ગુજરાતમાં દારૂબંધીના કડક અમલ વચ્ચે બુટલેગરો દારૂ ઘુસાડવા માટે અવનવા નુસખાઓ અપનાવી રહ્યા છે. અરવલ્લી જિલ્લાની શામળાજી પોલીસે બાતમીના આધારે અણસોલ ચેકપોસ્ટ પાસે સર્ચ ઓપરેશન હાથ ધરીને એક ટ્રકના ગુપ્તખાનામાંથી વિદેશી દારૂનો મોટો જથ્થો ઝડપી લેવામાં સફળતા મેળવી છે.
ગુપ્તખાનામાં છુપાવ્યો હતો દારૂનો જથ્થો
શામળાજી પોલીસની ટીમ જ્યારે અણસોલ ચેકપોસ્ટ પર વાહન ચેકિંગમાં હતી, ત્યારે શંકાસ્પદ હાલતમાં આવતી એક ટાટા કંપનીની બંધ બોડીની ટ્રકને રોકવામાં આવી હતી. પ્રાથમિક તપાસમાં ટ્રક ખાલી જણાતી હતી, પરંતુ પોલીસે ઊંડાણપૂર્વક તપાસ કરતા ટ્રકની અંદર બનાવેલા એક અત્યંત સુરક્ષિત અને ગુપ્તખાનાનો પર્દાફાશ થયો હતો. આ ખાનાની અંદરથી વિદેશી દારૂની કુલ 93 પેટીઓ એટલે કે 4176 નંગ બોટલ મળી આવી હતી.
