ભારતીય ક્રિકેટ ટીમના યુવા બેટર યશસ્વી જયસ્વાલ મેદાન પર પોતાના પ્રદર્શનથી ઓળખ બનાવ્યા બાદ હવે બિઝનેસની દુનિયામાં પણ નવી શરૂઆત કરવા જઈ રહ્યો છે. જયસ્વાલે YBJ Fits નામથી પોતાની બ્રાન્ડ રજૂ કરી છે. આ બ્રાન્ડ હેઠળ કપડાં અને બેગ જેવા પ્રોડક્ટ્સ ગ્રાહકો માટે ઉપલબ્ધ કરાવવાની યોજના છે. યશસ્વીએ પોતાની ઇન્સ્ટાગ્રામ સ્ટોરી દ્વારા આ નવી શરૂઆતની જાણકારી આપી હતી. બ્રાન્ડનું નામ અને લોગો પણ સામે આવ્યા છે. આ સાથે તેની બ્રાન્ડ માટે અલગ ઇન્સ્ટાગ્રામ પેજ પણ તૈયાર કરવામાં આવ્યું છે, જ્યાં પ્રોડક્ટ્સની ઝલક જોવા મળી રહી છે.
ટી-શર્ટથી લઈને ટ્રાવેલ બેગ સુધીના પ્રોડક્ટ્સ
YBJ Fitsના ઇન્સ્ટાગ્રામ પેજ પર હાલમાં ટી-શર્ટ, લગેજ બેગ અને ટ્રાવેલ બેગ જેવા પ્રોડક્ટ્સ જોવા મળી રહ્યા છે. આથી સ્પષ્ટ થાય છે કે જયસ્વાલની બ્રાન્ડ માત્ર કપડાં પૂરતી સીમિત રહેવાની નથી, પરંતુ ટ્રાવેલ સાથે જોડાયેલા પ્રોડક્ટ્સ પણ તેમાં સામેલ થઈ શકે છે. જોકે, બ્રાન્ડના તમામ પ્રોડક્ટ્સની કિંમત, વેચાણ શરૂ થવાની ચોક્કસ તારીખ અને ઉપલબ્ધતા અંગેની સંપૂર્ણ માહિતી હજી સામે આવી નથી. તેથી ગ્રાહકોને આ બ્રાન્ડના લોન્ચ અને પ્રોડક્ટ્સની વધુ વિગતો માટે રાહ જોવી પડશે.
વિરાટ કોહલી અને ધોનીની જેમ બિઝનેસમાં પગલું
ક્રિકેટરો માટે મેદાનની બહાર બ્રાન્ડ અને બિઝનેસ સાથે જોડાવું નવી વાત નથી. વિરાટ કોહલી, મહેન્દ્ર સિંહ ધોની, સચિન તેંડુલકર અને રોહિત શર્મા જેવા જાણીતા ભારતીય ક્રિકેટરો પણ વિવિધ બ્રાન્ડ અને બિઝનેસ સાથે જોડાયેલા છે. હવે યુવા બેટર યશસ્વી જયસ્વાલે પણ પોતાની બ્રાન્ડ રજૂ કરીને આ દિશામાં પગલું ભર્યું છે. જોકે, YBJ Fitsની સફળતા તેના પ્રોડક્ટ્સની ગુણવત્તા, કિંમત, માર્કેટિંગ અને ગ્રાહકોના પ્રતિસાદ પર નિર્ભર રહેશે.
ક્રિકેટમાં પણ નવા પ્રયોગો કરી રહ્યો છે જયસ્વાલ
યશસ્વી જયસ્વાલ માત્ર મેદાનની બહાર જ નહીં, પરંતુ ક્રિકેટમાં પણ અલગ-અલગ ભૂમિકાઓ અજમાવતો જોવા મળ્યો છે. તાજેતરમાં રણજી ટ્રોફી દરમિયાન તે વિકેટકીપિંગની પ્રેક્ટિસ કરતો જોવા મળ્યો હતો. અગાઉ તે સ્પિન બોલિંગમાં પણ હાથ અજમાવી ચૂક્યો છે. જોકે, ભારતીય ટીમમાં તેની મુખ્ય ઓળખ ઓપનિંગ બેટર તરીકેની છે. ટેસ્ટ ક્રિકેટમાં સતત સારા પ્રદર્શનથી તેણે પોતાની જગ્યા મજબૂત કરી છે. હવે ક્રિકેટની સાથે બિઝનેસમાં પણ પોતાની ઓળખ ઊભી કરવાનો તેનો પ્રયાસ રહેશે.
યશસ્વીની આ નવી શરૂઆતથી તેના ચાહકોમાં પણ ઉત્સુકતા વધી શકે છે. હવે જોવાનું રહેશે કે YBJ Fits ક્યારે બજારમાં આવે છે અને તેના પ્રોડક્ટ્સને ગ્રાહકો તરફથી કેવો પ્રતિસાદ મળે છે.
આ પણ વાંચો: IND vs WI: નમન ધીરની સ્ટમ્પિંગમાં 5 મિનિટ સુધી કેમ અટવાયા થર્ડ અમ્પાયર? આ એક ક્ષણ બની નિર્ણયની ચાવી
