Ahmedabad News: 'હું PSI છું' કહી સિક્યુરિટી ગાર્ડ પર તૂટી પડ્યા શખ્સો, એન્ટ્રી કરવાનું કહેતા ગાર્ડને માર્યો ઢોર માર

અમદાવાદના હાથીજણ સર્કલ પાસે એક ચોંકાવનારી હુમલાની ઘટના સામે આવી છે. અહીં ફરજ બજાવતા એક સિક્યુરિટી ગાર્ડ પર કેટલાક શખ્સોએ હિંસક હુમલો કર્યો હતો. સામાન્ય બોલાચાલીએ લોહિયાળ સ્વરૂપ ધારણ કરતા આસપાસના લોકોમાં ફફડાટ વ્યાપી ગયો હતો.

એન્ટ્રી કરવા જેવી સામાન્ય બાબતે વિવાદ

ઘટનાની મળતી માહિતી અનુસાર, સિક્યુરિટી ગાર્ડે નિયમ મુજબ આવનાર શખ્સોને રજિસ્ટરમાં એન્ટ્રી કરવાનું કહ્યું હતું. પોતાની ફરજ નિભાવી રહેલા ગાર્ડની આ વાતથી ઉશ્કેરાયેલા 2 થી 3 શખ્સો ગાળાગાળી કરવા લાગ્યા હતા. મામલો એટલો બિચક્યો હતો કે, આ શખ્સોએ સિક્યુરિટી ગાર્ડને પકડીને ઢોર માર મારવાનું શરૂ કરી દીધું હતું.

હુમલાખોરે આપી PSI હોવાની ઓળખ

આ ઘટનામાં સૌથી ચોંકાવનારી બાબત એ છે કે, હુમલો કરનાર શખ્સો પૈકી એકે પોતે PSI (પોલીસ સબ ઇન્સ્પેક્ટર) હોવાની ઓળખ આપી હતી. પોલીસના નામે ધાક-ધમકી આપી ગાર્ડ પર હુમલો કરવામાં આવ્યો હતો. ગંભીર રીતે ઇજાગ્રસ્ત થયેલા સિક્યુરિટી ગાર્ડને તાત્કાલિક સારવાર અર્થે નજીકની હોસ્પિટલમાં ખસેડવામાં આવ્યો છે.

વટવા GIDC પોલીસે તપાસ શરૂ કરી

બનાવની જાણ થતા જ વટવા GIDC પોલીસ કાફલો ઘટના સ્થળે પહોંચી ગયો હતો. પોલીસે ઇજાગ્રસ્ત ગાર્ડનું નિવેદન લેવાની તજવીજ હાથ ધરી છે. ખરેખર હુમલો કરનાર શખ્સ પોલીસમાં છે કે, કેમ અને સમગ્ર મામલા પાછળનું સત્ય શું છે, તે દિશામાં પોલીસે તપાસના ચક્રો ગતિમાન કર્યા છે. સીસીટીવી ફૂટેજ દ્વારા પણ આરોપીઓની ઓળખ કરવાની પ્રક્રિયા શરૂ કરવામાં આવી છે.

આ પણ વાંચો - Ahmedabadમાં માણેકચોકની જીણાભાઈ ચેમ્બર્સમાં લાગી ભીષણ આગ, સાંકડી ગલીઓએ ફાયર બ્રિગેડની કસોટી કરી