અમદાવાદ જિલ્લાના ધંધુકા-ફેદરા હાઈવે પર અકસ્માતોનો સિલસિલો યથાવત રહ્યો છે. આજે ધંધુકા-ફેદરા રોડ ઉપર આવેલા હરિપુરા પાટિયા પાસે એક કાર અને બાઈક વચ્ચે ગમખ્વાર અકસ્માત સર્જાયો હતો. આ ટક્કર એટલી જોરદાર હતી કે, બાઈક ચાલક વૃદ્ધનું ઘટના સ્થળે જ કમકમાટીભર્યું મોત નીપજ્યું હતું.

સાળંગપુરથી પરત ફરતા દંપતીને નડ્યો અકસ્માત

ઘટનાની મળતી માહિતી અનુસાર, કારમાં સવાર પતિ-પત્ની સાળંગપુર હનુમાનજીના દર્શન કરીને પરત સુરત જઈ રહ્યા હતા. આ દરમિયાન હરિપુરા પાટિયા પાસે તેમની કાર અને બાઈક વચ્ચે અકસ્માત સર્જાયો હતો. અકસ્માત બાદ હાઈવે પર લોકોના ટોળેટોળાં એકઠા થઈ ગયા હતા.

ફતેપુરના વૃદ્ધનું કરૂણ મોત

આ અકસ્માતમાં જીવ ગુમાવનાર મૃતકની ઓળખ થઈ ગઈ છે. મૃતક વજેસંગભાઈ ભીખાભાઇ ભુંભાણી (ઉંમર વર્ષ 65) હોવાનું બહાર આવ્યું છે, જેઓ ધંધુકા તાલુકાના ફતેપુર ગામના રહેવાસી હતા. વૃદ્ધના મૃત્યુથી પરિવારમાં અને ફતેપુર ગામમાં શોકનું મોજું ફરી વળ્યું છે. ઘટનાની જાણ થતા જ સ્થાનિક પોલીસ કાફલો સ્થળ પર પહોંચી ગયો હતો અને મૃતદેહને પોસ્ટ મોર્ટમ અર્થે ખસેડવાની તજવીજ હાથ ધરી હતી. પોલીસે અકસ્માત અંગે ગુનો નોંધીને વધુ તપાસ શરૂ કરી છે.


આ પણ વાંચો - Ahmedabad: વટવામાં જાહેર રોડ પર ગાડી પાર્ક કરી તલવારો લહેરાવી ધમકી આપનારા 4 આરોપીઓની ધરપકડ