ભારતીય ક્રિકેટમાં પોતાની ઓળખ બનાવી રહેલા જમ્મુ-કાશ્મીરના ફાસ્ટ બોલર આકિબ નબી માટે ન્યૂઝીલેન્ડ પ્રવાસ શીખવાની મોટી તક બની રહ્યો છે. અહીંની પરિસ્થિતિમાં બોલિંગ કેવી રીતે કરવી તે અંગે તેને વિરાટ કોહલી અને રોહિત શર્મા જેવા અનુભવી બેટ્સમેનો પાસેથી ખાસ સલાહ મળી છે. નબીએ ખુલાસો કર્યો કે નેટ્સમાં બોલિંગ કરતી વખતે બંને દિગ્ગજોએ તેને સ્વિંગ પર વધુ આધાર રાખવાને બદલે સીમ મૂવમેન્ટ અને બોલને પિચ પર જોરથી પછાડવા પર ધ્યાન આપવાનું કહ્યું હતું. આ સલાહ પાછળનું કારણ પણ રસપ્રદ છે—વિશ્વસ્તરના બેટ્સમેનો સ્વિંગનો સામનો સારી રીતે કરી શકે છે.
કોહલી-રોહિતે સમજાવી ન્યૂઝીલેન્ડની બોલિંગ ટ્રીક
આકિબ નબીએ પત્રકારો સાથેની વાતચીતમાં જણાવ્યું કે, તે પહેલીવાર ન્યૂઝીલેન્ડની ધરતી પર રમવા પહોંચ્યો છે અને અહીંની પરિસ્થિતિ તેના માટે નવો અનુભવ છે, અહીંની પરિસ્થિતિ ભારત કરતાં અલગ છે. અહીં બોલને હવામાં સ્વિંગ કરાવવા કરતાં પિચ પરથી સીમ મૂવમેન્ટ મેળવવી વધુ અસરકારક બની શકે છે. નબીએ કહ્યું કે નેટ્સમાં વિરાટ કોહલી, રોહિત શર્મા અને કેપ્ટન શુભમન ગિલને બોલિંગ કરતી વખતે તેને તેમની પાસેથી પ્રતિસાદ મળ્યો હતો. તેમણે તેને 'સ્ક્રેમ્બલ્ડ સીમ' એટલે કે બોલની સીમને સીધી દિશામાં રાખવાને બદલે અલગ સ્થિતિમાં છોડવાની રીત અને પિચ પર બોલને જોરથી પછાડવાની સલાહ આપી હતી. આ રીતે બોલ પિચ પરથી અણધાર્યો ઉછાળો કે દિશા બદલી શકે છે અને બેટ્સમેન માટે મુશ્કેલી ઊભી કરી શકે છે.
પ્રથમ મેચમાં વિકેટ નહીં, બીજીમાં બે સફળતા
ન્યૂઝીલેન્ડ સામેની પાંચ મેચની ODI સિરીઝમાં આકિબની શરૂઆત ખાસ રહી નહોતી. પ્રથમ મેચમાં તેણે છ ઓવર નાખીને 33 રન આપ્યા હતા, પરંતુ એકપણ વિકેટ મળી નહોતી. જોકે બીજી મેચમાં તેણે જોરદાર વાપસી કરી હતી. બીજી ODIમાં નબીએ ટિમ સેફર્ટ અને વિલ યંગની મહત્વપૂર્ણ વિકેટ ઝડપી હતી. તેણે સાત ઓવરમાં 31 રન આપીને બે વિકેટ મેળવી હતી. તેની આ બોલિંગથી ભારતને ન્યૂઝીલેન્ડ સામે ચાર રનથી જીત મેળવવામાં મદદ મળી હતી. ત્રીજી મેચ વરસાદને કારણે રદ થઈ હતી. આ સાથે ભારતે સિરીઝમાં 2-0ની સરસાઈ જાળવી રાખી છે.
રણજી ટ્રોફીમાં 60 વિકેટ લઈને ટીમ ઇન્ડિયામાં પહોંચ્યો
આકિબ નબીની ટીમ ઇન્ડિયામાં પસંદગી પાછળનું સૌથી મોટું કારણ સ્થાનિક ક્રિકેટમાં તેનું શાનદાર પ્રદર્શન છે. 2025-26ની રણજી ટ્રોફીમાં તેણે જમ્મુ-કાશ્મીર માટે 10 મેચમાં 60 વિકેટ ઝડપી હતી. આ પ્રદર્શનથી ટીમને પહેલીવાર રણજી ટ્રોફી જીતવામાં મોટી મદદ મળી હતી. તે ટુર્નામેન્ટનો સૌથી વધુ વિકેટ લેનારો બોલર પણ બન્યો હતો. નબીએ કહ્યું કે ન્યૂઝીલેન્ડમાં મળતો અનુભવ ભવિષ્યમાં ટેસ્ટ ક્રિકેટમાં પણ ઉપયોગી થશે. હાલમાં તે ટેસ્ટ સિરીઝ માટેની ટીમમાં સામેલ નથી, પરંતુ અહીં રહીને નેટ્સમાં બોલિંગ કરવાથી તેને લાલ બોલથી અહીંની પરિસ્થિતિમાં કેવી રીતે બોલિંગ કરવી તે શીખવાની તક મળશે.
હવે ચોથી ODIમાં સલાહનો કેટલો ફાયદો થશે?
ભારત અને ન્યૂઝીલેન્ડ વચ્ચે ચોથી ODI 13 નવેમ્બરે માઉન્ટ મૌંગાનુઈના બે ઓવલ મેદાન પર રમાવાની છે. સિરીઝમાં ભારત 2-0થી આગળ છે. આકિબ નબી માટે આ મેચ પોતાની બોલિંગમાં કરેલા સુધારાને ફરી સાબિત કરવાની તક બની શકે છે.
આ પણ વાંચો: IND vs NZ ODI : વેલિંગ્ટન જઈ રહેલી ટીમ ઇન્ડિયાને પ્લેન લેન્ડિંગમાં થયો ભયાનક અનુભવ
