લંડન: ICC મહિલા ટી20 વર્લ્ડ કપ 2026ની સેમિફાઇનલમાં પહોંચવા માટેની ‘કરો અથવા મરો’ જેવી મેચમાં ભારતીય મહિલા ટીમે ઓસ્ટ્રેલિયા સામે 20 ઓવરમાં 4 વિકેટે 170 રન બનાવી મજબૂત સ્કોર નોંધાવ્યો. ટીમની કેપ્ટન હરમનપ્રીત કૌરે શાનદાર અને ઝડપી અડધી સદી ફટકારી ભારતને લડાયક સ્કોર સુધી પહોંચાડ્યું.
હરમનપ્રીતે મેગ લેનિંગની બરાબરી કરી
મહિલા T20 વર્લ્ડ કપમાં કેપ્ટન તરીકે હરમનપ્રીતની આ પાંચમી અડધી સદી છે. આ સાથે, હરમનપ્રીતે મહિલા T20 વર્લ્ડ કપમાં કેપ્ટન તરીકે સૌથી વધુ 50 કે તેથી વધુ રન બનાવવાના સંદર્ભમાં હવે વિશ્વના અગ્રણી કેપ્ટનોની બરાબરી કરી લીધી છે. તે આ યાદીમાં ઇંગ્લેન્ડની ચાર્લોટ એડવર્ડ્સ અને ઓસ્ટ્રેલિયાની મેગ લેનિંગ સાથે ટોચનું સ્થાન ધરાવે છે, જેમના કેપ્ટન તરીકે પાંચ-પાંચ પચાસ-પ્લસ સ્કોર છે. તેણી પછી શ્રીલંકાની ચમારી અથાપટ્ટુ (4) અને ન્યુઝીલેન્ડની સુઝી બેટ્સ (3) આવે છે.
હરમનપ્રીત એક ખાસ યાદીમાં ત્રીજા સ્થાને પહોંચી
ભારતની કેપ્ટન હરમનપ્રીત કૌરે ઓસ્ટ્રેલિયા સામે T20 આંતરરાષ્ટ્રીય મેચમાં સૌથી ઝડપી અડધી સદીનો નવો રેકોર્ડ બનાવ્યો છે. તેણીએ ઐતિહાસિક લોર્ડ્સ ગ્રાઉન્ડ પર માત્ર 25 બોલમાં પોતાની અડધી સદી પૂરી કરી, જે ઓસ્ટ્રેલિયા સામે ભારતીય મહિલા બેટ્સમેન દ્વારા સૌથી ઝડપી અડધી સદી બની. વેસ્ટ ઈન્ડિઝની ડિએન્ડ્રા ડોટિન (22 બોલ) આ યાદીમાં પહેલા સ્થાને છે, ત્યારબાદ ઈંગ્લેન્ડની સોફી ડંકલી (24 બોલ) આવે છે. હરમનપ્રીત હવે આ વિશિષ્ટ ક્લબમાં ત્રીજા સ્થાને પહોંચી ગઈ છે.
હરમનપ્રીત કૌરે ઝડપી ગતિએ રન બનાવ્યા
હરમનપ્રીત કૌર 27 બોલમાં 56 રન બનાવી આઉટ થઈ, જેમાં છ ચોગ્ગા અને ત્રણ છગ્ગા ફટકાર્યા. જેમીમા રોડ્રિગ્ઝ અને શેફાલી વર્માએ દરેકે 34 રન બનાવ્યા, જ્યારે સ્મૃતિ મંધાનાએ 38 રનનું યોગદાન આપ્યું. ઓસ્ટ્રેલિયા તરફથી સોફી મોલિનેક્સે બંને વિકેટ લીધી. આ મેચમાં પહેલા બેટિંગ કરતા ભારતે ઓસ્ટ્રેલિયા માટે 171 રનનો લક્ષ્યાંક રાખ્યો હતો.
આ પણ વાંચો - Abhishek Sharma અને સેમસને શૂન્ય પર આઉટ થઈને બનાવ્યો શરમજનક રેકોર્ડ, ફક્ત ત્રીજી વખત બની આ ઘટના
