ક્રિકેટના મેદાન પર પોતાની સ્પિન બોલિંગથી બેટ્સમેનોને પરેશાન કરનાર યુઝવેન્દ્ર ચહલ હવે રાજકારણમાં નવી ઇનિંગ શરૂ કરવા જઈ રહ્યા છે. ભારતીય ક્રિકેટર ચહલ ભારતીય જનતા પાર્ટી (BJP)માં જોડાયા છે અને પાર્ટીએ તેમને OBC મોરચાની રાષ્ટ્રીય કાર્યકારિણીમાં વિશેષ આમંત્રિત સભ્ય બનાવ્યા છે. 21 નવેમ્બર 2026ના રોજ જાહેર થયેલી આ નિમણૂકથી ચહલનું નામ રમતગમતની સાથે રાજકીય ક્ષેત્રે પણ ચર્ચામાં આવ્યું છે. ખાસ વાત એ છે કે આ નવી જવાબદારી મળતાં પહેલાં ચહલે OBC મોરચાના રાષ્ટ્રીય અધ્યક્ષ અમરપાલ મૌર્ય સાથે મુલાકાત કરી હતી. 

ભાજપમાં જોડાતાં જ ચહલને મળી નવી જવાબદારી

યુઝવેન્દ્ર ચહલ ભારતીય જનતા પાર્ટીમાં જોડાયા છે. પાર્ટીએ તેમને પોતાના અન્ય પછાત વર્ગ મોરચા એટલે કે OBC મોરચાની રાષ્ટ્રીય કાર્યકારિણીમાં વિશેષ આમંત્રિત સભ્ય બનાવ્યા છે. આ નિમણૂક ભાજપના રાષ્ટ્રીય અધ્યક્ષ નીતિન નવીન દ્વારા કરવામાં આવી છે. ચહલનું નામ દિલ્હી હેઠળ નોંધવામાં આવ્યું છે. ચહલને આ જવાબદારી OBC મોરચામાં કરવામાં આવેલા સંગઠનાત્મક ફેરફારોના ભાગરૂપે આપવામાં આવી છે. નવી નિમણૂક પહેલાં તેમણે OBC મોરચાના રાષ્ટ્રીય અધ્યક્ષ અને રાજ્યસભાના સાંસદ અમરપાલ મૌર્ય સાથે મુલાકાત કરી હતી. ત્યારબાદ જાહેર થયેલી નવી યાદીમાં તેમનું નામ સામેલ કરવામાં આવ્યું છે.

ચહલ સાથે અન્ય બે લોકોને પણ સ્થાન

ભાજપે ચહલ ઉપરાંત ઓડિશાના પ્રોફેસર અદ્વૈત ચરણ ગડનાયક અને ઉત્તર પ્રદેશની વકીલ સીમા સમૃદ્ધિ કુશવાહાને પણ રાષ્ટ્રીય કાર્યકારિણીમાં વિશેષ આમંત્રિત સભ્ય બનાવ્યાં છે. અહીં ખાસ નોંધવા જેવી વાત એ છે કે ચહલને વિશેષ આમંત્રિત સભ્યનું સ્થાન મળ્યું છે. તેઓ OBC મોરચાના રાષ્ટ્રીય ઉપાધ્યક્ષ કે મહામંત્રી બન્યા નથી. વિશેષ આમંત્રિત સભ્ય તરીકે તેમને સંગઠનની બેઠકો અને પ્રવૃત્તિઓમાં જોડાવાની તક મળશે. તેમની ચોક્કસ કામગીરી અંગે હજુ અલગથી કોઈ વિગત જાહેર કરવામાં આવી નથી.

ભાજપે OBC મોરચાની નવી ટીમ જાહેર કરી

ચહલની નિમણૂક સાથે ભાજપે OBC મોરચાની રાષ્ટ્રીય ટીમમાં અનેક ફેરફાર કર્યા છે. પાર્ટીએ સાત રાષ્ટ્રીય ઉપાધ્યક્ષ, ત્રણ રાષ્ટ્રીય મહામંત્રી અને સાત રાષ્ટ્રીય સચિવની નિમણૂક કરી છે. આ ઉપરાંત 37 નેતાઓને રાષ્ટ્રીય કાર્યકારિણીમાં સ્થાન આપવામાં આવ્યું છે. ગુજરાતના દશરથજી ઠાકોરને રાષ્ટ્રીય સચિવ બનાવવામાં આવ્યા છે, જ્યારે મહેન્દ્રભાઈ ઝુંગીને રાષ્ટ્રીય કાર્યકારિણી સભ્ય તરીકે જવાબદારી સોંપવામાં આવી છે. તમામ નિમણૂકો તાત્કાલિક અસરથી અમલમાં આવી છે.

આ પણ વાંચો: ભાજપના OBC મોરચાની નવી ટીમ જાહેર, ગુજરાતના દશરથજી ઠાકોરને રાષ્ટ્રીય જવાબદારી