ઝારખંડની રાજધાની રાંચીની હોટવાર સ્થિત બિરસા મુંડા સેન્ટ્રલ જેલ ફરી એકવાર ગંભીર વિવાદમાં આવી છે. જેલમાં બંધ રહેલા 20 વર્ષના કેદી સાથે મારપીટ, બળજબરીથી નશીલો પદાર્થ પીવડાવવા અને 3 અલગ-અલગ પ્રસંગે સામૂહિક અકુદરતી યૌન શોષણ કરવામાં આવ્યું હોવાનો ગંભીર આક્ષેપ થયો છે. આ મામલે પીડિતના પિતાએ જેલ અધિક્ષક, વોર્ડ પ્રભારી, મેડિકલ ઓફિસર સહિત કુલ 19 લોકો સામે ફરિયાદ નોંધાવી છે.
જેલમાંથી છૂટ્યા બાદ માનસિક રીતે પરેશાન હતો યુવક
રાંચીના રાતુ પોલીસ સ્ટેશન વિસ્તારના રહેવાસી પીડિતના પિતાએ ગુરુવારે ખેલગાંવ પોલીસ સ્ટેશનમાં લેખિત ફરિયાદ આપી હતી. ફરિયાદ મુજબ, તેમનો 20 વર્ષનો પુત્ર એક કેસમાં વિચારાધીન કેદી તરીકે હોટવાર જેલમાં બંધ હતો. રાંચીની અદાલતે 12 જૂન 2026ના રોજ તેને નિર્દોષ જાહેર કર્યો હતો.
જેલમાંથી મુક્ત થયા બાદ યુવક માનસિક રીતે ખૂબ પરેશાન
જેલમાંથી મુક્ત થયા બાદ યુવક માનસિક રીતે ખૂબ પરેશાન રહેતો હતો અને હતાશામાં સરી પડ્યો હતો. આ કારણે પરિવારજનો તે સમયે પોલીસમાં ફરિયાદ કરી શક્યા નહોતા. યુવકની માનસિક સ્થિતિ થોડી સામાન્ય થયા બાદ તેણે પરિવારને જેલમાં પોતાની સાથે બનેલી ઘટનાની જાણ કરી હતી.
3 અલગ-અલગ તહેવારો દરમિયાન અત્યાચારનો આક્ષેપ
પીડિતના જણાવ્યા અનુસાર, જેલમાં શિવરાત્રિ, રામનવમી અને સરહુલ એમ 3 અલગ-અલગ પ્રસંગે કેટલાક કેદીઓએ તેને બળજબરીથી સાડી પહેરાવી મહિલાનો વેશ ધારણ કરાવ્યો હતો. ત્યારબાદ નશીલો પદાર્થ પીવડાવી તેની સાથે સામૂહિક અકુદરતી યૌન શોષણ કરવામાં આવ્યું હોવાનો આક્ષેપ છે.
તેને ભારે રક્તસ્રાવ પણ થયો
આ ઘટનાને કારણે યુવક ગંભીર રીતે ઘાયલ થયો હતો અને તેને ભારે રક્તસ્રાવ પણ થયો હતો. યુવકે આ અંગે વોર્ડ પ્રભારીને ફરિયાદ કરી હોવા છતાં જેલ પ્રશાસન તરફથી કોઈ મદદ કે સારવાર મળી ન હોવાનો પણ આક્ષેપ કરવામાં આવ્યો છે.
જેલ અધિક્ષક સહિત 19 લોકો સામે ફરિયાદ
પીડિતના પિતાની ફરિયાદના આધારે ખેલગાંવ પોલીસે બિરસા મુંડા સેન્ટ્રલ જેલના જેલ અધિક્ષક, વોર્ડ પ્રભારી, મેડિકલ ઓફિસર અને એક ડઝનથી વધુ કેદીઓ સહિત કુલ 19 લોકો સામે એફઆઈઆર નોંધાવી છે. પોલીસે સમગ્ર મામલે તપાસ શરૂ કરી છે.
હોટવાર જેલની સુરક્ષા વ્યવસ્થા પર ફરી સવાલ
હોટવાર જેલની સુરક્ષા અને શિસ્ત વ્યવસ્થાને લઈને અગાઉ પણ સવાલો ઊઠ્યા છે. નવેમ્બર 2025માં ચર્ચિત દારૂ કૌભાંડના કેસમાં જેલમાં બંધ બે કેદીઓનો નૃત્ય કરતો વીડિયો સોશિયલ મીડિયા પર વાયરલ થયો હતો. ત્યારબાદ કાર્યવાહી કરવામાં આવી હતી અને જેલના કેટલાક અધિકારીઓ સામે પગલાં લેવાયાં હતાં.
આ પણ વાંચો : Crime : રસગુલ્લો હોવાનું કહીને મોંઢામાં મુકી દીધો બોમ્બ, વિસ્ફોટમાં 35 વર્ષીય યુવકનું મોત, પોલીસ તપાસમાં લાગી
