રણજી ટ્રોફી 2026-27 સીઝનમાં બિહારની બેટિંગ લાઇન-અપ ફરી એકવાર સંપૂર્ણપણે ધરાશાયી થઈ ગઈ છે. ઇન્દોરના હોલકર સ્ટેડિયમ ખાતે મધ્ય પ્રદેશ સામે રમાઈ રહેલા મુકાબલામાં બિહારની આખી ટીમ પ્રથમ ઇનિંગ્સમાં માત્ર 99 રનમાં સમેટાઈ ગઈ હતી. રણજી ટ્રોફીના ઇતિહાસમાં આ ચોથો પ્રસંગ છે જ્યારે બિહાર 100 રનનો આંકડો વટાવવામાં પણ નિષ્ફળ રહ્યું હોય. મધ્ય પ્રદેશના ઓફ-સ્પિન ઓલરાઉન્ડર સારાંશ જૈને ઘાતક સ્પિન આક્રમણ દ્વારા માત્ર 40 રન આપીને 7 વિકેટ ઝડપી બિહારની કમર તોડી નાખી હતી.

બિહાર ટીમનો ફ્લોપ શો

બિહારના કેપ્ટન સકીબુલ ગનીએ ટોસ જીતીને પ્રથમ બેટિંગ કરવાનો નિર્ણય લીધો હતો, પરંતુ મધ્ય પ્રદેશના બોલરો સામે આ નિર્ણય સંપૂર્ણપણે ઊંધો પડ્યો હતો.

રણજી ટ્રોફી ઇતિહાસનો સૌથી ઓછા સ્કોર્સની યાદી

  • 52 રન: વિરુદ્ધ સૌરાષ્ટ્ર (1994-95) – બિહારનો અત્યાર સુધીનો સૌથી ઓછો સ્કોર
  • 64 રન: વિરુદ્ધ કેરળ (2025)
  • 78 રન: વિરુદ્ધ હરિયાણા (2024)
  • 99 રન: વિરુદ્ધ મધ્ય પ્રદેશ (2026)

સારાંશ જૈને 40 રનમાં ઝડપી 7 વિકેટ

બિહારની બેટિંગને તોડી પાડવામાં મધ્ય પ્રદેશના સ્પિન ઓલરાઉન્ડર સારાંશ જૈનનો સૌથી મોટો ફાળો રહ્યો હતો. તેણે પોતાની સ્પિન બોલિંગથી બિહારના બેટરોને મુશ્કેલીમાં મૂક્યા હતા અને માત્ર 40 રન આપીને 7 વિકેટ ઝડપી હતી.ફર્સ્ટ ક્લાસ ક્રિકેટમાં એક ઇનિંગ્સ દરમિયાન સારાંશનું આ અત્યાર સુધીનું સર્વશ્રેષ્ઠ પ્રદર્શન છે. તેની શાનદાર બોલિંગના કારણે બિહારની ટીમ મોટો સ્કોર બનાવવામાં નિષ્ફળ રહી હતી.

ફર્સ્ટ ક્લાસ ક્રિકેટમાં 200 વિકેટ પૂરી કરી

આ મેચ સારાંશ જૈન માટે વધુ એક કારણસર ખાસ બની હતી. બિહાર સામે પાંચમી વિકેટ ઝડપતાં જ તેણે ફર્સ્ટ ક્લાસ ક્રિકેટમાં પોતાની 200 વિકેટ પૂરી કરી હતી. બિહારનો બેટર આદિત્ય રાજ તેની 200મી વિકેટ બન્યો હતો.આ સિદ્ધિ સાથે સારાંશે પોતાની કારકિર્દીમાં મહત્ત્વપૂર્ણ સીમાચિહ્ન પાર કર્યું છે. એક જ ઇનિંગ્સમાં 7 વિકેટ અને ફર્સ્ટ ક્લાસ ક્રિકેટમાં 200 વિકેટનો આંકડો પૂરો કરવો તેના માટે યાદગાર પ્રદર્શન બની રહ્યું છે.

બિહાર ટીમ વાપસી કરશે

મધ્ય પ્રદેશ સામે પ્રથમ ઇનિંગ્સમાં માત્ર 99 રન બનાવ્યા બાદ બિહારની ટીમ પર દબાણ વધી ગયું છે. હવે ટીમ માટે બાકીની મેચમાં વાપસી કરવી મોટો પડકાર રહેશે. બીજી તરફ, સારાંશ જૈનની શાનદાર બોલિંગથી મધ્ય પ્રદેશની ટીમને મેચમાં મજબૂત શરૂઆત મળી છે.રણજી ટ્રોફી જેવી મહત્ત્વપૂર્ણ સ્પર્ધામાં સતત નબળું બેટિંગ પ્રદર્શન બિહાર માટે ચિંતાનો વિષય બની શકે છે. હવે જોવાનું એ રહેશે કે ટીમ આગામી ઇનિંગ્સમાં સુધારેલું પ્રદર્શન કરીને મેચમાં વાપસી કરી શકે છે કે નહીં.

આ પણ વાંચો - IND vs NZ: 2 મેચમાં ફ્લોપ બાદ શું ભુવીને મળશે તક? બોલિંગ કોચનો મોટો ખુલાસો!