છોટાઉદેપુર જિલ્લાના બોડેલીના અલીપુરા ચાર રસ્તા પાસે ગત મોડી રાત્રે એક ભયાનક અકસ્માત સર્જાયો હતો. એક બેફામ સ્પીડે આવતી સ્કોર્પિયો કારના ચાલકે સ્ટિયરિંગ પરનો કાબૂ ગુમાવતા કાર ડિવાઈડરની રેલિંગ તોડીને સીધી રસ્તાની બાજુમાં આવેલી એક બંધ દુકાનમાં ઘુસી ગઈ હતી. આ સમગ્ર ઘટનાના સીસીટીવી ફૂટેજ પણ સામે આવ્યા છે, જે જોઈને કોઈ પણના રુંવાડા ઉભા થઈ જાય તેમ છે.
જાનહાનિ ટળી, પણ શંકાઓ વધી
અકસ્માત રાત્રિના સમયે થયો હોવાથી દુકાન બંધ હતી અને રસ્તા પર અવરજવર ઓછી હતી, જેના કારણે મોટી જાનહાનિ ટળી ગઈ હતી. જોકે, અકસ્માત બાદ કારમાં સવાર ચાર વ્યક્તિઓ પૈકી ત્રણ શખ્સો ઘટનાસ્થળેથી ફરાર થઈ ગયા હતા. ગ્રામજનોએ એક વ્યક્તિને ઝડપી લીધો હતો.
દારૂની મહેફિલ અને સરપંચનું કનેક્શન?
અકસ્માતગ્રસ્ત સ્કોર્પિયો કારની તપાસ કરતા તેમાંથી ઠલકી ગ્રામ પંચાયતના સરપંચની નેમ પ્લેટ મળી આવી છે. આ ઉપરાંત કારમાંથી વિદેશી દારૂના ગ્લાસ પણ મળી આવ્યા હોવાની ચર્ચા છે, જેનાથી એવી આશંકા સેવાઈ રહી છે કે કાર ચાલક અને તેમાં સવાર લોકો નશાની હાલતમાં હોઈ શકે છે. હવે પોલીસ એ દિશામાં તપાસ કરી રહી છે કે, અકસ્માત સમયે કાર સરપંચ પોતે ચલાવતા હતા કે તેમનો કોઈ મિત્ર કે પરિવારજન.
પોલીસ કાર્યવાહી
બોડેલી પોલીસ દ્વારા આ મામલે ત્વરિત કાર્યવાહી કરતા કાર ચાલકની ધરપકડ કરી લેવામાં આવી છે. પોલીસ દ્વારા સીસીટીવી ફૂટેજ કબ્જે કરવામાં આવ્યા છે. હાલ પોલીસ ફરાર થયેલા અન્ય ત્રણ શખ્સોની શોધખોળ હાથ ધરી છે. દારૂના સેવન અંગે ચાલકનું મેડિકલ પરીક્ષણ પણ કરવામાં આવી રહ્યું છે.
આ પણ વાંચો - Chhotaudaypur:ઇજાગ્રસ્ત પક્ષીના જીવ બચાવવા 5 તાલુકા કંટ્રોલ રૂમ કાર્યરત
