ભારતીય મહિલા ક્રિકેટ ટીમની અનુભવી બેટર હરમનપ્રીત કૌર ઝિમ્બાબ્વે સામે ત્રીજી T20 મેચમાં શાનદાર બેટિંગ કર્યા બાદ લાઇવ ટીવી પર ભાવુક થઈ ગઈ હતી. તેણે માત્ર 41 બોલમાં અણનમ 91 રન ફટકાર્યા હતા. જોકે, ઇનિંગ્સ પૂરી થયા બાદ પૂર્વ ભારતીય કોચ WV રમન સાથે વાત કરતી વખતે તેની આંખોમાં આંસુ આવી ગયા હતા. હરમનપ્રીત આંસુ લૂછતી જોવા મળી અને પછી માઇક પરત આપીને ત્યાંથી ચાલી ગઈ હતી.

WV રમન સાથે વાત કરતી વખતે ભાવુક થઈ હરમનપ્રીત

હરમનપ્રીત કૌર ત્રીજી T20 મેચમાં ચોથા નંબર પર બેટિંગ કરવા આવી હતી. શરૂઆતમાં તેને રન બનાવવા માટે થોડો સમય લાગ્યો, પરંતુ પછી તેણે આક્રમક બેટિંગ કરી. તેની ઇનિંગ્સમાં 10 ચોગ્ગા અને 5 છગ્ગાનો સમાવેશ હતો. ઇનિંગ્સ બ્રેક દરમિયાન પૂર્વ કોચ WV રમન તેની સાથે વાત કરી રહ્યા હતા ત્યારે હરમનપ્રીત ભાવુક થઈ ગઈ. જોકે, ઇન્ટરવ્યૂ દરમિયાન તેણે રડવાનું કોઈ ચોક્કસ કારણ જણાવ્યું નહોતું. બાદમાં તેણે રમનના સમર્થન અને તેમની સલાહ માટે આભાર માન્યો હતો.

https://x.com/SutanuBasak/status/2112565043141513609?s=20

‘તમે કહ્યું હતું કે હવે તારે જે કરવું હોય એ કર’

હરમનપ્રીતે WV રમનને યાદ કરતાં કહ્યું કે જ્યારે તેઓ ટીમ સાથે જોડાયા ત્યારે તેમણે તેને કહ્યું હતું કે હવે તારે જે કરવું હોય તે કર. હરમનપ્રીતના કહેવા પ્રમાણે, આ શબ્દોએ તેને પોતાની રીતે રમવાની અને મેદાન પર રમતનો આનંદ માણવાની પ્રેરણા આપી. તેણે પોતાની બેટિંગ કોચ હિમાંશુ ચાવલાનો પણ આભાર માન્યો. હરમનપ્રીતે કહ્યું કે એશિયન ગેમ્સ બાદ તેને નેટ્સમાં બેટિંગની પ્રેક્ટિસ માટે સમય મળ્યો હતો અને તેના કોચે તેની બેટિંગ પર ઘણી મહેનત કરી હતી.

10 મેચ બાદ ફટકારી અડધી સદી

હરમનપ્રીત કૌર માટે આ ઇનિંગ્સ ખાસ રહી હતી. ઝિમ્બાબ્વે સામેની મેચ પહેલાં તેની છેલ્લી 10 મેચમાં એક પણ અડધી સદી નહોતી. એશિયા કપ અને એશિયન ગેમ્સ દરમિયાન પણ તે બેટિંગમાં પોતાની છાપ છોડી શકી નહોતી. પરંતુ ઝિમ્બાબ્વે સામે તેણે 41 બોલમાં અણનમ 91 રન બનાવીને વાપસી કરી. તેની સાથે શેફાલી વર્માએ પણ 37 બોલમાં 69 રન ફટકાર્યા હતા. બંનેની આક્રમક બેટિંગને કારણે ભારતે 20 ઓવરમાં 7 વિકેટે 216 રન બનાવ્યા હતા.

ભારતે 3-0થી શ્રેણી જીતી

ભારતીય બોલરોએ પણ શાનદાર પ્રદર્શન કર્યું હતું. ઝિમ્બાબ્વેની ટીમ 20 ઓવરમાં 7 વિકેટે 124 રન જ બનાવી શકી હતી. ભારતે આ મેચ 92 રનથી જીતીને ત્રણ મેચની T20 શ્રેણી 3-0થી પોતાના નામે કરી હતી. 

નોંધનીય છે કે હરમનપ્રીત કૌરે આ શ્રેણી પહેલાં ભારતીય ટીમની તમામ ફોર્મેટની કેપ્ટનશિપ છોડી દીધી હતી. હવે તેણે બેટિંગ પર ધ્યાન કેન્દ્રિત કરવાની અને મેદાન પર રમતનો આનંદ માણવાની વાત કરી છે. ઝિમ્બાબ્વે સામેની આ ઇનિંગ્સ બાદ તેની ભાવુક ક્ષણનો વીડિયો પણ ચર્ચામાં આવ્યો છે.

આ પણ વાંચો: U19 મહિલા T20 વર્લ્ડ કપ 2027નું શેડ્યૂલ જાહેર, જાણો ભારતની પહેલી મેચ ક્યારે રમાશે