ભારત અને ન્યૂઝીલેન્ડ વચ્ચે 4 નવેમ્બરથી શરૂ થઈ રહેલી 5 મેચની વનડે સિરીઝ પહેલાં ટીમ ઈન્ડિયાએ ઓકલેન્ડના ઈડન પાર્ક મેદાન પર પોતાની કમર કસી લીધી છે. સોમવારે યોજાયેલા ભારતીય ટીમના મહત્વપૂર્ણ પ્રેક્ટિસ સેશનમાં યુવા કેપ્ટન શુભમન ગિલનો એક અલગ જ અંદાજ જોવા મળ્યો હતો. ગિલે આગામી હાઈ-વોલ્ટેજ મેચ માટે મેદાન પર સતત 3 કલાક સુધી સખત મહેનત કરીને પરસેવો પાડ્યો હતો. બીજી તરફ, ટીમના વરિષ્ઠ ખેલાડીઓ વિરાટ કોહલી અને રોહિત શર્મા સહિત ઓપનર ઋતુરાજ ગાયકવાડે નેટ પ્રેક્ટિસથી અંતર જાળવી રાખ્યું હતું.
શુભમન ગિલે 3 કલાક સુધી મેદાન પર વહાવ્યો પરસેવો
ઓકલેન્ડના ઈડન પાર્કમાં સોમવારે શુભમન ગિલે લાંબું પ્રેક્ટિસ સેશન કર્યું હતું. રવિવારે તેમણે અભ્યાસ કર્યો નહોતો, પરંતુ સોમવારે સવારે મળેલી તકનો ભરપૂર ઉપયોગ કર્યો હતો.ગિલે લગભગ 3 કલાક સુધી બેટિંગ, થ્રોડાઉન અને ફિલ્ડિંગની પ્રેક્ટિસ કરી હતી. તેમની તૈયારીની શરૂઆત થ્રોડાઉનથી થઈ હતી અને અંત સ્પિન બોલિંગ કોચ સાયરાજ બહુતુલે સાથેના ફિલ્ડિંગ સેશનથી થયો હતો.ગિલે માત્ર બેટિંગ પર જ નહીં, પરંતુ અલગ-અલગ ફિલ્ડિંગ પોઝિશન પર પણ ખાસ ધ્યાન આપ્યું હતું. તેમણે ક્લોઝ ઇન ફિલ્ડિંગ અને સ્લિપ કેચિંગની પ્રેક્ટિસ કર્યા બાદ બાઉન્ડ્રી પાસે ઊંચા કેચ પકડવાની પણ મહેનત કરી હતી.
કેએલ રાહુલે પણ કરી બેટિંગની તૈયારી
સોમવારના પ્રેક્ટિસ સેશનમાં કેએલ રાહુલ પણ મેદાન પર ઉતર્યા હતા. ગિલ અને રાહુલ એવા બે બેટ્સમેન હતા, જેમણે નેટ્સમાં બેટિંગનો અભ્યાસ કર્યો હતો.રાહુલે શરૂઆતમાં વિકેટકીપિંગ ગ્લવ્સ પહેરીને પ્રેક્ટિસ કરી હતી. તેમણે લગભગ 15 મિનિટ સુધી દયાનંદ ગરાની અને નુવાન સેનવિરત્નેના થ્રોડાઉનનો સામનો કર્યો હતો. ત્યારબાદ તેમણે ગિલ સાથે બેટિંગ માટે પેડ પહેર્યા હતા.બંને ખેલાડીઓએ સેન્ટર વિકેટ પર બેટિંગ કરી હતી. પ્રેક્ટિસ દરમિયાન એક-એક મિનિટ સુધી બોલ રમ્યા બાદ તેઓ બીજા છેડે જઈને પોતાના સાથી ખેલાડીને બેટિંગની તક આપતા હતા. આ સમગ્ર પ્રક્રિયા પર સ્પિન બોલિંગ કોચ સાયરાજ બહુતુલે નજર રાખી રહ્યા હતા.
https://x.com/ImTanujSingh/status/2117185333746098556?a=FLfqBFYkmZnJq2snllk&s=20
વિરાટ કોહલી અને રોહિત શર્માએ નેટ પ્રેક્ટિસ ટાળી
એક તરફ શુભમન ગિલ અને કેએલ રાહુલ લાંબી પ્રેક્ટિસ કરી રહ્યા હતા, તો બીજી તરફ વિરાટ કોહલીએ બેટિંગ અને ફિલ્ડિંગ પ્રેક્ટિસમાં ભાગ લીધો નહોતો.ટીમના પ્રેક્ટિસ સેશનના લગભગ એક કલાક બાદ વિરાટ કોહલી મેદાનમાંથી બહાર નીકળતા જોવા મળ્યા હતા. તેમણે વેન્યુ પર પોતાનું જિમ સેશન પૂર્ણ કર્યું હતું અને ત્યારબાદ કારમાં બેસીને રવાના થયા હતા.વિરાટ કોહલીની સાથે રોહિત શર્મા અને ઋતુરાજ ગાયકવાડે પણ નેટ પ્રેક્ટિસથી દૂર રહેવાનું પસંદ કર્યું હતું. જોકે, માત્ર નેટ પ્રેક્ટિસમાં ભાગ ન લેવાના આધારે તેમની ફિટનેસ કે મેચમાં રમવાની સ્થિતિ અંગે કોઈ નિષ્કર્ષ કાઢી શકાય નહીં.
પ્રથમ વનડે પહેલાં બંને ટીમોની તૈયારીઓ તેજ
ભારતીય ટીમ મંગળવારે બપોરના સમયે ફરી પ્રેક્ટિસ કરવાની છે, જ્યારે ન્યૂઝીલેન્ડની ટીમ સવારે અભ્યાસ કરશે.ભારત અને ન્યૂઝીલેન્ડ વચ્ચે 5 મેચની વનડે સિરીઝની પ્રથમ મેચ ઓકલેન્ડના ઈડન પાર્કમાં રમાવાની છે. આ સિરીઝમાં શુભમન ગિલ ભારતીય ટીમની કેપ્ટનશિપ કરશે. વિરાટ કોહલી અને રોહિત શર્મા જેવા અનુભવી ખેલાડીઓની હાજરીને કારણે ચાહકોમાં પણ ઉત્સુકતા વધી છે.
આ પણ વાંચો - IND vs NZ : પ્રથમ વનડે પહેલાં ટીમ ઈન્ડિયાની ચિંતા વધી, ઓકલેન્ડના આંકડા નિરાશાજનક!
