અમદાવાદ શહેરમાં વધુ એક છેતરપિંડીની ઘટના પ્રકાશમાં આવી છે, જેમાં કોલેજમાં અભ્યાસ કરતી એક માસૂમ યુવતીને તેની જ મિત્રએ વિશ્વાસમાં લઈને લાખો રૂપિયાનો ચૂનો લગાવ્યો છે. 'ફોર એવર લિવિંગ' નામની પ્રોડક્ટમાં રોકાણ કરવાથી મોટો ફાયદો થશે, તેવી લાલચ આપીને યુવતીના સોનાના દાગીના ગીરવે મુકાવી દેવામાં આવ્યા હતા, જે બાદમાં પરત ન આપીને છેતરપિંડી આચરવામાં આવી છે.
બહેનપણી અને તેના સાગરીતે ખેલ્યો ખેલ
ઘટનાની મળતી માહિતી અનુસાર, ભોગ બનનાર યુવતીની મિત્ર માલિની પંડ્યાએ તેને પ્રોડક્ટ્સમાં રોકાણ કરવા માટે લલચાવી હતી. રોકાણ માટે નાણાં ન હોવાથી માલિનીએ યુવતીને તેના દાગીના ગીરવે મૂકવા માટે દબાણ કર્યું હતું. આ દરમિયાન જય નાગર નામના યુવકે મધ્યસ્થી બનીને અંદાજે 6 લાખ રૂપિયાની કિંમતના દાગીના લઈ લીધા હતા અને તેના બદલામાં રોકાણ માટે જરૂરી રકમ આપવાનું વચન આપ્યું હતું.
