ભારતીય ટીમ 2 મેચની ટેસ્ટ સિરીઝ માટે આજે શ્રીલંકા પહોંચી હતી. યુવા લેફ્ટ બેટ્સમેન સાઈ સુદર્શન ટીમ સાથે પ્રવાસ પર ન હતો ગયો. ટીમમાં તેમનું સ્થાન સંપૂર્ણપણે તેની ફિટનેસ પર નિર્ભર હતું, પરંતુ તે હજુ સુધી સંપૂર્ણપણે સ્વસ્થ થયો નથી.
સાઈ સુદર્શન હાલમાં બેંગલુરુના સેન્ટર ઓફ એક્સેલન્સમાં રિહેબમાંથી પસાર થઈ રહ્યો છે. સૂત્રોના જણાવ્યા મુજબ સાઈ સુદર્શન પહેલી ટેસ્ટ ગુમાવે તેવી શક્યતા છે, જે ટીમ ઈન્ડિયા માટે મોટો ઝટકો હોઈ શકે છે. પરંતુ તેઓ બીજી ટેસ્ટ પહેલા ટીમમાં જોડાઈ શકે છે.
મીડિયા રિપોર્ટ મુજબ સાઈ સુદર્શન હાલમાં બેંગલુરુના સેન્ટર ઓફ એક્સેલન્સ (COE) માં તેના પગના અંગૂઠાની ઈજામાંથી સ્વસ્થ થઈ રહ્યો છે. તે હાલમાં રિહેબમાંથી પસાર થઈ રહ્યો છે અને નેટમાં એક કલાકથી વધુ સમય સુધી બેટિંગનો અભ્યાસ કરી રહ્યો છે. આગામી 3 થી 4 દિવસમાં તેની ફિટનેસનું મૂલ્યાંકન કર્યા પછી તે આગામી મેચોમાં રમી શકશે કે નહીં તેને લઈને અંતિમ નિર્ણય લેવામાં આવશે. તમને જણાવી દઈએ કે તેને આ ઈજા ભારત Aના તાજેતરના શ્રીલંકા પ્રવાસ દરમિયાન થઈ હતી.
સૂત્રએ વધુમાં જણાવ્યું હતું કે ઈન્ટરનેશનલ ક્રિકેટમાં પાછા ફરતા પહેલા સાઈ સુદર્શન માટે સંપૂર્ણપણે ફિટ હોવું ખૂબ જ મહત્વપૂર્ણ છે. તે હર્ષિત રાણા જેવી સ્થિતિનું પુનરાવર્તન કરવા માગતા નથી, જેને મેદાનમાં પરત ફર્યા પછી તરત જ તેની ઈજાનું પુનરાવર્તન થયું હતું. ભારત અને શ્રીલંકા વચ્ચેની બીજી ટેસ્ટ 23 ઓગસ્ટથી કોલંબોમાં શરૂ થશે. સાઈ સુદર્શને બેંગલુરુમાં સેન્ટર ઓફ એક્સેલન્સ ખાતે નેટમાં બેટિંગ શરૂ કરી દીધી હોવાથી, મેડિકલ ટીમને આશા છે કે તે બીજી ટેસ્ટ માટે ટીમ સાથે પરત ફરશે.
ભારત અને શ્રીલંકા વચ્ચે પહેલી ટેસ્ટ મેચ 15 થી 19 ઓગસ્ટ દરમિયાન અને બીજી ટેસ્ટ મેચ 23 થી 27 ઓગસ્ટ દરમિયાન રમાશે. તે પહેલા બંને ટીમો 7 થી 9 ઓગસ્ટ દરમિયાન 3 દિવસની પ્રેક્ટિસ મેચ રમશે. શરૂઆતમાં આ મેચ 4 દિવસ ચાલવાની યોજના હતી, પરંતુ હવે આ મેચ ઘટાડીને 3 દિવસ કરવામાં આવી છે.
શુભમન ગિલના નેતૃત્વ હેઠળની ભારતીય ટીમ આ પ્રેક્ટિસ મેચનો ઉપયોગ પોતાની તૈયારીઓને મજબૂત બનાવવા માટે કરશે. વર્લ્ડ ટેસ્ટ ચેમ્પિયનશિપના દૃષ્ટિકોણથી આ આખી સિરીઝ ભારત માટે મહત્વપૂર્ણ છે.
આ પણ વાંચો: 25 સિક્સ, 15 ચોગ્ગા અને 233 રન... અભિષેક શર્માએ મચાવી ધૂમ, બોલર્સ થયા હેરાન