વુમન્સ એશિયા કપ 2026ની ફાઇનલમાં ભારતીય મહિલા ક્રિકેટ ટીમનો સામનો વર્તમાન ચેમ્પિયન શ્રીલંકા સામે થશે.બંને ટીમોએ ટૂર્નામેન્ટમાં અત્યાર સુધી એક પણ મેચ ગુમાવ્યા વિના ફાઇનલમાં સ્થાન બનાવ્યું છે.હવે 13 સપ્ટેમ્બરે રમાનારી ખિતાબી મેચમાં ભારતની નજર શ્રીલંકાને હરાવીને ટ્રોફી જીતવા પર રહેશે.ભારતીય ટીમે સેમિફાઇનલમાં બાંગ્લાદેશને 40 રનથી હરાવીને ફાઇનલની ટિકિટ મેળવી હતી.બીજી તરફ શ્રીલંકાએ પાકિસ્તાનને 4 વિકેટે હરાવીને ખિતાબી મુકાબલામાં પ્રવેશ કર્યો.આ કારણે ફાઇનલને લઈને ક્રિકેટ ચાહકોમાં ભારે ઉત્સુકતા જોવા મળી રહી છે.
T20Iમાં ભારતનો શ્રીલંકા સામે દબદબો
જો મહિલા T20I ક્રિકેટમાં ભારત અને શ્રીલંકા વચ્ચેના અત્યાર સુધીના મુકાબલાનો રેકોર્ડ જોઈએ તો ભારતીય ટીમનું પલડું સ્પષ્ટ રીતે ભારે છે.બંને ટીમો વચ્ચે અત્યાર સુધી 31 T20I મેચ રમાઈ છે.ભારતે તેમાંથી 25 મેચમાં જીત મેળવી છે,જ્યારે શ્રીલંકા માત્ર 5 મેચ જીતી શક્યું છે.1 મેચનું પરિણામ આવ્યું નહોતું.આ આંકડા ભારત માટે આત્મવિશ્વાસ વધારનારા છે. જોકે, ફાઇનલમાં માત્ર જૂના રેકોર્ડના આધારે જીત નક્કી થઈ શકે નહીં.શ્રીલંકાની ટીમ વર્તમાન ટૂર્નામેન્ટમાં શાનદાર લયમાં છે અને પોતાના ખિતાબનો બચાવ કરવા માટે મેદાનમાં ઉતરશે.દુબઈની ધીમી પીચ પણ ફાઇનલમાં મહત્વની ભૂમિકા ભજવી શકે છે. આવી પીચ પર બેટિંગ કરવી સરળ રહેતી નથી અને બોલરોને પણ ફાયદો મળી શકે છે. ભારતીય ટીમે આ સ્થિતિને ધ્યાનમાં રાખીને પોતાની રણનીતિ બનાવવી પડશે.