IPL 2027 પહેલાં ખેલાડીઓની અદલાબદલીને લઈને ક્રિકેટ જગતમાં ચર્ચા તેજ બની છે. આ વખતે દિલ્હી કેપિટલ્સના કેપ્ટન અને ભારતીય ઓલરાઉન્ડર અક્ષર પટેલનું નામ ચર્ચાના કેન્દ્રમાં છે. અહેવાલો અનુસાર, ચેન્નાઈ સુપર કિંગ્સ અક્ષરને પોતાની ટીમમાં સામેલ કરવા ઇચ્છે છે. આ સંભવિત સોદામાં દિલ્હી તરફથી આશુતોષ શર્માનું નામ પણ જોડાયું છે. બીજી તરફ, ચેન્નાઈના ડેવાલ્ડ બ્રેવિસ અને નૂર અહમદ દિલ્હી કેપિટલ્સમાં જઈ શકે તેવી અટકળો છે. જોકે આ ચાર ખેલાડીઓની અદલાબદલી અંગે હજુ સુધી કોઈ સત્તાવાર પુષ્ટિ થઈ નથી.
અક્ષર સાથે આશુતોષનું નામ પણ ચર્ચામાં
અહેવાલો પ્રમાણે, CSK અને દિલ્હી કેપિટલ્સ વચ્ચે સંભવિત ટ્રેડને લઈને વાતચીત ચાલી રહી હોવાની ચર્ચા છે. આ સોદો થાય તો ચેન્નાઈને અક્ષર પટેલ જેવા અનુભવી ભારતીય ઓલરાઉન્ડર ઉપરાંત આશુતોષ શર્મા જેવો આક્રમક બેટ્સમેન પણ મળી શકે છે. અક્ષર ડાબા હાથનો સ્પિન બોલર હોવાની સાથે ઉપયોગી બેટિંગ પણ કરી શકે છે. બીજી તરફ આશુતોષ મધ્યક્રમમાં ઝડપી રન બનાવવાની ક્ષમતા ધરાવે છે. તેથી આ બંને ખેલાડીઓ ચેન્નાઈની ટીમની બે અલગ જરૂરિયાતો પૂરી કરી શકે છે. સંભવિત સોદામાં ચેન્નાઈ તરફથી ડેવાલ્ડ બ્રેવિસ અને નૂર અહમદના નામ સામે આવ્યા છે. બ્રેવિસ આક્રમક બેટિંગ માટે જાણીતો છે, જ્યારે નૂર અહમદ સ્પિન બોલિંગનો વિકલ્પ છે. જોકે કયા ખેલાડીઓ અંતિમ સોદાનો ભાગ બનશે તે અંગે હજુ સ્પષ્ટતા નથી.
અશ્વિનની પોસ્ટથી અટકળોને મળ્યો વેગ
ભારતના પૂર્વ સ્પિનર રવિચંદ્રન અશ્વિને પણ સોશિયલ મીડિયા પર એક પોસ્ટ કરી હતી, જેને CSK અને દિલ્હી વચ્ચેની સંભવિત ટ્રેડ ચર્ચા સાથે જોડવામાં આવી રહી છે. તેમણે લખ્યું હતું કે જો આ સોદો આયોજન પ્રમાણે પાર પડશે તો તે ટ્રોફી નંબર-6 માટેની યોગ્ય શોધ હશે. જોકે અશ્વિને પોતાની પોસ્ટમાં અક્ષર પટેલનું નામ સ્પષ્ટ રીતે લીધું નહોતું. બીજી તરફ, દિલ્હી કેપિટલ્સના સહમાલિક પાર્થ જિંદલે અગાઉ અક્ષરનું સમર્થન કર્યું હતું. ફ્રેન્ચાઇઝીએ સોશિયલ મીડિયા પર અક્ષરનો વીડિયો પણ મૂક્યો હતો, જેમાં તેને દિલ્હી સાથેના જોડાણને લઈને સંદેશ આપવામાં આવ્યો હતો. આથી અક્ષર દિલ્હી સાથે જ રહેશે તેવી અટકળોને પણ બળ મળ્યું છે.
CSKએ અગાઉ પણ કર્યો છે મોટો ટ્રેડ
IPL 2027 પહેલાં ચેન્નાઈ સુપર કિંગ્સે સનરાઇઝર્સ હૈદરાબાદ સાથે 4 ખેલાડીઓનો ટ્રેડ પૂર્ણ કર્યો છે. આ સોદામાં CSKએ ખલીલ અહમદ અને નાથન એલિસને હૈદરાબાદને આપ્યા હતા, જ્યારે તેના બદલામાં લિયમ લિવિંગસ્ટોન અને જેક એડવર્ડ્સને પોતાની ટીમમાં સામેલ કર્યા હતા.
હવે અક્ષર પટેલ સાથે જોડાયેલી અટકળો વચ્ચે ચેન્નાઈની ટીમમાં વધુ ફેરફાર થઈ શકે છે કે નહીં તેના પર ચાહકોની નજર છે. IPL 2027 માટે ખેલાડીઓની જાળવી રાખવાની યાદી જાહેર કરવાની અંતિમ તારીખ 17 નવેમ્બર નક્કી કરવામાં આવી છે. ત્યાં સુધીમાં ટ્રેડ અંગે વધુ સ્પષ્ટતા સામે આવી શકે છે.
આ પણ વાંચો: Glenn Phillips સામે કેમ કરવામાં આવે છે જ્હોન સીના સેલિબ્રેશન ? કોહલી પછી હવે રોહિત શર્માએ પણ કર્યું 'You Can't See Me' સેલિબ્રેશન!
