રાજ્યમાં દારૂબંધીના અમલ વચ્ચે કચ્છના ભચાઉ તાલુકામાંથી એક ચોંકાવનારી ઘટના સામે આવી છે. ભચાઉના આધોઈ ગામના સ્થાનિક આગેવાનોએ ગામ લોકો સાથે મળીને દેશી દારૂના અડ્ડા પર 'જનતા રેડ' કરી હતી. આ ઘટનાના વીડિયો સોશિયલ મીડિયા પર વાયરલ થતા પોલીસ તંત્રની કામગીરી સામે સવાલો ઉભા થયા છે.
શું છે સમગ્ર મામલો?
મળતી માહિતી મુજબ, આધોઈ ગામમાં લાંબા સમયથી દેશી દારૂનું વેચાણ થતું હોવાની ફરિયાદો ઉઠી હતી. સ્થાનિકોનો આક્ષેપ છે કે, અનેક રજૂઆતો છતાં તંત્ર દ્વારા કોઈ નક્કર પગલાં લેવામાં આવતા ન હતા. અંતે, કંટાળેલા ગ્રામજનો અને સ્થાનિક નેતાઓએ કાયદો હાથમાં લેવાને બદલે જનતા રેડ કરવાનું નક્કી કર્યું હતું. રેડ દરમિયાન મોટા પ્રમાણમાં દેશી દારૂનો જથ્થો ઝડપાયો હતો.
