સૈયદ મુશ્તાક અલી ટ્રોફી 2026-27 પહેલાં રાજસ્થાન ક્રિકેટ ટીમે પોતાની નવી ટીમ જાહેર કરી છે. ભારતીય ઝડપી બોલર દીપક ચહરને ટીમનો કેપ્ટન બનાવવામાં આવ્યો છે, જ્યારે ડાબા હાથના સ્પિનર માનવ સુથારને વાઇસ કેપ્ટનની જવાબદારી સોંપવામાં આવી છે. રાજસ્થાન ક્રિકેટ એસોસિએશને ટૂર્નામેન્ટ માટે 15 ખેલાડીઓની પસંદગી કરી છે. દીપક ચહર ભારત માટે 13 વનડે અને 25 T20 આંતરરાષ્ટ્રીય મેચ રમી ચૂક્યો છે. તે પોતાની સ્વિંગ બોલિંગ માટે જાણીતો છે. હવે ઘરેલુ T20 ટૂર્નામેન્ટમાં તેને રાજસ્થાનની આગેવાની કરવાની તક મળી છે. માનવ સુથાર પણ ટીમ માટે મહત્વનો ખેલાડી છે. ડાબા હાથની સ્પિન બોલિંગ ઉપરાંત તે જરૂર પડે ત્યારે બેટિંગમાં પણ યોગદાન આપી શકે છે. વાઇસ કેપ્ટન તરીકે તેની પસંદગીથી ટીમમાં તેને મળતું મહત્વ સ્પષ્ટ થાય છે.
દીપકનો ભાઈ રાહુલ ચહર પણ ટીમમાં
રાજસ્થાનની ટીમમાં દીપક ચહરના નાના ભાઈ રાહુલ ચહરને પણ સ્થાન મળ્યું છે. રાહુલ લેગ સ્પિનર છે અને ભારત માટે 1 વનડે તથા 6 T20 આંતરરાષ્ટ્રીય મેચ રમી ચૂક્યો છે. રાહુલ આ ઘરેલુ સિઝનમાં બીજી ટીમ તરફથી રમી શકે તેવી ચર્ચા હતી, પરંતુ હવે તે રાજસ્થાન તરફથી જ રમશે. આ રીતે બંને ભાઈ એક જ ટીમમાં જોવા મળશે. ટીમમાં IPLમાં રમી ચૂકેલા મહિપાલ લોમરોર, વિકેટકીપર બેટર કાર્તિક શર્મા અને મુકુલ ચૌધરીનો પણ સમાવેશ કરવામાં આવ્યો છે.