ભારતીય ક્રિકેટ ટીમના ઓલરાઉન્ડર રવિન્દ્ર જાડેજાએ BCCIની એક પોસ્ટ પર એવી કમેન્ટ કરી છે, જે હવે સોશિયલ મીડિયા પર ચર્ચામાં છે. BCCIએ સિનિયર મેન્સ સિલેક્શન કમિટીના ખાલી પડેલા ચેરમેન પદ માટે અરજી મંગાવી છે. આ પોસ્ટ પર જાડેજાએ હસતા ઈમોજી સાથે લખ્યું, ‘What the procedure?’ એટલે કે, ‘પ્રક્રિયા શું છે?’ જાડેજા સોશિયલ મીડિયા પ્લેટફોર્મ X પર ખાસ એક્ટિવ રહેતો નથી. આ કારણે તેની આ કમેન્ટે વધુ ધ્યાન ખેંચ્યું છે.
અજિત અગરકરનું પદ 4 ઓક્ટોબરે ખાલી થયું
BCCIના સિનિયર મેન્સ સિલેક્શન કમિટીના ચેરમેન તરીકે અજિત અગરકરનો કાર્યકાળ 4 ઓક્ટોબરે પૂરો થયો હતો. તેમણે જુલાઈ 2023માં આ જવાબદારી સંભાળી હતી અને હવે તેમણે કાર્યકાળ વધારવાની ઈચ્છા વ્યક્ત કરી નથી. અગરકરની જગ્યાએ હાલમાં પૂર્વ ભારતીય સ્પિનર પ્રજ્ઞાન ઓઝા વચગાળાના ચેરમેન તરીકે જવાબદારી સંભાળી રહ્યા છે. કમિટીમાં શિવ સુંદર દાસ, અજય રાત્રા અને આરપી સિંહ પણ સામેલ છે. અગરકરના કાર્યકાળમાં ભારતે 2024 T20 વર્લ્ડ કપ, 2025 ચેમ્પિયન્સ ટ્રોફી અને 2026 T20 વર્લ્ડ કપ જીત્યા હતા. તેમની સામે હવે નવા ચેરમેનની પસંદગી કરવાની જવાબદારી BCCIની છે.
જાડેજા અને અગરકરનું જૂનું કનેક્શન પણ છે
જાડેજાની કમેન્ટને કારણે અગરકર સાથેના તેના અગાઉના સિલેક્શન કનેક્શનની પણ ચર્ચા થઈ રહી છે. અગરકરના કાર્યકાળ દરમિયાન જાડેજાને 2024ની શ્રીલંકા સામેની વનડે સિરીઝ અને 2025ની ઓસ્ટ્રેલિયા સામેની વનડે સિરીઝમાંથી બહાર રાખવામાં આવ્યો હતો. જોકે અગરકરે અનેક પ્રસંગે જાડેજાને ભારતની વનડે યોજનાનો મહત્વનો હિસ્સો ગણાવ્યો હતો. જાડેજાએ પણ અગાઉ સિલેક્શન અંગે કહ્યું હતું કે ખેલાડીઓની પસંદગી તેના હાથમાં નથી અને સિલેક્ટર્સ, કોચ તથા કેપ્ટન પાસે પોતાના કારણો હોય છે.
જાડેજા ખરેખર સિલેક્ટર બનવા માંગે છે?
જાડેજાની ‘What the procedure?’ કમેન્ટ બાદ સોશિયલ મીડિયા પર અલગ-અલગ ચર્ચા શરૂ થઈ છે. જોકે તેની કમેન્ટને વાસ્તવિક રીતે સિલેક્ટર પદ માટે અરજી કરવાની જાહેરાત તરીકે જોવી યોગ્ય નથી. તેણે માત્ર BCCIની પોસ્ટ પર મજાકિયા અંદાજમાં પ્રશ્ન કર્યો છે. બીજી તરફ, BCCI હવે અગરકરના સ્થાને નવા ચેરમેનની પસંદગી કરશે. આ નિમણૂક એવા સમયે થઈ રહી છે જ્યારે ભારત 2027 વનડે વર્લ્ડ કપની તૈયારી કરી રહ્યું છે, તેથી નવા ચેરમેનની ભૂમિકા મહત્વની રહેશે.
ગંભીરે પણ અગરકરને યાદ કર્યા
અગરકરના કાર્યકાળના અંત બાદ મુખ્ય કોચ ગૌતમ ગંભીરએ પણ સોશિયલ મીડિયા પર તેમની પ્રશંસા કરી હતી. ગંભીરએ ભારતની 3 ICC ટ્રોફીને અગરકરના ‘ટીમ ફર્સ્ટ’ અભિગમ સાથે જોડીને તેમને ભવિષ્ય માટે શુભેચ્છા પાઠવી હતી.
જાડેજાની એક નાની કમેન્ટે હવે આ સમગ્ર ઘટનાને વધુ રસપ્રદ બનાવી દીધી છે.
આ પણ વાંચો: South africaની SA20 લીગમાં કેમ એક પણ ભારતિય ખેલાડી નથી? જાણો BCCIનો કયો નિયમ રોકે છે
