પાકિસ્તાન,શ્રીલંકા અને ઇંગ્લેન્ડ વચ્ચે રમાઈ રહેલી વનડે ત્રિકોણીય શ્રેણીની વચ્ચે પાકિસ્તાન ક્રિકેટ ટીમમાં મોટો ફેરફાર કરવામાં આવ્યો છે.સતત ખરાબ ફોર્મ સામે ઝઝૂમી રહેલા યુવા ઓપનર સેમ અયૂબને ટીમ મેનેજમેન્ટે સ્ક્વોડમાંથી મુક્ત કર્યો છે.હવે તેના સ્થાને T20 ટીમના કેપ્ટન અને આક્રમક બેટર સાહિબઝાદા ફરહાનને વનડે ટીમમાં સામેલ કરવામાં આવ્યો છે.

ત્રણ મેચમાં સેમ અયૂબનો ફ્લોપ શો

ત્રિકોણીય શ્રેણીમાં સેમ અયૂબ પાકિસ્તાન માટે ઓપનિંગની જવાબદારી સંભાળી રહ્યો હતો. જોકે, તે અપેક્ષા પ્રમાણે પ્રદર્શન કરી શક્યો નથી.શ્રીલંકા સામેની પ્રથમ મેચમાં તેણે માત્ર 7 રન બનાવ્યા હતા. ત્યારબાદ ઇંગ્લેન્ડ સામેની બીજી મેચમાં તે 8 રન બનાવીને આઉટ થયો હતો. ત્રીજી મેચમાં પણ તેના બેટમાંથી માત્ર 6 રન આવ્યા હતા.આ રીતે સેમ અયૂબ ત્રણેય મેચમાં બે આંકડાનો સ્કોર નોંધાવવામાં નિષ્ફળ રહ્યો હતો. તેના વહેલા આઉટ થવાને કારણે પાકિસ્તાનની શરૂઆત પર અસર પડી હતી. જોકે, મધ્યક્રમના બેટરોએ જવાબદારી સંભાળીને ટીમને સારા સ્કોર સુધી પહોંચાડવામાં મદદ કરી હતી.સેમ અયૂબને બોલિંગ કરવાની તક પણ મળી હતી, પરંતુ તે વિકેટ લેવામાં સફળ રહ્યો નહોતો. સતત નિરાશાજનક પ્રદર્શન બાદ તેણે બેટિંગ પર વધુ ધ્યાન કેન્દ્રિત કરવાનો નિર્ણય લીધો હોવાનું પાકિસ્તાન ક્રિકેટ બોર્ડે જણાવ્યું છે.

https://x.com/CallMeSheri1_/status/2114589607408906382?s=20


સાહિબઝાદા ફરહાનને મળી તક

પાકિસ્તાન ક્રિકેટ બોર્ડના જણાવ્યા અનુસાર, સેમ અયૂબે પોતાની બેટિંગ સુધારવા અને આત્મવિશ્વાસ પાછો મેળવવા માટે સ્થાનિક ક્રિકેટ રમવાની ઇચ્છા વ્યક્ત કરી હતી. બોર્ડે તેના નિર્ણયનો સ્વીકાર કરીને તેને બાકીની ત્રિકોણીય શ્રેણીમાંથી મુક્ત કર્યો છે.તેની જગ્યાએ સાહિબઝાદા ફરહાનને પાકિસ્તાનની વનડે ટીમમાં સ્થાન આપવામાં આવ્યું છે. હવે આગામી મેચોમાં તે ઓપનિંગની જવાબદારી સંભાળી શકે છે.સાહિબઝાદા ફરહાન માટે આ તક મહત્ત્વપૂર્ણ છે. તાજેતરમાં તેને પાકિસ્તાનની T20 ટીમનો કેપ્ટન બનાવવામાં આવ્યો હતો અને હવે તેને વનડે ટીમમાં પણ સ્થાન મળ્યું છે. જો તે આગામી મેચોમાં સારું પ્રદર્શન કરે, તો પાકિસ્તાનની બેટિંગને મજબૂત શરૂઆત મળી શકે છે.

પાકિસ્તાન ફાઇનલમાં પહોંચ્યું, હવે શ્રીલંકા સામે મુકાબલો

ત્રિકોણીય શ્રેણીમાં પાકિસ્તાનનું પ્રદર્શન અત્યાર સુધી શાનદાર રહ્યું છે. ટીમે પોતાની શરૂઆતની ત્રણેય મેચ જીતીને 6 પોઇન્ટ મેળવ્યા છે અને ફાઇનલમાં સ્થાન નિશ્ચિત કર્યું છે.બીજી તરફ, શ્રીલંકાના ખાતામાં બે મેચ બાદ 2 પોઇન્ટ છે, જ્યારે ઇંગ્લેન્ડ ત્રણ મેચ રમ્યા બાદ પણ પોઇન્ટ મેળવવામાં નિષ્ફળ રહ્યું છે.

ટ્રાઇ-સિરીઝનું આગામી શિડ્યુલ
  • 27 ઓક્ટોબર: પાકિસ્તાન વિરુદ્ધ શ્રીલંકા
  • 29 ઓક્ટોબર: શ્રીલંકા વિરુદ્ધ ઇંગ્લેન્ડ
  • 31 ઓક્ટોબર: ગ્રાન્ડ ફાઇનલ (ગદ્દાફી સ્ટેડિયમ, લાહોર)

આ પણ વાંચો - Ranji Trophyમાં બિહારની ફરી ફજેતી! ચોથી વખત 100 રન પહેલાં ઓલઆઉટ, સારાંશ જૈને લીધી 7 વિકેટ