આપેલા 279 રનના લક્ષ્યાંકનો પીછો કરવા ઉતરેલી બોલેન્ડની ટીમના તમામ 4 વિકેટ બાસને જ ઝડપી લીધા. આ સાથે તેણે મેચમાં કુલ 11 વિકેટ પૂરી કરી.