છેવાડાના આદિવાસી વિસ્તારોમાં ડિગ્રી વગર એલોપેથિક પ્રેક્ટિસ કરી લોકોના જીવ જોખમમાં મૂકતા બોગસ ડોક્ટરો વિરૂદ્ધ પોલીસે લાલ આંખ કરી છે. છોટાઉદેપુર એસઓજી પોલીસ દ્વારા ક્વાંટ તાલુકાના ભેખડીયા ગામમાં રેડ કરીને પશ્ચિમ બંગાળના એક બોગસ ડોક્ટરને પ્રેક્ટિસ કરતા રંગે હાથે ઝડપી લીધો છે.
ભેખડીયામાં ચલાવતો હતો ગેરકાયદે ક્લિનિક
ઘટનાની મળતી માહિતી અનુસાર, પશ્ચિમ બંગાળનો વતની અને હાલ નસવાડીમાં રહેતો અભિજીત તારક સરકાર નામનો શખ્સ ક્વાંટ તાલુકાના ભેખડીયા ગામમાં કોઈ પણ પ્રકારની મેડિકલ ડિગ્રી વગર ક્લિનિક ખોલીને બેઠો હતો. આ શખ્સ આસપાસના નિર્દોષ આદિવાસી દર્દીઓને તપાસીને તેમને એલોપેથિક દવાઓ તેમજ ઈન્જેક્શન આપતો હતો. લોકોના આરોગ્ય સાથે થઈ રહેલા આ ચેડાંની બાતમી છોટા ઉદેપુર એસઓજી પોલીસને મળતા ઓપરેશન હાથ ધરવામાં આવ્યું હતું.
