ભારતીય ટીમના ઝડપી બોલર મોહમ્મદ સિરાજ છેલ્લા કેટલાક સમયથી પોતાની જાણીતી લયમાં જોવા મળ્યા નથી.શ્રીલંકા પ્રવાસ બાદ દલીપ ટ્રોફીના ફાઇનલમાં પણ તેમની બોલિંગમાં ઝડપ અને ધારનો અભાવ જોવા મળ્યો હતો.આ કારણે તેમની ફિટનેસ અને મેચ પ્રેક્ટિસને લઈને સવાલો ઊભા થયા હતા.જોકે હવે સિરાજે પોતે જ પોતાની બોલિંગમાં આવેલા ફેરફારનું કારણ જણાવી દીધું છે.સિરાજના મતે લાંબા સમય સુધી ક્રિકેટથી દૂર રહેવાને કારણે તેમની લય પર અસર પડી હતી.તેઓએ કહ્યું કે લગભગ 2 મહિના સુધી આરામ કર્યા બાદ સીધી મેચમાં ઉતરવું સરળ નહોતું અને શરૂઆતમાં તેઓ પોતાની સંપૂર્ણ લય મેળવી શક્યા નહોતા.
દૂલીપ ટ્રોફીના ફાઇનલમાં સિરાજની મુશ્કેલી
દૂલીપ ટ્રોફીના ફાઇનલમાં સિરાજ સાઉથ ઝોન તરફથી રમ્યા હતા.પ્રથમ દાવમાં તેમણે લાંબો 25 ઓવરનો સ્પેલ કર્યો હતો,પરંતુ એક પણ વિકેટ મેળવી શક્યા નહોતા.આ દરમિયાન તેમણે 140 રન આપ્યા હતા.સૌથી વધુ ધ્યાન તેમની બોલિંગની ઝડપ પર ગયું હતું. સામાન્ય રીતે 135થી 140 કિમી પ્રતિ કલાક અથવા તેનાથી વધુ ઝડપે બોલિંગ કરનાર સિરાજ આ મેચમાં મોટાભાગે 125થી 130 કિમી પ્રતિ કલાકની ઝડપે બોલિંગ કરતા જોવા મળ્યા હતા.સાથે જ તેમને સ્વિંગ અને સીમમાંથી પણ ખાસ મદદ મળી નહોતી.શ્રીલંકા પ્રવાસ દરમિયાન પણ સિરાજની બોલિંગમાં આ પ્રકારનો ફેરફાર જોવા મળ્યો હતો. કોલંબો ટેસ્ટમાં તેમની ઝડપ ઓછી રહેતા તેમની ફિટનેસ અંગે ચર્ચા શરૂ થઈ હતી. જોકે તે સમયે કેપ્ટન શુભમન ગિલે કહ્યું હતું કે સિરાજને પૂરતી મેચ પ્રેક્ટિસ મળી નહોતી.
લાંબા બ્રેકને સિરાજે ગણાવ્યું કારણ
દલીપ ટ્રોફી ફાઇનલ બાદ સિરાજે પોતાની સ્થિતિ અંગે ખુલાસો કર્યો હતો. તેમણે જણાવ્યું કે તેઓ લય આધારિત બોલર છે અને રિધમમાં ન હોય ત્યારે પોતાની શ્રેષ્ઠ બોલિંગ કરી શકતા નથી.સિરાજે સમજાવ્યું કે લાંબા આરામ બાદ વાપસી કરતી વખતે તેમના રનઅપમાં પણ તાલમેલ જોવા મળતો નહોતો. કેટલીક વખત તેમના પગલાં નાના તો કેટલીક વખત મોટા પડી રહ્યા હતા. તેના કારણે તેમની લય તૂટી અને બોલિંગની ઝડપ પર પણ અસર પડી.જોકે ફાઇનલની બીજી ઇનિંગમાં સિરાજ વધુ સારા દેખાયા હતા. તેમની લાઇન અને લેન્થમાં સુધારો થયો હતો અને બોલિંગમાં પણ પહેલાની સરખામણીમાં વધુ લય જોવા મળી હતી. બીજી ઇનિંગમાં તેમણે 16 ઓવરમાં માત્ર 47 રન આપ્યા અને 1 વિકેટ પણ મેળવી.સિરાજે કહ્યું કે હવે તેઓ ફરી પોતાની જૂની ઝડપ અને લય તરફ આગળ વધી રહ્યા છે. દલીપ ટ્રોફીમાં વધારે વિકેટ ન મળી હોવા છતાં આ મેચનો અનુભવ આગામી આંતરરાષ્ટ્રીય મેચોમાં તેમના માટે ઉપયોગી સાબિત થઈ શકે છે.
હવે વેસ્ટ ઈન્ડિઝ સામે થશે પરીક્ષા
સિરાજે જૂનમાં ભારત અને અફઘાનિસ્તાન વચ્ચે રમાયેલી એકમાત્ર ટેસ્ટ મેચમાં ભાગ લીધો હતો. ત્યારબાદ તેઓ 2 મહિનાથી વધુ સમય સુધી કોઈ મેચ રમ્યા નહોતા. 19 ઓગસ્ટે શ્રીલંકા સામેની ટેસ્ટ મેચથી તેમની વાપસી થઈ હતી.હવે દલીપ ટ્રોફી ફાઇનલ બાદ સિરાજની નજર આગામી આંતરરાષ્ટ્રીય પડકાર પર રહેશે. ભારત અને વેસ્ટ ઈન્ડિઝ વચ્ચે 27 સપ્ટેમ્બરથી વનડે સિરીઝ શરૂ થવાની છે. આ સિરીઝમાં સિરાજને તક મળે છે તો તેમની લય અને ઝડપ પર ખાસ નજર રહેશે.લાંબા આરામ બાદ પોતાની જૂની લય પાછી મેળવી ચૂક્યા છે કે નહીં, તેનો સાચો જવાબ હવે આંતરરાષ્ટ્રીય ક્રિકેટમાં જ મળશે.
આ પણ વાંચો - Team Indiaથી આ દિગ્ગજની થશે વિદાય..BCCIને આપ્યું રાજીનામું, જાણો સમગ્ર મામલો
